နွားထိုးကြီးမြို့တွင် စစ်တပ်လက်နက်ကြီးဖြင့် ပစ်ခတ်၍ လင်မယားနှစ်ဦး သေဆုံး

ဇေအောင်/People’s Spring

မန္တလေးတိုင်း၊ နွားထိုးကြီးမြို့တွင် စစ်ကောင်စီတပ်က လက်နက်ကြီးဖြင့်ပစ်ခတ်၍ လင်မယားနှစ်ဦး သေဆုံးခဲ့ကြောင်း ဒေသခံများက ပြောသည်။

ယနေ့(အောက်တိုဘာ ၂၈ရက်)ည ၇နာရီ ၅၀ မိနစ်ခန့်က နွားထိုးကြီးမြို့ နတ်စင်ကုန်းရှိ စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လက်နက်ကြီး ၃လုံးပစ်ခတ်ခဲ့ကြောင်း၊ ပစ်ခတ်မှုကြောင့် နွားထိုးကြီးမြို့တောင်ဘက် ထနောင်းပင်လဲ့ကျေးရွာအနီးရှိ လူနေတဲတစ်လုံးပေါ် ကျကာ အဆိုပါတဲရှိ လင်မယား နှစ်ဦးသေဆုံးခဲ့ကြောင်း ဒေသခံများက ပြောသည်။

Public Service Announcement

“မလှိုင်-တောင်သာလမ်းဘက် ထွက်တဲ့ဘက်။ မြို့အဝင်ဆိုင်းဘုတ်တောင်နားမှာ။ တံတားရိုးအရှေ့ဘက်နားက တဲပေါ်ကျပြီး လင်မယားနှစ်ယောက်လုံးသေတယ်။ ယောက်ျားဖြစ်တဲ့သူဆို မျက်နှာတခြမ်းပျက်စီးသွားတယ်။”ဟု နွားထိုးကြီးဒေသခံ တစ်ဦးက ပြောသည်။

သေဆုံးသူများ၏ အသေးစိတ်အချက်အလက်များအား မသိရသေးပေ။

ယမန်နေ့ည ၁၀ နာရီခန့်ကလည်း စစ်ကောင်စီတပ်သည် နွားထိုးကြီးမြို့တောင်ဘက် အောင်သာရွာနှင့် အောင်ပန်းကုန်းကျေးရွာကြားအား တိုက်ပွဲဖြစ်ပွားခြင်းမရှိဘဲ Y12 လေယာဥ်ဖြင့် ဗုံးသီး ၂၇ လုံးခန့် ကြဲချတိုက်ခိုက်ရာ ဆီဆိုင်တစ်ဆိုင်ပျက်စီးပြီး နွားတစ်ကောင်သေဆုံးကြောင်း နွားထိုးကြီးမြို့ ဒေသခံများက ပြောသည်။

သြဂုတ် ၁၀ရက်က မြင်းခြံခရိုင်အထူးစစ်ဆင်ရေးအဖြစ် နွားထိုးကြီးမြို့ပေါ်တိုက်ပွဲဖြစ်ပွားခဲ့ပြီးနောက်ပိုင်း စစ်ကောင်စီတပ်က နွားထိုးကြီးမြို့နယ်အတွင်း လေကြောင်းတိုက်ခိုက်မှုများ ပြုလုပ်ခဲ့ပြီး ပြည်သူထိခိုက်သေဆုံးမှုအများအပြား ရှိနေသည်။