အိမ်သွင်/People’s Spring
ရခိုင်ပြည်နယ် အမ်းမြို့ကို သိမ်းပိုက်နိုင်ရေး အာရက္ခတပ်တော်(AA)က ထိုးစစ်ဆင်တိုက်ခိုက်နေချိန်တွင် စစ်ကောင်စီ၏ထောက်ပို့လမ်းကြောင်းဖြစ်သော အမ်း – ပဒါန်းလမ်းပိုင်းမှ တပ်စခန်းနှစ်ခုကို AA၏ မဟာမိတ်တော်လှန်ရေးတပ်များက တိုက်ခိုက်ခဲ့သည်။
အမ်း – ပဒါန်းလမ်းပိုင်းရှိ ဂုတ်ကြီးကျေးရွာထိပ်၊ ဘုံဘောလမ်းဆုံနှင့် မိုင်တိုင် (၁၁)မှ စစ်ကောင်စီစခန်းနှစ်ခုကို လူထုတော်လှန်ရေးမဟာမိတ်အင်အားစု (PRA-Magway )၊ အရှိုချင်းကာကွယ်ရေးတပ်(ACDF)နှင့် မင်းဘူးခရိုင် အမှတ်(၂)တပ်ရင်းတို့က နိုဝင်ဘာ ၅ရက် နံနက် တွင် တပြိုင်နက်စီးနင်းတိုက်ခိုက်ခဲ့ခြင်းဖြစ်သည်။
တိုက်ပွဲအတွင်း ရန်သူ့စစ်ကောင်စီတပ်ဖွဲ့ဝင် ၁၀ဦးခန့်သေဆုံးနိုင်သည်ဟု PRA-Magwayက ယနေ့(နိုဝင်ဘာ ၆ရက်)တွင် သတင်းထုတ်ပြန်ထားသည်။
Public Service Announcement
” စခန်းကို အပြီးသတ်သိမ်းပိုက်ဖို့ပဲ။ ဒါပေမယ့် စစ်တပ်ဘက်က လက်နက်ကြီးတွေနဲ့ပစ်ပြီး စစ်ကူတွေရောက်လာလို့ ပြန်ဆုတ်ခဲ့ရတယ်။ ဒါပေမယ့် စစ်ရေးရည်မှန်းချက်အောင်မြင်တယ်” ဟု ပြည်သူ့ကာကွယ်ရေးတပ်ဖွဲ့နှင့် နီးစပ်သူတစ်ဦးက ပြောသည်။
အမ်း – ပဒါန်းလမ်းပိုင်းသည် အမ်းမြို့မှ မကွေးတိုင်း မင်းဘူးမြို့သို့ ထွက်ရာ၌ အဓိကကျသည့် လမ်းပိုင်းဖြစ်သည်။
အမ်းမြို့သိမ်းတိုက်ပွဲကို AAက စက်တင်ဘာ ၂၆ရက်တွင် စတင်ခဲ့ပြီးနောက် အဆိုပါလမ်းမိုင်းကိုလည်း AAနှင့် မဟာမိတ်တပ်ဖွဲ့များကထိန်းချုပ်ခဲ့သည်။
အောက်တိုဘာ ၂၈ရက်ကလည်း အမ်း – ပဒါန်းကားလမ်းပိုင်းတွင် အမ်းမြို့နယ်မှပြန်လာသည့် စစ်ကောင်စီယာဥ်တန်းကို ACDFနှင့်မင်းဘူးခရိုင် တပ်ရင်း(၂)က တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၀ဦးထက်မနည်းသေဆုံးခဲ့သည်။
ထို့အပြင် ဧရာဝတီမြစ်အနောက်ဘက်ခြမ်းဒေသ ထိန်းချုပ်စိုးမိုးနိုင်ရေးသည် တော်လှန်ရေးအင်အားစုများ၏ စစ်ရေးရည်မှန်းချက်ဖြစ်ပြီးအမ်း-ပဒါန်းလမ်းပိုင်းထိန်းချုပ်နိုင်ရေးသည် စစ်ရေးရည်မှန်းချက်၏ ရှေ့ပြေးလှုပ်ရှားမှု များ လည်းဖြစ်သည်ဟု PRA-Magwayက သတိပေးထားသည်။
လက်ရှိတွင် ဧရာဝတီတိုင်း၊ ပဲခူးတိုင်း၊ မကွေးတိုင်းတို့နှင့် ထိဆက်နေသော ရခိုင်ပြည်နယ် တောင်ကုတ်မြို့နယ်၊အမ်းမြို့နယ်၊ဂွမြို့နယ်တို့၌ တိုက်ပွဲများပြင်းထန်နေသည်။
ပဲခူးတိုင်းဘက်မှ ပြည်၊ ရွှေတောင်မြို့နယ်၊ ဧရာဝတီတိုင်းနှင့် ဆက်စပ်မြို့နယ်အချို့၊ မကွေးတိုင်းနှင့် ဆပ်စပ်မြို့နယ်အချို့တို့မှဒေသခံအများသည် ဘေးလွတ်ရာသို့ စတင်တိမ်းရှောင်နေကြသည်။
ရခိုင်ပြည်နယ်ကို သိမ်းယူပြီးပါက AAသည် မဟာမိတ်များ၏မြို့သိမ်းတိုက်ပွဲများတွင် ပါဝင်လာနိုင်ခြေရှိပြီး တိုက်ပွဲများပြင်းထန်လာနိုင်သည်ကို ကြိုတင်သတိပြုကြရန် စစ်ရေးအကဲခတ်များက သတိပေးထားသည်။
