အိမ်သွင်/People’s Spring
အာရက္ခတပ်တော် (AA) ထိန်းချုပ်ထားသော မင်းပြားမြို့နယ် လက်မရွာမှ ကျေးရွာအုပ်ချုပ်ရေးမှူးကိုလူတစ်စုက သတ်ဖြတ်သွားကြောင်း ဒေသခံများကပြောသည်။
လက်မရွာသည်မူဆလင်ကျေးရွာဖြစ်ပြီးကျေးရွာအုပ်ချုပ်ရေးမှူးဦးသိန်းနိုင်သည်ဖေဖော်ဝါရီလ ၁ ရက်နေ့ညက သတ်ဖြတ်ခံရခြင်းဖြစ်သည်။
“ အဖွဲ့လိုက်လာတာ။ ဓားနဲ့ခုတ်ပြီး ထွက်ပြေးသွားတာ” ဟုမင်းပြားမြို့ခံတစ်ဦးကပြောသည်။
Public Service Announcement
အဆိုပါဖြစ်စဉ်ကို AA၏ ပြည်သူ့လုံခြုံရေးနှင့် တရားဥပဒေစိုးမိုးရေးဌာနက စစ်ဆေးနေကြောင်း သတင်းရရှိသည်။
တိုက်ခိုက်သွားသူများမှာ ARSA တပ်ဖွဲ့ဝင်များဖြစ်နိုင်ကြောင်း ဒေသခံတစ်ဦးကပြောသည်။ ARSA သည် ရခိုင်ပြည်နယ်မှ မြို့နယ်အချို့တွင် အရပ်သားများအား ပစ်မှတ်ထားတိုက်ခိုက်မှုမကြာခဏပြုလုပ်နေသည်ဟု AA က ထုတ်ပြန်ထားသည်။
ပြီးခဲ့သည့် ဇန်နဝါရီလက မောင်တောမြို့နယ်၊ကျောက်ပန္ဒူရွာမှ ရသေ့တောင်မြို့နယ် စေတီပြင်ရွာ သို့ လာ သည့် သုံးဘီးကားတစ်စီးကို မေယုတောင်ကျော်လမ်း၊ မြို့ယုကျေးရွာအနီးတွင် ARSA အဖွဲ့က သေနတ်ဖြင့်ပစ်ခတ်ခဲ့၍အရပ်သားတစ်ဦးသေဆုံးပြီး နှစ်ဦးဒဏ်ရာရကြောင်း ဒေသခံသတင်းရင်းမြစ်များကပြောသည်။
ထို့အပြင်ဒီဇင်ဘာလ(၂၄)ရက်နေ့ကလည်းမောင်တောမြို့နယ်၊ကြိမ်ချောင်းနှင့် တောင်ပြိုအကြားတွင် စေတနာ့ဝန်ထမ်း အမျိုးသမီး၊ စျေးဝယ်အမျိုးသမီး စုစုပေါင်း (၁၆)ဦးလိုက်ပါလာသောခရီးသည်တင်ကားတစ်စီးအား ARSA တပ်ဖွဲ့ဝင်များက ပစ်ခတ်တိုက်ခိုက်ခဲ့သောကြောင့် တစ်ဦးသေဆုံးပြီး အများအပြား ဒဏ်ရာရကြောင်း AAကသတင်းထုတ်ပြန်ခဲ့သည်။
