-မိထက် ၊သတိုး/People’s Spring
စစ်ကောင်စီ ကြည်းရေလေညှိနှိုင်းကွပ်ကဲရေးမှူးဗိုလ်ချုပ်ကြီးမောင်မောင်အေး၏ သား မင်္ဂလာဆောင် အခမ်းအနားပြုခဲ့သောနေပြည်တော် MICC2 ခန်းမကို ရှာထူးဝေါ်နည်းပညာတပ်ဖွဲ့ကFixed wing drone ဖြင့်တိုက်ခိုက်ခဲ့ကြောင်း ထုတ်ပြန်သည်။
နိုဝင်ဘာ ၂၅ ရက်က စစ်ကောင်စီ ကြည်း၊ရေ၊လေ ညှိုနှိုင်းကွပ်ကဲရေးမှုး ၏ သား မင်္ဂလာဆောင်ကို MICC2 ၌ပြုလုပ်ရာ စစ်ကောင်စီခေါင်းဆောင်များတတ်ရောက်မည်ဖြစ်ကြောင်းသတင်းရသဖြင့် စနစ်တကျပြင်ဆင်တိုက်ခိုက်ခဲ့ခြင်းဖြစ်သည်ဟု ရှာထူးဝေါ် နည်းပညာအဖွဲ့က နိုဝင်ဘာ ၂၆ ရက်ညတွင် အသိပေးသည်။
အဆိုပါစစ်ဆင်ရေးကို ရှာထူးဝေါ်နည်းပညာတပ်ဖွဲ့၏ Kloud drone အဖွဲ့နှင့် အလယ်ပိုင်းတိုင်းစစ်ဌာနချုပ်၊ နေပြည်တော်စစ်တိုင်းဌာနတို့ ပူးပေါင်းတိုက်ခိုက်ခဲ့ခြင်းဖြစ်ကြောင်းသိရသည်။
Public Service Announcement
“ရှာထူးဝေါ်နည်းပညာတပ်ဖွဲ့၏ ဒရုန်းတိုက်ခိုက်မှုကြောင့် လုံခြုံရေးဆောင်ရွက်နေသော ရဲနှင့်စစ်သားတစ်ချို့ ထိခိုက်သေဆုံးမှုများရှိခဲ့ကြောင်းလည်းသိရသည်။ ထို့ပြင် အခမ်းအနားတက်ရောက်လာကြသော စစ်အုပ်စု ဗိုလ်ချုပ်အချို့မှာလည်း ကြောက်လန့်ထွက်ပြေးကာ ဝရုန်းသုန်းကားဖြစ်ခဲ့ကြောင်း နေပြည်တော်အတွင်းသတင်းရင်းမြစ်များထံမှ ပြန်လည်ကြားသိရသည်။ ” ဟု ရှာထူးဝေါ်နည်းပညာတပ်ဖွဲ့က ထုတ်ပြန်သည်။
နေပြည်တော်မှ စစ်ကောင်စီ ဝန်ထမ်းအချို့က လည်း နိုဝင်ဘာ ၂၅ ရက် နံနက် ၁၀ နာရီခန့်တွင်နေပြည်တော်၊ဇမ္ဗူသီရိမြို့နယ်ရှိ အရာရှိအိမ်ရာထဲသို့ ဒရုန်းအချို့ ဖြင့်တိုက်ခိုက်ခံရကြောင်း ပြောသည်။
စစ်ကောင်စီ ဝန်ထမ်းတစ်ဦးက MICC2 တိုက်ခိုက်ခံရမှုကို ၎င်းမသိဘဲ ဇမ္ဗူသီရိမြို့နယ်ရှိ အရာရှိအိမ်ရာထဲ ဒရုန်းဖြင့်တိုက်ခိုက်ခံရကြောင်းပြောသည်။
အခြားသတင်းရင်းမြစ်တစ်ဦးကလည်း စစ်ကောင်စီညွှန်မှူး၏အိမ်အနီး ဒရုန်းဗုံး ၂ လုံးကျရောက်ပေါက်ကွဲခဲ့ပြီး ထိခိုက်ပျက်စီးမှုအချို့ရှိသည်ဟုပြောသည်။ လူထိခိုက်မှုရှိမရှိကို မပြောပေ။
“သူတို့လိုက်ပိတ်နေတယ်။ သတင်းထွက်သွားရင် ရမ်းနိုင်တယ်”ဟု ၎င်းက ပြောသည်။
ထိုအပြင်အထက်ပါပူးပေါင်းတပ်ဖွဲ့သည် နိုဝင်ဘာ ၅ ရက်ကလည်း အာဏာသိမ်းခေါင်းဆောင် မင်းအောင်လှိုင် တရုတ်ပြည်ခရီးစဉ်ထွက်ခွာချိန်၌ နေပြည်တော်လေဆိပ်သို့ Fixed Wing အသေခံဒရုန်းများဖြင့် တိုက်ခိုက်ခဲ့ရာ ဗိုလ်မှုးတစ်ဦး ၊ဗိုလ်ကြီး တစ်ဦး ၊ တပ်ကြပ်ကြီးတစ်ဦး ၊ တပ်သားနှစ်ဦး ၊လေဆိပ်လုံခြုံရေးနှစ်ဦး စုစုပေါင်း ခုနစ်ဦးသေဆုံးပြီး ၁၁ ဦးဒဏ်ရာရရှိခဲ့သည်ဟု သတင်းထုတ်ပြန်သည်။ သို့သော် လူထုနွေဦးက အဆိုပါတိုက်ခိုက်မှုတွင် စစ်ကောင်စီမှ သေဆုံးထိခိုက်မှုအခြေအနေကို သီးခြားအတည်မပြုနိုင်ပါ။
သို့သော်နိုဝင်ဘာလ၅ရက်နေ့ နံနက်ပိုင်းတွင်စစ်ကောင်စီခေါင်းဆောင်၏ တရုတ်ခရီးစဥ် လေယာဉ်ပျံတက်ပြီး နာရီအနည်းငယ်ကြာတွင် အေလာလေယာဉ်ကွင်းပြေးလမ်း နှင့် ကားလမ်းကြား၌ မိုင်းပေါက်ကွဲမှုဖြစ်ပွားခဲ့သည်ဟု People’s Spring ၏သတင်းရင်းမြစ်အချို့ကပြောသည်။ စစ်ကောင်စီ ဝါဒဖြန့် တယ်လီဂရန် ချန်နယ်များတွင် လေဆိပ်ကိုတိုက်ခိုက်လာသောအသေခံဒရုန်းများကို ပစ်ချနိုင်ခဲ့သည်ဟု ဝါဒဖြန့်ချီဖော်ပြခဲ့ကြသည်။
