အိမ်သွင်/People’s Spring
စစ်ကောင်စီနှင့် ဝ တပ်ဖွဲ့ထိန်းချုပ်ထားသည့် ရှမ်းပြည်နယ်မြောက်ပိုင်း တန့်ယန်းမြို့တွင် ကျားဖျန့် ငွေလိမ်လုပ်ငန်းအများအပြားရှိနေပြီး ထိန်းချုပ်နိုခြင်းမရှိကြောင်း မြို့ခံများက ပြောသည်။
တန့်ယန်းမြို့နယ်၊ နောင်ဟီးကျေးရွာမှ နေအိမ်တစ်လုံးတွင် ကျားဖြန့်လုပ်ငန်းလုပ်ကိုင်နေသူ ၄၅ဦးဖမ်းမိကြောင်း စစ်ကောင်စီက ယနေ့(ဒီဇင်ဘာ ၆ရက်) ထုတ်ပြန်ထားပြီး ယင်းသတင်းသည် မြေပြင်အခြေအနေကိုမထင်ဟပ်ကြောင်း မြို့ခံတစ်ဦးက ပြောသည်။
” တန့်ယန်းမှာ ကျားဖြန့်တွေ များမှများပဲ။ ဒါကို မျက်နှာလွှဲထားပြီး အနည်းအကျဉ်းပဲ ဖမ်းပြနေတာ။ ၀(UWSA)လည်း သိတယ်။ စစ်တပ်လည်း သိတယ်”ဟု တန့်ယန်းမြို့ခံတစ်ဦးက ပြောသည်။
Public Service Announcement
ကျားဖြန့်လုပ်ကိုင်နေသူ တရုတ်နိုင်ငံသား ၁၈ ဦးနှင့် မြန်မာနိုင်ငံသား ၂၇ ဦးကို ဒီဇင်ဘာ ၂ ရက်ကဖမ်းဆီးခဲ့ခြင်းဟု စစ်ကောင်စီက ထုတ်ပြန်ထားသည်။
လက်ရှိတွင် တန့်ယန်းမြို့ကို စစ်ကောင်စီတပ်ရော ဝတပ်ဖွဲ့ကပါ ထိန်းချုပ်ထားသည်။ မူလက စစ်ကောင်စီသာ အုပ်ချုပ်နေရာမှ ပြီးခဲ့သည့်ဇွန်လက MNDAA၏ ၁၀၂၇ စစ်ဆင်ရေးကာလအတွင်း လားရှိုးမြို့တိုက်ခိုက်သိမ်းပိုက်နေစဉ် ဒေသချင်းဆက်စပ်နေသော တန့်ယန်းမြို့ကို ဝ ကဝင်ရောက်တပ်စွဲခဲ့သည်။ ထို့နောက်ပိုင်း၌ စစ်ကောင်စီတပ်ရော ဝတပ်ဖွဲ့ကပါ ထိန်းချုပ်ထားသည်ဟု ဒေသခံများက ပြောသည်။
ပြီးခဲ့သည်နိုဝင်ဘာကလည်း တန့်ယန်းမြို့မှ ကျားဖြန့်လုပ်ငန်းများနှင့် ဆက်စပ်သူ လူဦးရေ တစ်ထောင်ကျော်ကို ၀တပ်ဖွဲ့က ဖမ်းဆီးခဲ့ပြီး ယင်းတို့အထဲမှ တရုတ်နိုင်ငံသား ၇၆၂ ဦးကို တရုတ်အစိုးရထံ လွှဲပြောင်းပေးခဲ့သည်။ထိုသို့ လွှဲပြောင်းစဉ်က ရှမ်းပြည်နယ်မြောက်ပိုင်းတွင် ကျားဖြန့်လုပ်ငန်းများနှိမ်နှင်းနိုင်ပြီးစီးပြီဟု တရုတ်ရဲတပ်ဖွဲ့က ထုတ်ပြန်ခဲ့သည်။
သို့သော် စစ်ကောင်စီနှင့် ၀ တပ်ဖွဲ့ထိန်းချုပ်ထားသည့် တန့်ယန်းတွင် ကျားဖြန့်လုပ်ငန်းများထပ်မံဖမ်းမိခြင်းဖြစ်ပြီး အများအပြားနဲ့ကျန်ရှိနေသေးကြောင်း ဒေသခံများက ပြောသည်။
” နိုင်ငံရေးကစားကြတာမှာ တန့်ယန်းလည်း ဘယ်ခွေးအဖေခေါ်ရမှန်းမသိတာ။ ၀ ကအုပ်ချုပ်သလိုလို၊ စစ်တပ်ကအုပ်ချုပ်သလိုလိုနဲ့။ ဒီကြားထဲမှာ တန့်ယန်းမှာက ကျားဖြန့်တွေ များလာတယ်။ လူစုံလာတယ်”ဟု မြို့ခံတစ်ဦးက ပြောသည်။
ရှမ်းပြည်နယ်မြောက်ပိုင်းရှိ တန့်ယန်းအပြင် မူဆယ်မြို့နယ်၊ ကရင်ပြည်နယ်မှ BGFနှင့် DKBA ထိန်းချုပ်ဒေသများ၊ ရှမ်းပြည်နယ်အရှေ့ပိုင်းမှ တာချီလိတ်မြို့နယ်၊ မိုင်းဆတ်မြို့နယ်နှင့် ရန်ကုန်မြို့တို့တွင်လည်း ကျားဖြန့်လုပ်ငန်းများရှိနေကြောင်း ဒေသခံသတင်းရင်းမြစ်များက ပြောသည်။
