People’s Spring
ရက္ခိုင်ရိုးမပေါ် ရက္ခိုင်ပြည်-ပဲခူးတိုင်းအစပ်ရှိ စစ်ကောင်စီစခန်းတစ်ခုကို အပြီးသတ်သိမ်းပိုက်နိုင်ခဲ့သလို ရက္ခိုင်ပြည်-မကွေးတိုင်းအစပ်တွင်လည်း စစ်ကောင်စီတပ် ဆုတ်ခွာထွက်ပြေးလျှက်ရှိကြောင်း အာရက္ခတပ်တော်(AA)က ဇန်နဝါရီ ၂၇ ည သန်းခေါင်းယံတွင် ထုတ်ပြန်အသိပေးသည်။
AA သည် ရက္ခိုင်ရိုးမတောင်တန်းတလျှောက်ရှိ ဖက်ဆစ်အကြမ်းဖက်စစ်ကောင်စီ၏ လက်ကျန်စခန်းများကို တစ်ခုပြီးတစ်ခု ထိုးစစ်ဆင်တိုက်ခိုက်လျှက်ရှိရာ ပဲခူးတိုင်း-ရက္ခိုင် အစပ်နေရာများနှင့် ရက္ခိုင်ရိုးမတောင်တန်းထက်တွင် တိုက်ပွဲများမှာ နေ့စဥ်ဖြစ်ပွားနေကြောင်း ဖော်ပြသည်။
ရက္ခိုင်ပြည်၊ တောင်ကုတ်မြို့နယ်အတွင်းတနည်းအားဖြင့် ရက္ခိုင်ရိုးမတောင်တန်းထက်ရှိ စစ်ကောင်စီ စခန်းတစ်ခုဖြစ်သော မိုးထိတောင်စခန်းအား ဇန်နဝါရီ ၂၁ရက် နံနက်ပိုင်းတွင် AA ကစတင်ထိုးစစ်ဆင် တိုက်ခိုက်ခဲ့ရာ ငါးရက်ခန့် အပြင်းအထန်ထိုးစစ်ဆင်တိုက်ခိုက်ပြီးနောက် ဇန်နဝါရီ ၂၆ ရက် နံနက်ပိုင်းတွင် ယင်းစခန်းကို အပြီးသတ်သိမ်းပိုက်နိုင်ခဲ့ကြောင်း အသိပေးသည်။ ရန်သူ၏ စစ်အသုံးအဆောင်၊ လက်နက်ခဲယမ်း၊ အလောင်းအချို့ကို သိမ်းဆည်းရမိခဲ့ကြောင်း AA က ဆိုသည်။
Public Service Announcement
AA တပ်မှူးချုပ် ဗိုလ်ချုပ်ထွန်းမြတ်နိုင်ကလည်း ဇန်နဝါရီ ၂၇ ရက် ညနေပိုင်းတွင် တိုက်ပွဲအတွင်းသိမ်းဆည်းရမိထားတဲ့ လက်နက်ခဲယမ်းများနှင့်အတူ ပဲခူးတိုင်းဒေသကြီးမှကြိုဆိုပါ၏ ဆိုင်းဘုတ်အောက်မှာ ရိုက်ကူးထားတဲ့ ဓာတ်ပုံကို ကနဦး ဖော်ပြအသိပေးခဲ့သည်။
ထို့အပြင် ဧရာဝတီ-ရက္ခိုင်အစပ် ဧရာဝတီတိုင်းအတွင်းရှိ အာရက္ခတပ်တော်မှ သိမ်းပိုက်ထားသော ပွိုင့် (၂၆၃) စခန်းအား စစ်ကောင်စီက ဇန်နဝါရီ ၂၇ ရက် မွန်းလွဲပိုင်းတွင် လေကြောင်း၊ လက်နက်ကြီးပစ်ကူများနှင့်အတူ ထိုးစစ်ဆင်တိုက်ခိုက်လျက်ရှိသောကြောင့် တိုက်ပွဲများ ပြင်းထန်နေကြောင်း AA က ဖော်ပြသည်။
မကွေးတိုင်း၊ ငဖဲမြို့နယ် အမ်း-ပဒါန်း ကားလမ်းမ (ဂုတ်စီးရိုးကျေးရွာအနီး)တွင်လည်း စစ်ကောင်စီရဲ့ တမခ (၉၉) လက်အောက်ခံ ခမရ (၄၁၉) ၊ (၁၄) တပ်ရင်းတို့ ပူးပေါင်းစစ်ကြောင်းနှင့် AAတို့ နာရီဝက်ခန့်ကြာ ဇန်နဝါရီ ၂၇ရက်တွင် တိုက်ပွဲဖြစ်ပွားခဲ့ကာ AA ၏ တန်ပြန်ခုခံစစ်ကို မယှဉ်နိုင်သော စစ်ကောင်စီတပ်က ဂုတ်စီးရိုးကျေးရွာဘက်သို့ ဆုတ်ခွာသွားခဲ့ရကြောင်း သိရသည်။ ဆုတ်ခွာထွက်ပြေးသွားသော ရန်သူများအား လိုက်လံရှင်းလင်း တိုက်ခိုက်လျက်ရှိရာ ရန်သူ့အလောင်းနှင့် လက်နက်ခဲယမ်းအချို့ကို ထပ်မံသိမ်းဆည်းရမိခဲ့ကြောင်း AA က အသိပေးသည်။
AA သည် ရက္ခိုင်ပြည် ၁၇ မြို့နယ်အနက် ၁၄ မြို့နယ်ကို သိမ်းပိုက်ထိန်းချုပ်ထားကာ ပြည်နယ်မြို့တော် စစ်တွေနှင့် ကျောက်ဖြူ၊ မာန်အောင် စသည့် မြို့နယ် ၃ခုသာ သိမ်းပိုက်ရန် ကျန်ရှိသည်။
သို့ရာတွင် စစ်တွေမြို့အနီးပတ်ဝန်းကျင်၌ နှစ်ဖက် အပြန်အလှန် လက်နက်ကြီး၊ စနိုက်ပါ၊ ဒရုန်းပစ်ခတ်တိုက်ခိုက်မှုများမှာ နေ့တိုင်းရှိနေခဲ့ကြောင်း AA က ထုတ်ပြန်သည်။
