ဒီးဒီ/People’s Spring
အာဏာသိမ်းခေါင်းဆောင်မင်းအောင်လှိုင်တက်ရောက်မည့် စစ်တက္ကသိုလ်(DSA)ကျောင်းဆင်းပွဲပြုလုပ်မည့်ရက်နီးကပ်လာချိန်တွင် နောင်ချိုနှင့် ပြင်ဦးလွင်မြို့နယ်ကြားဖြစ်ပွားနေသော တိုက်ပွဲများမှာ ပြင်ဦးလွင်မြို့နှင့် တဖြည်းဖြည်းနီးကပ်လာနေပြီ ဖြစ်သည်။
စစ်တက္ကသိုလ်များရှိရာ ပြင်ဦးလွင်မြို့နှင့် (၁၆)မိုင်ခန့်သာဝေးသော ဘန့်ဘွေးကျေးရွာအနီးသို့ပါ တော်လှန်ရေးတပ်ဖွဲ့များက ရှေ့တိုး တိုက်ခိုက်လာခြင်း ဖြစ်ကြောင်း စုံစမ်းသိရသည်။
ပြည်သူ့ကာကွယ်ရေးတပ်မတော်(မန္တလေး) အပါအဝင် တော်လှန်ရေးတပ်ဖွဲ့များသည် ပြီးခဲ့သည့်ရက်ပိုင်းအထိ ရှမ်းပြည်နယ်မြောက်ပိုင်း နောင်ချိုမြို့နယ်၊ အုမ္မသီးကျေးရွာလမ်းခွဲဝန်းကျင်၌သာ ရှိနေရာ ဒီဇင်ဘာ ၂ရက်နှင့် ၃ရက် နှစ်ရက်ဆက်တိုက်ပွဲဖြစ်ပြီးနောက် အုမ္မသီးကျေးရွာမှ ဘန့်ဘွေးကျေးရွာအနီးတွင်ပါ တိုက်ပွဲများဖြစ်ပွားလာခြင်းဖြစ်သည်ဟု ဘန့်ဘွေးရွာခံများက ပြောသည်။
Public Service Announcement
ဘန့်ဘွေးနှင့် အုမ္မသီးကျေးကျေးရွာသည် သုံးမိုင်ကျော်ကွာဝေးပြီး မန္တလေး−လားရှိုးလမ်းမကြီးဘေးတွင်ရှိသည်။
ဒီဇင်ဘာ ၂ ရက်က အဆိုပါနယ်မြေအတွင်း တနေကုန်နီးပါး တိုက်ပွဲပြင်းထန်ခဲ့ပြီး ဒီဇင်ဘာ ၃ရက်တွင်မနက်ပိုင်းတွင် တိုက်ပွဲဖြစ်ခဲ့သည်ဟု ဘန့်ဘွေးရွာခံများက ပြောသည်။
“ဒီဘက်(တော်လှန်ရေးတပ်များ)က ရှေ့တိုးလာတယ်။ဒီနေ့တော့တိုက်ပွဲငြိမ်နေတယ်”ဟု ဘန့်ဘွေးရွာခံတစ်ဦးက ပြောသည်။
နောင်ချိုမြို့နယ် ဘန့်ဘွေးကျေးရွာအုပ်စုရှိ ဂန့်ဂေါကျေးရွာအနီးတွင်မူ တအာင်းတပ်မတော်(TNLA)၊မန္တလေး PDF ပူးပေါင်းတပ်များနှင့် စစ်ကောင်စီတပ်တို့သည် အောက်တိုဘာ ၁၉ရက်ကတည်းက စတင်တိုက်ပွဲ ဖြစ်ပွားခဲ့သည်။ တိုက်ပွဲများဆက်တိုက်ဖြစ်ပြီးနောက် စစ်ကောင်စီတပ်က တဖြည်းဖြည်းရှေ့တိုးလာခဲ့ခြင်းဖြစ်သည်။
တိုက်ပွဲများဖြစ်ပွားသည့်ရက်က ပြင်ဦးလွင်မြို့ရှိ စစ်ကောင်စီတပ်က လက်နက်ကြီးများဖြင့် ပစ်ကူပေးခဲ့သည်ဟု ပြင်ဦးလွင်မြို့ခံအချို့က ပြောသည်။
ပြင်ဦးလွင်မြို့အရှေ့တောင်ဘက်၌ရှိသည့် နောင်ချိုမြို့နယ် တောင်းခမ်းကျေးရွာတွင်လည်း တိုက်ပွဲများဆက်လက်ဖြစ်ပွားနေသည်။
လာမည့် ဒီဇင်ဘာ ၆ရက်တွင် ပြုလုပ်ရန်စီစဉ်နေသည့် ပြင်ဦးလွင်မြို့ရှိ စစ်တက္ကသိုလ်(DSA)နှင့် တပ်မတော်နည်းပညာတက္ကသိုလ်(DSTA) သင်တန်းဆင်းပွဲကို စစ်ခေါင်းဆောင်မင်းအောင်လှိုင် တက်ရောက်မည်ဟု စစ်ကောင်စီတပ် အသိုင်းအဝိုင်းမှ သိရသည်။
၎င်းလာရောက်မည့်အချိန်တွင် ပြင်ဦးလွင်မြို့အနီး ဝန်းကျင်၌ တိုက်ပွဲများဖြစ်ပွားနေခြင်း ဖြစ်သည်။ ထို့ကြောင့် စစ်ကောင်စီက နိုဝင်ဘာလနောက်ဆုံးပတ်ကစပြီး သံချပ်ကာတပ်များခေါ်ယူပြီး ပြင်ဦးလွင်မြို့ဝန်းကျင်ကို လုံခြုံရေးချထားကြောင်း အဆိုပါမြို့ခံများက ပြောသည်။
DSA နှင့် DSTA ကျောင်းဆင်းပွဲမှာ ပုံမှန် ဒီဇင်ဘာပထမအပတ်အတွင်း ပြုလုပ်လေ့ရှိသည်ဟု ပြင်ဦးလွင်မြို့ခံများက ပြောသည်။
စစ်တပ်အာဏာသိမ်းပြီးနောက် ပြင်ဦးလွင်ကျောင်းဆင်းပွဲပြုလုပ်မည့်ရက်ကို အတိအကျထုတ်ဖော်ပြောဆိုလေ့မရှိတော့ဘဲ သတင်းလွှင့်ထားသည့်ရက်ထက် နောက်ဆုတ်ပြုလုပ်လေ့ရှိသည်ဟု မြို့ခံများက ပြောသည်။
ယခုနှစ်ပြုလုပ်မည့် ကျောင်းဆင်းပွဲမှာ ပြီးခဲ့သည့်နှစ်ထက် ပိုမိုလုံခြုံရေးတင်းကြပ်ထားသည်ဟု မြို့ခံများက ပြောသည်။
သို့သော် ၂၀၂၄ ဧပြီ ၈ရက်တွင် အာဏာသိမ်းခေါင်းဆောင်နှင့် ဇနီး ပြင်ဦးလွင်ရောက်နေချိန်တွင် PDF များက စစ်တက္ကသိုလ်အပါအဝင် စစ်ရေးပစ်မှတ်များကို ရှော့တိုက်ဒုံးဖြင့် တိုက်ခိုက်ရာ မင်းအောင်လှိုင်မှာပြန်သွားခဲ့ပြီး ဒေါ်ကြူကြူလှသာ တပ်တွင်းသင်္ကြန်ပွဲသို့ တက်ရောက်ခဲ့သည်။
