ထားမြတ်/People’s Spring
ကချင်လွတ်မြောက်ရေးတပ်မတော်(KIA)နှင့် မဟာမိတ်တပ်များက ဗန်းမော်မြို့သိမ်းတိုက်ပွဲဆင်နွှဲလျက်ရှိရာ ၆ ရက်မြောက်နေ့ဖြစ်သောယနေ့(ဒီဇင်ဘာ ၉ရက်)တွင်လည်းထိုးစစ်ဆင်တိုက်ခိုက်လျက်ရှိကြောင်း စစ်ရေးသတင်းရင်းမြစ်အချို့ကပြောသည်။
KIA သည်ဒီဇင်ဘာ ၄ရက်မှ၍ ကချင်ပြည်နယ်၏ ဒုတိယမြို့တော် ဗန်းမော်မြို့ကိုသိမ်းပိုက်ရန် ထိုးစစ်ဆင်တိုက်ခိုက်နေခြင်းဖြစ်သည်။
ဒီဇင်ဘာ ၈ရက်နေ့တွင် ဗန်းမော်မြို့တွင်း နှင့် မြို့ပြင်တွင်တိုက်ပွဲများဆက်လက်ပြင်းထန်းခဲ့ပြီးတော်လှန်ရေးတပ်များက လက်နက်ခဲယမ်းများ သိမ်းဆည်းရခဲ့ကြောင်း စစ်ရေးသတင်းရင်းမြစ်အချို့က ပြောသည်။
Public Service Announcement
ဗန်းမော် ရဲစခန်း၊ ဌာနဆိုင်ရာ စုပေါင်းရုံး နှင့် စစ်ကောင်စီတပ်ဖွဲ့များ နေရာယူထားသည့် ဟိုတယ်များအနီး တိုက်ပွဲများပြင်းထန်ခဲ့သည်။စစ်ကောင်စီတပ်ရင်းဌာနချုပ်များအပြင် မြို့တွင်း၌ စစ်ကောင်စီတပ်ဖွဲ့ဝင်များကျန်ရှိနေသေးသည်ဟုစစ်ရေးသတင်းရင်းမြစ်တဦးကပြောသည်။
ဗန်းမော်မြို့သိမ်းတိုက်ပွဲတွင် စစ်ကောင်စီက လေကြောင်း၊ လက်နက်ကြီး ပစ်ကူ အများအပြား အသုံးပြုခုခံနေပြီး KIAဘက်ကလည်း လက်နက်ကြီးများဖြင့် ပစ်ခတ်တိုက်ခိုက်နေကြောင်း သတင်းရင်းမြစ်က ပြောသည်။
ဗန်းမော် စကခ (၂၁) တပ်ရင်းဌာနချုပ်သို့ KIAက လက်နက်ကြီးဖြင့် ပစ်ခတ်တိုက်ခိုက်နေသည့် ရုပ်သံမှတ်တမ်းကိုလည်း သတင်းရင်းမြစ်က လူမှုကွန်ရက်၌ ဖော်ပြ အသိပေးသည်။
KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ဗန်းမော်တွင် တိုက်ပွဲဆက်ရှိနေကြောင်း ဒီဇင်ဘာ ၈ ရက်တွင်ပြောခဲ့သည်။သို့သော် တိုက်ပွဲသတင်းအသေးစိတ်အခြေအနေများ မတင်းမရသေးဟု ဒီဇင်ဘာ ၈ရက်မနက်က ပြောကြားထားသည်။
ဗန်းမော်မြို့သိမ်းတိုက်ပွဲနှင့်အတူ မံစီရှိ စစ်ကောင်စီ လက်ကျန် တပ်ရင်းအချို့ကို KIAက တိုက်ခိုက်နေသည်။ မိုးမောက်ဘက်သို့ ထိုးစစ်ဆင်ရန်ရောက်ရှိနေသည့် စစ်ကောင်စီတပ်များကိုလည်း မိုးမောက်-ဗန်းမော်ကြားတွင် KIAက ပိတ်ဆို့တိုက်ခိုက်၍ စစ်ကောင်စီတပ်များ ပြန်လည်ဆုတ်ခွာခဲ့ရပြီး စစ်ကောင်စီတပ်ဖွဲ့ဝင်များ သေဆုံး၊ ဖမ်းဆီးခံရမှုများ ရှိနေကြောင်း စစ်ရေးသတင်းရင်းမြစ်က အသိပေးထားသည်။
