မေ/People’s Spring
မန္တလေး − မုံရွာလမ်းပိုင်းမှာ စစ်တပ်က ဒီနေ့ မနက်ပိုင်းမှာ လမ်းသွားလာနေတဲ့ပြည်သူတွေရဲ့ကားတွေကိုဖမ်းဆီးပြီး မိုင်းရှာခိုင်းတယ်လို့ ကြုံတွေ့လာရတဲ့သူတွေက ပြောပါတယ်။
ဒီဇင်ဘာ ၁၃ရက် ဒီနေ့မနက် ၈နာရီကျော်လောက်က မန္တလေး-မုံရွာလမ်းပိုင်းမှာ ခင်မွန်ကျေးရွာကနေ ပရစ်ကုန်းအထိကို ခရီးသွားလာနေတဲ့ပြည်သူတွေရဲ့ကားတွေကို ရပ်ခိုင်းပြီး လူတွေကို လမ်းလျှောက်ကာ မိုင်းရှာခိုင်းခဲ့တာလို့သိရပါတယ်။
“အိမ်စီးကားတွေရော၊ခရီးသည်တင်ကားတွေရော အကုန်ဆင်းရှာရတာ။ချုံပုတ်တွေကြားထဲလည်းတုပ်နဲ့ထိုးရှာရတယ်။ဘာအကာကွယ်မှမပါဘူး။မတွေ့လို့တော်သေးတာပေါ့” လို့ ရှာဖွေခဲ့ရတဲ့လူငယ်တစ်ဦးက ပြောပါတယ်။
Public Service Announcement
မနက် ၈နာရီကျော်ကနေ ၁၀နာရီကျော်အထိ လမ်းလျှောက်ရှာဖွေပေးခဲ့ရတာလို့သူက ဆက်ပြောပါတယ်။
မန္တလေး-မုံရွာလမ်းပေါ်က မြပုလဲဆီဆိုင်မှာတပ်စွဲထားတဲ့ စစ်တပ်က ယခုလို ပြည်သူတွေကို မိုင်းရှာခိုင်းခဲ့တာလို့ သိရပါတယ်။
ဒီလမ်းမှာ စစ်ကားတွေမိုင်းဆွဲခံရတာတွေရှိပြီးတဲ့နောက် စစ်တပ်ဟာ ယခုလိုပြည်သူတွေကိုမိုင်းရှာဖွေခိုင်းတာတွေပြုလုပ်နေပြီး ပြီးခဲ့တဲ့လတွေမှာမိုင်းပေါက်ကွဲပြီးသေဆုံးသူတွေရှိခဲ့သေးတယ်လို့ ဒေသခံတွေက ပြောပါတယ်။
