ကျော်ဇော/People’s Spring
မန္တလေးတိုင်း၊ ညောင်ဦးမြို့နယ်၊ ပုဂံမြို့တွင် သန်းခေါင်စာရင်းကောက်ယူနေသည့် စစ်ကောင်စီလက်အောက်ခံအဖွဲ့ကို ဝင်ရောက်ပစ်ခတ်ခဲ့ရာ အုပ်ချုပ်ရေးမှူးတစ်ဦး သေဆုံးသွားကြောင်း ညောင်ဦးခရိုင်-ပကဖ(ပုဂံပြည်ဘီလူးတပ်)မှ တာဝန်ရှိသူတစ်ဦးက People’s Spring သို့ ပြောသည်။
ပုဂံမြို့ အနော်ရထာရပ်ကွက်နှင့် ပိုက်သေလည်ရပ်ကွက်တို့၏ စစ်ကောင်စီခန့်အုပ်ချုပ်ရေးမှူး ပုဂံကိုဆော်(ခ)ဆော်လီဆိုသူနှင့်အဖွဲ့ သည် ယနေ့(အောက်တိုဘာ ၁၄ ရက်)နံနက် ၁၀ နာရီ ၃၈ ခန့်က ရပ်ကွက်တစ်ခုအတွင်း ရဲများလုံခြုံရေးလိုက်ပါ၍ သန်းခေါင်စာရင်းကောက်ယူနေစဥ် ဝင်ရောက်ပစ်ခတ်ခဲ့ခြင်း ဖြစ်သည်။
“ပုဂံမြို့ရဲ့ အကြီးဆုံးနဲ့ သြဇာအညောင်းဆုံး အုပ်ကြီးပါ။ သူပြီးရင် ပုဂံတစ်မြို့လုံး(ဌာနဆိုင်ရာကိစ္စ)အကုန်ပြီးတယ်။ ရဲသုံးကောင် လက်နက်အပြည့်အစုံနဲ့ လိုက်ပါလာပေမယ့် ထွက်ပြေးသွားတယ်”ဟု ပုဂံပြည်ဘီလူးတပ်မှ တာဝန်ရှိသူက ပြောသည်။
Public Service Announcement
ပစ်ခတ်မှုဖြစ်ပွားစဥ် သန်းခေါင်စာရင်းကောက်သူများနှင့်အတူ လုံခြုံရေးလိုက်ပါသည့် ရဲသုံးဦးမှာ လက်နက်အပြည့်အစုံပါသော်လည်း ပစ်ခတ်ခံရစဥ် ခုခံခြင်းမရှိဘဲ ထွက်ပြေးသွားခြင်းဖြစ်သည်ဟု ၎င်းက ဆက်ပြောသည်။
ထို့အပြင် ပစ်ခတ်ခံရ၍ သေဆုံးသွားသည့် စစ်ကောင်စီအုပ်ကြီး ပုဂံကိုဆော်(ခ)ဆော်လီသည် ယခုနောက်ပိုင်းနေအိမ်တွင်မနေဘဲ ရဲစခန်း၌ အနေများပြီး သေနတ်တစ်လက် အမြဲဆောင်ထားသည်ဟု စုံစမ်းသိရသော်လည်း ယခုတိုက်ခိုက်မှုအတွင်း အုပ်ကြီးနှင့်အတူ လက်နက်ပါလာခြင်းရှိ၊ မရှိ စစ်ဆေးချိန်မရခဲ့ကြောင်း ပုဂံပြည်လီလူးတပ်ဖွဲ့က ပြောသည်။
“ကိုးလုံးကပေါ့။ အဲလူက ဒီကာလတော်တော်ချမ်းသာသွားတယ်။ ပုဂံမှာ ဝင်သမျှဧည့်သည် တွေ ဧည့်စာရင်းအရဆိုပြီး တစ်ယောက် ၂၀၀ကောက်တာ။ တော်တော်ချမ်းသာသွားတာ။ ပုဂံကိုဆော်ဆိုပြီး လုပ်နေတဲ့သူ။ အဲလိုလူ နောက်နှစ်ယောက်လောက် ကျန်သေးတယ်”ဟု ပုဂံဒေသခံတစ်ဦးက ပြောသည်။
ညောင်ဦးခရိုင်အတွင်းရှိ စစ်ကောင်စီခန့်အုပ်ကြီးများအနေဖြင့် စစ်ကောင်စီနှင့် ဆက်လက်ပူးပေါင်းခြင်းမပြုလုပ်ကြရန် သတိပေးထားသော်လည်း ပုဂံငဆော်(ခ)ဆော်လီသည် စစ်ကောင်စီနှင့်ပူးပေါင်း၍ လူငယ်များအား PDF ၊ PDF ထောက်ပို့ဟု စွပ်စွဲဖမ်းဆီးခြင်း၊ ပြည်သူလူထုအား နည်းမျိုးစုံဖြင့် ဒုက္ခပေးနေခြင်းတို့ကြောင့် ယခုကဲ့သို့ ပစ်ခတ်ရှင်းလင်းခြင်းဖြစ်ကြောင်း ပုဂံပြည်ဘီလူးတပ်က အသိပေးထားသည်။
ယခုသီတင်းကျွတ် ကာလအတွင်း ပုဂံမြို့သို့လာရောက်အပမ်းဖြေရန် အပျော်ခရီးထွက်လာမည့် ပြည်သူများအနေဖြင့်လည်း စစ်ကောင်စီယာဥ်တန်းများနှင့် အဝေးဆုံးနေပေးကြရန်နှင့် ဒလန်များပိုင်ဆိုင်သော စားသောက်ဆိုင်များ၌ စားသောက်ခြင်းမပြုကြရန် ထပ်မံသတိပေးထားသည်။
