“၂၀၂၅ ခုနှစ်တွင် မင်းအောင်လှိုင်နှင့် စစ်အုပ်စုကို အပြီး သတ်ဖြတ်ဖယ်ရှားနိုင်ဖို့ ကျနော်တို့ တိုင်းရင်းသားတော်လှန်ရေး လက်နက်ကိုင်အဖွဲ့အစည်းအားလုံးနဲ့ နိုင်ငံရေးအင်အားစုများအနေဖြင့် နိုင်ငံရေး စစ်ရေးအရ ပူးပေါင်းဆောင်ရွက်မှုကို ယခုထက်ပိုပြီးလက်တွေ့ပြသဖို့ အချိန်တန်ပြီလို့မြင်ပါတယ်” – ယာယီသမ္မတ ဒူဝါလရှီးလ
ဟန်နွေ/People’s Spring
အမျိုးသားညီညွတ်ရေးအစိုးရ (NUG)အနေဖြင့် သက်ဆိုင်ရာ ဝန်ကြီးဌာနအလိုက်ပြုပြင် ပြောင်းလဲမှုများ လုပ်ဆောင်သွားမည်ဖြစ်ကြောင်း ယာယီသမ္မတ ဒူဝါလရှီးလက အသိပေးခဲ့ပြီး အစိုးရအဖွဲ့ တည်ဆဲအခြေအနေထက် ပိုမိုကျယ်ပြန့်စွာဦးဆောင်နိုင်မည့်သူများ လိုအပ်နေ၍ အစားထိုးတာဝန်ယူနိုင်သူများကို လွှဲပြောင်းပေးရန်အသင့်ရှိကြောင်း ဖိတ်ခေါ်လိုက်သည်။
ယနေ့ ယာယီသမ္မတက နှစ်သစ်ကူးမိန့်ခွန်းပြောကြားရာတွင် ယခုကဲ့သို့ ပြောကြားခဲ့ခြင်းဖြစ်သည်။
လူထု၏တာဝန်ပေးချက်အရ တော်လှန်ရေး တာဝန်များကို ထမ်းဆောင်နေရသည့် အမျိုးသားညီညွတ်ရေးအစိုးရ အနေဖြင့် ရာထူးထိုင်ခုံနေရာများကိုဖက်တွယ်ခြင်း မဟုတ်သကဲ့သို့ အစိုးရ အခန်းကဏ္ဍကို တိုးချဲ့ခြင်းမဟုတ်ကြောင်း ယာယီသမ္မတက ရှင်းလင်းသည်။
Public Service Announcement
” ဒါကြောင့် အစိုးရအဖွဲ့ထဲမှာ ယခုတည်ဆဲအခြေအနေထက် ပိုမိုကျယ်ပြန့်စွာ ဦးဆောင်မယ့်သူတွေကို လိုအပ်နေပါတယ်။ အကယ်၍ တည်ဆဲရာထူးနေရာတွေမှာ အစားထိုးတာဝန်ယူနိုင်သူတွေရှိရင်လည်း ကျနော်တို့က ပခုံးထမ်းလွှဲပြောင်းပေးအပ်ဖို့ အမြဲအသင့်ရှိကြောင်း လူထုကို အသိပေးစေချင်ပါတယ်။အဲဒီအတွက်ကျနော်တို့ဟာ အမြဲလမ်းဖွင့်ထားကြောင်းလည်း ပြောချင်ပါတယ်”ဟု ယာယီသမ္မတက ပြောသည်။
လူထုအတွက်တော်လှန်ရေးတာဝန်များ စွမ်းစွမ်း တမံ ထမ်းဆောင်နိုင်မည့် ခေါင်းဆောင်များကို လှိုက်လှဲစွာ ကြိုဆိုနေသည်ဟုလည်း ထပ်လောင်း ပြောကြားသည်။
“ကျနော်တို့နဲ့အတူ လူထုတာဝန်တွေကိုထမ်းဆောင်ဖို့ လေးစားစွာ ဖိတ်ခေါ်ချင်ပါတယ်။ဒါကြောင့် ၂၀၂၅ ခုနှစ်တွင် မင်းအောင်လှိုင်နှင့် စစ်အုပ်စုကို အပြီး သတ်ဖြတ်ဖယ်ရှားနိုင်ဖို့ ကျနော်တို့ တိုင်းရင်းသားတော်လှန်ရေး လက်နက်ကိုင်အဖွဲ့အစည်းအားလုံးနဲ့ နိုင်ငံရေးအင်အားစုများအနေဖြင့် နိုင်ငံရေး စစ်ရေးအရ ပူးပေါင်းဆောင်ရွက်မှုကို ယခုထက်ပိုပြီးလက်တွေ့ပြသဖို့ အချိန်တန်ပြီလို့မြင်ပါတယ်”ဟု ယာယီသမ္မတက ပြောသည်။
နွေဦးတော်လှန်ရေးတစ်ခုလုံး၌ညီညွတ်သောစုစည်းမှု အင်အားသည်များစွာ အရေးကြီးသည်ဟု၎င်းက ဆိုသည်။ နွေဦးတော်လှန်ရေး၏ အဓိကမဏ္ဍိုင်သည် စစ်အာဏာရှင်စနစ်အမြစ်ဖြတ် ဖျက်သိမ်းရေးနှင့် ဖက်ဒရယ်ဒီမိုကရေစီနိုင်ငံသစ်ထူထောင်ရေးဖြစ်သည်ဟု ပြောပြသည်။
“အာဏာ လုပ်ပိုင်ခွင့်နဲ့တဖွဲ့ချင်းရဲ့ နယ်မြေပိုင်စိုးရေးဆိုတာတွေဟာ လူထုရဲ့ လွတ်မြောက်မှု လူထုရဲ့ အကျိုးစီးပွားနဲ့နှိုင်းယှဉ်ရင်သာမညကိစ္စတွေတာဖြစ်ပါတယ်”ဟု ယာယီသမ္မတက ပြောသည်။
စစ်အာဏာရှင်စနစ်ဆိုးဖျက်သိမ်းရေး အကြမ်းဖက်စစ်ကောင်စီကို ဦးဆောင်နေသည့် မင်းအောင်လှိုင်နှင့် စစ်အုပ်စုကို အမြစ်ပြတ်ဖြုတ်ချရေးသည် တော်လှန်ရေးအင်အားစုများအားလုံး၏ ဗဟိုဦးတည်ချက်ဖြစ်သည်ဟုဆိုသည်။
“ဒါကြောင့် ကျနော်တို့အားလုံးဟာ စစ်အာဏာရှင်စနစ်ဆိုး ဖျက်သိမ်းရေးအတွက် တက်စွမ်းနိုင်သူတို့ စုစည်းနိုင်ဖို့ လေးနက်စွာစဉ်းစားကြရမှာဖြစ်ပါတယ်”ဟု ယာယီသမ္မတက ပြောကြားသည်။
စစ်အာဏာရှင်စနစ်ဖြိုချရေးအတွက်NUGတွင်အပြည့်အ၀ တာဝန်ရှိသကဲ့သို့ တိုင်းရင်းသားတော်လှန်ရေး လက်နက်ကိုင်များ၌လည်းတာဝန်ရှိကြောင်း ၎င်းက ဆိုသည်။
“လူမျိုးတမျိုးလွတ်မြောက်ရေးသပ်သပ်နဲ့တင်မဟုတ်ဘဲ တနိုင်ငံလုံး စစ်အာဏာရှင်စနစ်က လွတ်မြောက်ဖို့အထိ ကျယ်ကျယ်ပြန့်ပြန့် ချဲ့ထွင်လုပ်ဆောင်ရမှာ ဖြစ်ပါတယ်”ဟု ယာယီသမ္မတက ပြောကြားကာ အစိုးရအဖွဲ့အတွင်း ပိုမိုကျယ်ပြန့်စွာ ဦးဆောင်နိုင်မည့်သူများကို ဖိတ်ခေါ်ကြောင်း ပြောကြားခဲ့သည်။
NUGအနေဖြင့် မဟာမိတ်ရေးရာကဏ္ဍကို ယခုထက်ပိုမိုအားစိုက်သွားမည်ဟုလည်း အသိပေးပြောကြားခဲ့သည်။
အစိုးရအတွင်း ပြုပြင်ပြောင်းလဲမှုများကို တိုးတက်လာသည့် တော်လှန်ရေး ဒီရေနှင့်အတူ လိုက်ပါပြောင်းလဲရန် အမြဲအသင့်ရှိပြီး အားနည်းချက်များကို ပြုပြင်ရန် မတွန့်ဆုတ် ကြောင်းလည်း ပြောကြားသည်။
“လူထုအကျိုးကို ထမ်းဆောင်တဲ့နေရာမှာ ဆင်ခြေတွေနဲ့ နားချဖို့လည်း ကြိုးစားနေတာ မဟုတ်ပါဘူး။ လူထုအတွက် ပိုကောင်းတဲ့ တော်လှန်ရေးရလဒ်တွေ သယ်ဆောင်ပေးနိုင်ဖို့ကိုသာ အစဉ်တစိုက် စဉ်းစားလုပ်ဆောင်နေတာဖြစ်ပါတယ်”ဟု ယာယီသမ္မတက ပြောသည်။
ထို့ကြောင့် အစိုးရ အဖွဲ့ဝင်များကို သက်ဆိုင်ရာ ဝန်ကြီးဌာနအလိုက် ပြုပြင်ပြောင်းလဲမှု လုပ်ဆောင်ရန် ပြင်ဆင်နေသကဲ့သို့ လက်ရှိ ပြည်တွင်း အခြေအနေအရ မြေပြင်၌ အင်အား စုစည်းရမည့် လုပ်ငန်းစဉ်များကို ဆက်လက်ဖော်ဆောင်နေသည်ဟု အသိပေးသည်။
