ရဲခေါင်း/People’s Spring
စစ်ကောင်စီ၏ စစ်မှုမထမ်းမနေရ အဓမ္မစုဆောင်းခံရသူနှင့် ရဲတစ်ဦးတို့ လက်နက်များနှင့် အတူ အလင်းဝင်လာကြောင်း သက်ဆိုင်ရာတပ်ဖွဲ့များက ထုတ်ပြန်သည်။
ချင်းပြည်နယ်၊ တီးတိန်မြို့ ရတဖ (၂၆)ရဲတပ်ရင်းမှ ရဲတပ်သားခိုင်ထူးဉာဏ်သည် လက်နက်တစ်လက်၊ ခဲယမ်းတချို့ယူဆောင်လာပြီး ဇန်နဝါရီ ၉ ရက် ညပိုင်းတွင် အလင်းဝင်လာသည်ဟု ဆိုသည်။
ထို့ကြောင့် လက်နက်ခဲယမ်းနှင့်အတူ အလင်းဝင်ရောက်လာသော ရဲတပ်သားကို ငွေကျပ်သိန်း ၁၀၀ ချီးမြှင့်မည်ဟု CDF CDM SIYINက အသိပေးသည်။
Public Service Announcement
ထို့အပြင် စစ်ကောင်စီတပ်သားတစ်ဦးဖြစ်သော မောင်နေဇော််သည် ဇန်နဝါရီ ၈ရက်တွင် ကရင်နီအမျိုးသားများကာကွယ်ရေးတပ်(KNDF)တပ်ရင်း(၃၄)ထံ အလင်းဝင်လာကြောင်း သိရသည်။
၎င်းနှင့်အတူ MA-1 တစ်လက်၊ကျည်များနှင့် လက်ပစ်ဗုံးယူဆောင်လာကြောင်း KNDF တပ်ရင်း(၃၄) တာဝန်ရှိသူက ပြောသည်။
စစ်ကောင်စီ၏စစ်မှုမထမ်းမနေရ အဓမ္မအတင်းစုဆောင်းခံရကြောင်းနှင့် စစ်ကောင်စီ၏ လက်အောက်တွင် စစ်မှုမထမ်းလိုသဖြင့် အလင်းဝင်ခြင်းဖြစ်ပြီး ကောင်းမွန်စွာစောင့်ရှောက်ထားကြောင်းလည်း အသိပေးသည်။
စစ်ကောင်စီတပ်သားများအနေဖြင့် အာဏာရှင်လက်အောက်မှ ရုန်းထွက်ကြရန်နှင့် အမြန်ဆုံးဘက်ပြောင်းခိုလှုံလာကြရန်လည်း သက်ဆိုင်ရာတပ်ဖွဲ့များက တိုက်တွန်းသည်။
ပြည်သူ့ရင်ခွင်ခိုလှုံရေး အစီအစဥ်မှတဆင့် ၂၀၂၄ နှစ်ကုန်အထိ စစ်ကောင်စီ၏ တပ်သား ၃,၈၇၂ဦး နှင့်ရဲ ၁၀,၈၈၈ ဦးမှာ ပြည်သူနှင့်အတူပူးပေါင်းလာကြောင်းလည်း အမျိုးသားညီညွတ်ရေးအစိုးရ(NUG) က ထုတ်ပြန်ထားသည်။
