ဟန်နွေ/People’s Spring
မွန်ပြည်နယ်၊ ရေးမြို့နယ်၊ ကျုံလောင်းကျေးရွာရှိ ဘိုကလေးကျောင်းတိုက်အနီးတွင် တပ်စွဲထားသော စစ်ကောင်စီတပ်အား ဇန်နဝါရီ ၂၂ရက်တွင် တိုက်ခိုက်ခဲ့ကြောင်း အမျိုးသားညီညွတ်ရေးအစိုးရ(NUG)၊ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော် တောင်ပိုင်းစစ်ဒေသက ယနေ့(ဇန်နဝါရီ ၂၆ရက်) သတင်းထုတ်ပြန်သည်။
တောင်ပိုင်းစစ်ဒေသ အမှတ်(၁၈၀၃) SDDF Missile Team နှင့် တော်လှန်ရေး မဟာမိတ်အင်အားစုများပူးပေါင်း၍ Missile Rocket များဖြင့် ပစ်ခတ်ခဲ့ဟု ဖော်ပြသည်။
အဆိုပါတိုက်ခိုက်မှုအတွင်း စစ်ကောင်စီတပ်သား သုံးဦးသေဆုံး၍ ၁၀ဦးဒဏ်ရာရရှိခဲ့ကြောင်း ဖော်ပြထားပြီး စစ်ကောင်စီတပ် အသုံးပြုသော ကားတစီး မီးလောင်ပျက်စီးခဲ့ဟု ထုတ်ပြန်ထားသည်။ စစ်ကောင်စီတပ် သေဆုံးထိခိုက်ဖြစ်စဉ်နှင့်ပတ်သက်ပြီး လူထုနွေဦးက သီးခြားအတည်ပြုချက် မရပေ။
Public Service Announcement
တောင်ပိုင်းစစ်ဒေသ၏ ထုတ်ပြန်ချက်တွင် ယာဉ်တစ်စီးပေါ်တပ်ဇင်ထားသည့် လက်နက်ဖြင့် ပစ်ခတ်တိုက်ခိုက်နေမှုရုပ်သံကိုလည်း ဖော်ပြထားသည်။
တောင်ပိုင်းစစ်ဒေသ နယ်မြေ ရေးမြို့နယ်အတွင်း၌ PDF စစ်ကြောင်းများနှင့် ကရင်အမျိုးသား လွတ်မြောက်ရေး တပ်မတော်(KNLA)၊ မွန်တော်လှန်ရေးတပ်ဖွဲ့များ၊ အခြားတော်လှန်ရေးအင်အားစုများ ပူးပေါင်းပြီး စစ်ကောင်စီကို တိုက်ခိုက်လျက်ရှိသည်။
ရေးမြို့နယ်အပါအဝင် တောင်ပိုင်းစစ်ဒေသ နယ်မြေ၌ ယခု ဇန်နဝါရီ ၁၈ရက်မှ ၂၄ရက်အတွင်း တော်လှန်ရေးပူးပေါင်းတပ်များက စစ်ကေငာ်စီတပ်အား ၁၆ကြိမ် တိုက်ခိုက်ခဲ့ကြောင်း တောင်ပိုင်းစစ်ဒေသက အသိပေးထားသည်။ အဆိုပါ တိုက်ခိုက်မှုများအတွင်း စစ်ကောင်စီတပ် သေဆုံးထိခိုက်ရှိခဲ့ပြီး လက်နက်ခဲယမ်းများလည်း သိမ်းရခဲ့ကြောင်းထုတ်ပြန်ထားသည်။
ပြီးခဲ့သည့် ၇ရက်အတွင်း တိုက်ပွဲများအနက် PDF ဗျူဟာ (၃၃) ဒေါနတပ်ရင်း၊ မွန်ပြည်တော်လှန်ရေးတပ်(MSRF)၊ မွန်ပြည်သစ်ပါတီ စစ်အာဏာရှင်တိုက်ဖျက်ရေး(NMSP-AD) တို့ ပါဝင်သည့် ပူးပေါင်းတပ်သည် မွန်ပြည်နယ် ရေးမြို့နယ် ခေါဇာမြို့ရှိ ခလရ(၃၁)၏ မီးတိုင်စခန်းကို တိုက်ခိုက်ခဲ့ရာ တိုက်ပွဲ ၂ကြိမ်ဖြစ်ခဲ့ပြီး စစ်ကောင်စီတပ် သေဆုံးထိခိုက်ရှိခဲ့ကြောင်း တောင်ပိုင်းစစ်ဒေသနှင့် မွန်တပ်ဖွဲ့များက ထုတ်ပြန်ထားသည်။
