နိုင်ပကောင်း/People’s Spring
ကရင်ပြည်နယ် ၊ ဖာပွန်ခရိုင် ၊ ကတိုင်တိကျေးရွာမှာ စစ်ကောင်စီတပ်နဲ့ KNU တပ်မဟာ(၅) ပူးပေါင်းတပ်တွေကြား တိုက်ပွဲတွေ ဆက်လက် ဖြစ်ပွားနေ ပြီး ကတိုင်တိစခန်းမကျဖို့ စစ်ကောင်စီကလေကြောင်းပစ်ကူနဲ့ခုခံ နေတယ်လို့ တပ်မဟာ (၅)ပြောရေး ဆိုခွင့်ရှိသူ ဗိုလ်မှုးကြီး စောကလယ်ဒိုထံကသိရပါတယ်။
ကမမောင်းမြို့ကနေ မိုင် ၂၀ ခန့်ဝေးပြီး ဖာပွန်-ကမမောင်း ကားလမ်းမပေါ်မှာရှိတဲ့ ကတိုင်တိတပ်စခန်းကို ပြီးခဲ့တဲ့ ဒီဇင်ဘာလ ၂၉ ရက်ကစတင်ပြီး KNU တပ်မဟာ (၅) နဲ့ ပူးပေါင်းတပ်တွေက စတင်တိုက်ခိုက်ခဲ့တာပါ။
တိုက်ပွဲတွေ ဆက်လက်ဖြစ်ပွားနေဆဲဖြစ်ပြီး နှစ်ဖက်ထိခိုက်ကျဆုံးမှုကို လတ်တလောမှာ မသိရသေးဘူးလို့ တပ်မဟာ (၅) ပြောရေး ဆိုခွင့်ရှိသူ ဗိုလ်မှုးကြီးစောကလယ်ဒိုက ပြောပါတယ်။
Public Service Announcement
“ကတိုင်တိတိုက်ပွဲ ဆက်လက်ဖြစ်နေတုန်းပဲ ၊စခန်းသိမ်းအဆင့်မရောက်သေးဘူး ” လို့ ဗိုလ်မှုးကြီး စောကလယ်ဒိုက ဆိုပါတယ်။
ဖာပွန် – ကမမောင်းလမ်းကိုစိုးမိုးထားတဲ့ ကတိုင်တိစခန်းမကျဖို့အတွက် စစ်ကောင်စီက လေတပ်ပစ်ကူနဲ့ခုခံသလို မြေပြင်ကနေ လည်းစစ်ကူစေလွှတ်နေတယ်လို့သိရပါတယ်။
ကတိုင်တိစခန်းတိုက်ခိုက်ခံရပြီးနောက် နောက်ရက် ဒီဇင်ဘာလ (၃၀ )မှာကျရောက်တဲ့ ကရင်နှစ်သစ်ကူးနေ့မှာ ကတိုင်တိရွာနဲ့အနီးဝန်းကျင် နိုဖောထီးရွာတဝိုက်ကိုစစ်ကောင်စီက လေကြောင်းကနေ တိုက်ခိုက်လာခဲ့ပါတယ်။
ကတိုင်တိတိုက်ပွဲကြောင့် ကတိုင်တိ၊ ကိုင်းတော၊ နိုဖောထီး၊ ဘောကျိုလယ်၊ ဘောကျိုထ၊ ထီးသဲလေ စတဲ့ရွာတွေက ဒေသခံ ပြည်သူတစ်ထောင်ဝန်းကျင်ဟာ ကမမောင်းနဲ့မြိုင်ကြီးငူဘက်ထွက်ပြေးတိမ်းရှောင်နေရပါတယ်။
ဖာပွန်-ကမမောင်း ကားလမ်းမှာ စစ်ကောင်စီတပ်ရဲ့ ကတိုင်တိစခန်းအပြင် ကမမောင်းဗျူဟာစခန်းတစ်ခု ကျန်ရှိနေပါသေးတယ်။
