ကျော်ဇော/People’s Spring
ပဲခူးတိုင်း၊ ဖြူးမြို့နယ်၊ ဇေယျဝတီမြို့အရှေ့ဘက်သို့ ကင်းပုန်းလာဝပ်သည့် စစ်ကောင်စီတပ်စိပ်တစ်ခုကို အလစ်အငိုက် တိုက်ခိုက်ခဲ့ကြောင်း ဖြူးမြို့နယ်ပြည်သူ့ကာကွယ်ရေးအဖွဲ့မှ တာဝန်ရှိသူတစ်ဦးက ပြောသည်။
ယမန်နေ့(ဒီဇင်ဘာ ၁၀ ရက်)ည ၇ နာရီ ၄၀မိနစ်ခန့်က ဇေယျဝတီမြို့၊ လေးအိမ်စုကျေးရွာ အနောက်ဘက်၌ ကင်းပုန်းလာဝပ်သည့် အင်အား ၂၅ ဦးခန့်ပါ စစ်ကောင်စီတပ်ကို ဖြူးမြို့နယ်(ပကဖ)ရဲဘော်များမှ လက်ဦးမှုယူ ပစ်ခတ်တိုက်ခိုက်ခဲ့ခြင်း ဖြစ်သည်။
“တော်လှန်ရေးရဲဘော်တွေ ရှိတယ်ကြားလို့ လာ(ကင်းပုန်း)ဝပ်ကြတာပါ။ အင်အား ၂၅ လောက်တော့ရှိမယ်။ ပစ်ခတ်ချိန် ၁၂ မိနစ်လောက်ပဲ ကြာပါတယ်”ဟု ဖြူးမြို့နယ်(ပကဖ)မှ တာဝန်ရှိသူတစ်ဦးက ပြောသည်။
Public Service Announcement
ပစ်ခတ်ခံရမှုကြောင့် စစ်ကောင်စီတပ်သားများ ချောင်းရိုးအတိုင်း ခင်ဝိုင်းရွာဘက်သို့ ကစဉ့်ကလျား ပစ်ခတ်ဆုတ်ခွာထွက်ပြေးသွားရာ ကျွန်းတောကုန်းရွာလမ်းထိပ် ဇရပ်အထိ ပကဖရဲဘော်များမှ လိုက်လံပစ်ခတ်ခဲ့သည်ဟု ၎င်းက ဆက်ပြောသည်။
“ထိခိုက်မှု အတိအကျကတော့ မသိရသေးပါဘူး”ဟု ဖြူးမြို့နယ်(ပကဖ)တာဝန်ရှိသူက ရှင်းပြသည်။
လက်ရှိအခြေအနေတွင် နယ်မြေရှင်းလင်းရေးလုပ်ဆောင်ခဲ့သော်လည်း စစ်ကောင်စီတပ်သားများ၏ ထိခိုက်မှုအခြေအနေအား နယ်မြေအနေအထားအရ စုံစမ်းနေဆဲဖြစ်ကြောင်း ဖြူးမြို့နယ်(ပကဖ)က အသိပေးထားသည်။
