မက်ကစံ/People’s Spring
ကော့သောင်းရေပိုင်နက်အတွင်းမှာ ဖမ်းဆီးခံထားရတဲ့ ထိုင်းရေလုပ်သားလေးဦးကို စစ်ကောင်စီရဲ့ ကော့သောင်းမြို့နယ်တရားရုံးက ထောင်ဒဏ်လေးနှစ်စီ ကျခံစေရန် အမိန့်ချမှတ်လိုက်ပါတယ်။
ဒီဇင်ဘာ ၁၆ရက်နေ့မှာ ထိုင်းရေလုပ်သားလေးဦးကို ထောင်ဒဏ်လေးနှစ်စီအမိန့်ချမှတ်ပြီး မြန်မာရေလုပ်သား ၂၇ဦးကို ထောင်ဒဏ်တစ်နှစ်စီအမိန့်ချမှတ်ခဲ့တာလို့ ကော့သောင်းမြို့တရားရုံးနဲ့ နီးစပ်သူက ပြောပါတယ်။
“ထိုင်းလေးယောက်ကို လေးနှစ်စီနဲ့ မြန်မာရေလုပ်သားတွေကို တစ်နှစ်စီချလိုက်တယ်”လို့ ၎င်းက ပြောပါတယ်။
Public Service Announcement
ဒါ့အပြင် ထောင်ဒဏ်လေးနှစ်အမိန့်ချမှတ်ခံရတဲ့ ထိုင်းရေလုပ်သား လေးဦးကို လာမယ့်ဒီဇင်ဘာ ၂၉ရက်နေ့မှာ နှစ်နိုင်ငံချစ်ကြည်ရေးအရ လွှဲပြောင်းပေးပို့မယ်လို့လည်း သဘောတူညီမှုရထားတယ်လို့ ၎င်းက ဆက်ပြောပါတယ်။
“၂၉ရက်နေ့မှာ ထိုင်းကာကွယ်ရေးက ဒုဝန်ကြီးလာပြီး ခေါ်မယ်ပြောတယ်”လို့ ၎င်းက ပြောပါတယ်။
ထိုင်းငါးဖမ်းသမား ၄ဦးဖမ်းဆီးထားမှုနဲ့ပတ်သက်လို့ ထိုင်းဝန်ကြီးချုပ်ပေထုမ်တန်က မြန်မာစစ်ကောင်စီဒုဝန်ကြီးချုပ်နဲ့ ထိုင်းနိုင်ငံဆိုင်ရာ စစ်ကောင်စီရဲ့မြန်မာသံအမတ်တို့နဲ့ ဆက်သွယ်ပြောဆိုမှုပြလုပ်ခဲ့ပြီး ဥပဒေကြောင်းအရလုပ်ငန်းစဥ်များကြောင်း နှောင့်နှေးကြန့်ကြာနေတဲ့အကြောင်းနဲ့ အခြားကိစ္စရပ်မရှိဘူးလို့ မြန်မာစစ်ကောင်စီဘက်က ပြောဆိုခဲ့တယ်လို့ ထိုင်းသတင်းဌာနအချို့က ဆိုပါတယ်။
ထိုင်းငါးဖမ်းသမား ၄ဦးအရေးနဲ့ပတ်သက်လို့ စိုးရိမ်ပူပန်ကြောင်း ထိုင်းဝန်ကြီးချုပ်က စစ်ကောင်စီသံအမတ်ကို ပြောဆိုခဲ့ပြီး အမြန်ဆုံးပြန်လည်လွတ်မြောက်စေလိုတယ်လို့ ပြောကြားခဲ့ကြောင်း ကာကွယ်ရေးဌာနပြောခွင့်ရသာနာထစ်က ပြောထားပါတယ်။
ထိုင်းနိုင်ငံခြားရေးဝန်ကြီး မာရစ်ဟာ သီတင်းနှစ်ပတ်ကြာ စစ်ကောင်စီ ဖမ်းဆီးမှုခံထားရတဲ့ ငါးဖမ်းသမား ၄ဦးလွတ်မြောက်ရေးအတွက် စစ်ကောင်စီတာဝန်ရှိသူတွေနဲ့ ဒီဇင်ဘာ ၁၉ ရက်မှာတွေ့ဆုံဖို့ စီစဥ်ထားပါတယ်။
ပြီးခဲ့တဲ့ နိုဝင်ဘာ ၃၀ရက်က မြန်မာရေပိုင်နက်ထဲမှာ ထိုင်းငါးဖမ်းစက်လှေတွေကို တွေ့ရှိခဲ့ပြီး ငါးဖမ်းစက်လှေတစ်စင်းကို စစ်ကောင်စီရေတပ်က ပစ်ခတ်ဖမ်းဆီးခဲ့ပါတယ်။ ထိုင်းငါးဖမ်းစက်လှေပေါ်ပါ ထိုင်းနိုင်ငံသား ၄ဦးနဲ့ မြန်မာနိုင်ငံသား ငါးဖမ်းသမား ၂၇ဦးကို ဖမ်းဆီးနိုင်ခဲ့ပြီး ထိုင်းနိုင်ငံသားတစ်ဦးမှာ စက်လှေပေါ်မှ ခုန်ချသွားပြီး သေဆုံးခဲ့ပါတယ်။
မကြာသေးမီက ဒေသတွင်းသတင်းရင်းမြစ်များအရ ငါးဖမ်းသမားများကို ရနောင်းတဖက်ကမ်းရှိ ကော့သောင်းမြို့မှာ ရွှေ့ပြောင်းထိန်းသိမ်းထားတယ်လို့ သိရပါတယ်။
အစောပိုင်းက ထိုင်းနိုင်ငံသား ၄ဦးကို ဒီဇင်ဘာ ၆ရက်မှာ ပြန်လွှတ်ပေးမယ်လို့ သတင်းတွေထွက်ပေါ်ခဲ့ပေမယ့် စစ်ကောင်စီက လွှတ်မပေးပဲ ဆက်လက်ဖမ်းဆီးချုပ်နှောင်ထားတာဖြစ်ပါတယ်။
