ကဖေး/People’s Spring
ကျောက်မဲမြို့ဆေးရုံကို စစ်ကောင်စီက လေကြောင်းကနေ ဗုံးကြဲတိုက်ခိုက်တာကြောင့် ကျန်းမာရေးဝန်ထမ်းတစ်ဦးအပါအဝင် နှစ်ဦးသေဆုံးပြီး လူနာအများစုပါဝင်တဲ့ ၂၀ဦးထက်မနည်း ဒဏ်ရာရခဲ့ပါတယ်။
ဒီကနေ့ ဇန်နဝါရီ၂၅ရက် နေ့လယ် ၁နာရီ၂၅ မိနစ်နဲ့ ၁နာရီ ၂၉မိနစ်မှာ စစ်ကောင်စီက ဂျက်ဖိုက်တာနဲ့ ဗုံးကြဲခဲ့တာ ဖြစ်ပါတယ်။
“ဆေးရုံက အရပ်သားတွေတက်နေတာပါ။ TNLA ကျန်းမာရေးဝန်ထမ်းတွေက ဆေးကုပေးနေတာပါ။ အခုသေဆုံးတဲ့အထဲမှာ ကျန်းမာရေးဝန်ထမ်းတစ်ယောက်ပါတယ်လို့ သိရတယ်။ ဒဏ်ရာရတဲ့သူတွေလည်းများပါတယ်။ အခြေအနေက စိတ်ပူစရာဖြစ်တယ်”လို့ ဒေသခံတစ်ဦးက ပြောပါတယ်။
Public Service Announcement
https://www.facebook.com/LuduNwayOo/videos/1121196946148487
ကျောက်မဲမြို့နယ်မှာ စစ်ကောင်စီက ဂျက်ဖိုက်တာဖြင့် (၂)ကြိမ် ဗုံးကြဲချတိုက်ခိုက်ခဲ့တာလို့ တအောင်းအမျိုးသားလွတ်မြောက်ရေးတပ်မတော် TNLAက ကနဦးသတင်းထုတ်ပြန်ထားပြီး နောက်ဆက်တွဲအခြေအနေကိုထပ်မံထုတ်ပြန်မယ်လို့ ဆိုပါတယ်။
“သက်ကြီးရွယ်အိုတွေ ကလေးငယ်တွေအများအပြား ဆေးကုသနေတဲ့ ကျောက်မဲဆေးရုံပေါ်တည့်တည့်ကို ဗုံးကြဲချလိုက်သတဲ့။ ဆေးရုံတစ်ခုလုံးလည်း ရစရာမရှိတော့သလို ဆေးရုံးဝင်းတစ်ခုလုံး ငိုသံတွေနဲ့”လို့ ရှမ်းပြည်နယ်မြောက်ပိုင်းအခြေစိုက် ရွှေဖီမြေ သတင်းဌာနက သတင်းထောက် ကိုမိုင်းအနိုင်က လူမှုကွန်ရက်မှာရေးသားထားပါတယ်။
TNLAဟာ ၁၀၂၇ စစ်ဆင်ရေးမှာ ရှမ်းပြည်နယ် မြောက်ပိုင်းက ကျောက်မဲမြို့၊ သီပေါ၊နမ့်ဆန်၊ မိုင်းလုံ၊ မိုးမိတ်၊ မန်တုံ၊နမ္မတူ၊ ကွတ်ခိုင်၊ နောင်ချို၊နမ့်ခမ်း၊မိုင်းငေါ့မြို့နဲ့ မန္တလေးတိုင်းမှမိုးကုတ်မြို့ကိုသိမ်းပိုက်ထားတာပါ။
ဒေသအနှံ့ကတော်လှန်ရေးအင်အားစုတွေနဲ့ လက်တွဲပြီး စစ်ကောင်စီကို အပြီးတိုင်ချေမှုန်းတော်လှန်သွားမယ်လို့ ဇန်နဝါရီ ၁၂ရက်တအာင်းအမျိုးသားတော်လှန်ရေးနေ့မှာ TNLA က ထုတ် ပြန်ထားပါတယ်။
စစ်ကောင်စီက လက်ရှိ ဇန်နဝါရီလအတွင်းမှာပဲ ကျောက်မဲမြို့အပြင် နောင်ချို၊ မိုးကုတ်မြို့တို့ကိုလည်း လေကြောင်းကနေတိုက်ခိုက်ခဲ့လို့ အရပ်သားဆယ်ဦးထက်မနည်းသေဆုံးခဲ့ပါတယ်။
