ရဲခေါင်/People’s Spring
ယခု ဒီဇင်ဘာလအတွင်း ဘက်ပြောင်းအလင်းဝင်လာသည့် စစ်ကောင်စီတပ်သား ၂၀ ကျော်ရှိကြောင်း ကရင်နီအမျိုးသားများကာကွယ်ရေးတပ်(KNDF) CDM ဌာနမှူး မင်းသားက ပြောသည်။
စစ်ကောင်စီတပ်ဖွဲ့ဝင်များအဖြစ်မှ အလင်းဝင် ရောက်၍ လုံခြုံအေးဆေးစွာစောင့်ရှောက်ထားသော ဘတ်ပြောင်းလာသူများ၏အခြေအနေအချို့ကို KNDFက ဒီဇင်ဘာ ၂၁ ရက်တွင် ၁၈ မိနစ်ကျော်ကြာရုပ်သံဖြင့် ထုတ်ပြန်ရာတွင် ဌာနမှူးမင်းသားက အထက်ပါအတိုင်း အသိပေးခဲ့သည်။
“ဒီဇင်ဘာတစ်လတည်းမှာကို ကျွန်တော့်တို့ဆီကို ဘက်ပြောင်းလာတဲ့သူ အယောက် ၂၀ ကျော်သွားပါပြီ။အခုနောက်ပိုင်းက ပစ(စစ်ကောင်စီတပ်ထဲ ပြည်သူ့စစ်မှုထမ်းဥပဒေဖြင့် ဝင်ရောက်ခဲ့ရသူ) တွေ များတယ်။ကျွန်တော်တို့နဲ့အတူ အားလုံးပေါင်း စာရင်းဝင်နေတာက အယောက်၄၀ ကျော် ရှိတယ်”ဟု ၎င်းက ပြောသည်။
Public Service Announcement
စစ်ကောင်စီထံမှ ဘက်ပြောင်းလာသူများ၏ လုံခြုံရေးကို အထူးအာမခံပြီး အထူးသဖြင့် မြေပြင်တိုက်ခိုက်ရေး(သို့မဟုတ်) ဆန္ဒမပါဘဲ တိုက်ပွဲသို့ လုံးဝခေါ်ဆောင်ခြင်းမပြုဟုလည်း ကတိပြုသည်။
“သတ်မှတ်စောင့်ကြည့်ကာလတစ်ခု စောင့်ကြည့်တယ်။အဲဒီကာလမှာပဲ သူတို့နဲ့ကျွန်တော်တို့ အချင်းချင်းယုံကြည်မှုတည်ဆောက်တယ်။ရင်းနှီးမှုတည်ဆောက်တယ်။အဲဒီလိုနဲ့ပဲ ကာလတစ်ခုကျော်သွားမှ တပ်(KNDF)ရဲ့ ဘယ်ဌာနကိုသွားချင်လဲ။ဘာတာဝန် ထမ်းဆောင်ချင်လဲ။ဘယ်ဌာနမှ မသွားချင်ဘူး။ဘယ်တာဝန်မှမထမ်းဆောင်ချင်ဘူးဆိုရင်လည်း ကျွန်တော်တို့ဌာနမှာပဲအေးအေးဆေးဆေးနေလို့ရတယ်”ဟု KNDF CDM ဌာနမှူးက ရှင်းပြသည်။
ရုပ်သံဖိုင်မှတ်တမ်းတွင်လည်း ဘက်ပြောင်းလာသူများသည် စစ်ကောင်စီ၏ဝါဒဖြန့်သလိုမဟုတ်ဘဲ KNDF၏ ကောင်းမွန်စွာစောင့်ရှောက်မှုရှိကြောင်း ပြောတိုသည်ကို တွေ့ရသည်။
“ကျန်နေသေးတဲ့ စစ်ကောင်စီတပ်သားတွေကိုလည်းဖိတ်ခေါ်ပါတယ်။ကြိုဆိုပါတယ်။လာချင်တယ်လို့ ပြောရင် နည်းအမျိုးမျိုးနဲ့ကြိုးစားကြပါ။ရှေ့တန်းစစ်မျက်နှာပြင်အထိ ကျွန်တော်တို့ဘက်က ကယ်ထုတ်တာတွေလုပ်နေပါတယ်။လူ့အခွင့်အရေးနဲ့အညီ မိသားစုနဲ့ပြန်ဆုံနိုင်ဖို့ အစီအစဥ်တွေကိုလည်း အတက်နိုင်ဆုံးလုပ်ဆောင်နေတယ်။CDM လုပ်ပြီဆိုရင် တော်လှန်ရေးတပ်ဖွဲ့တွေက သတ်မယ်ဖြတ်မယ်ဆိုတာတွေကျွန်တော်တို့ တခါမှမလုပ်ဖူးပါဘူး”ဟု မင်းသားက ပြောသည်။
၂၀၂၄နှစ်လယ်ပိုင်းအထိ ကရင်နီပြည်သူ့ရင်ခွင် ၏အချက်အလက်များအရ စစ်တပ် အာဏာသိမ်းပြီးနောက်ပိုင်း ကရင်နီပြည်နယ်၌ CDM ပြုလုပ်ထားသည့် ရဲတပ်ဖွဲ့ဝင် ၃၀၀ကျော်ရှိပြီး စစ်ကောင်စီတပ်သား ၁၅၀ကျော်ရှိကြောင်းသိရသည်။
