စစ်ကိုင်းနဲ့ တနင်္သာရီမှာ စစ်အာဏာရှင်ဆန့်ကျင်ရေး ဆန္ဒပြ

သုည/People’s Spring

စစ်ကိုင်းနဲ့ တနင်္သာရီတိုင်းက သပိတ်အဖွဲ့တွေ၊ ဒေသခံပြည်သူတွေက စစ်အာဏာရှင်ဆန့် ကျင်ရေး လူထုသပိတ်လှုပ်ရှားမှုတွေ ဒီကနေ့ (ဖေဖော်ဝါရီ ၇)မှာ အသီးသီး ပြုလုပ်ခဲ့ကြပါတယ်။

စစ်ကိုင်းတိုင်း ပုသိမ် မုံရွာလမ်းမထက်မှာ သပိတ်အင်အားစုတွေ စုပေါင်းပြီး စစ်အာဏာရှင် စနစ်ကို အလိုမရှိကြောင်း၊ ဖယ်ဒရယ်ပြည်ထောင်စုတည်ဆောက်ချင်ကြောင်း ကြွေးကြော်သံတွေနဲ့ လမ်းလျှောက် ဆန္ဒပြခဲ့ပါတယ်။

ဒါ့အပြင် ကျဆုံးရဲဘော်တွေရဲ့ အုတ်ဂူဆီကို ဦးညွတ်အလေးနီပြုခြင်း၊ ဝေမြဲနှင်းဆီတွေနဲ့ အာဇာနည်သူရဲကောင်းတွေရဲ့ အုတ်ဂူပေါ်မှာ ကြဲချခဲ့ခြင်းတို့ကို လုပ်ဆောင်ခဲ့ပါတယ်။

Public Service Announcement

ယင်းလှုပ်ရှားမှုကို အားမာန်သစ်သပိတ်အင်အားစုက ဦးဆောင်ပြီး ယင်းမာပင်-ဆားလင်းကြီးရွာပေါင်းစုံသပိတ်၊ တော်လှန်ပုန်ကန်ဒေါင်းတို့အားမာန်သပိတ်၊ အောင်လံလွှင့်မည် ဒေါင်းသွေးနီသပိတ်၊ သွေးမအေးတဲ့ ရွှေနွယ်သွေးသပိတ်၊ ကယ်တင်ရှင်မရှာ တို့ကျေးရွာသပိတ်၊ ကလေးမြို့လူထုတိုက်ပွဲနဲ့ တော်လှန်ပြည်သူတွေက ပူးပေါင်းချီတက်ခဲ့ပါတယ်။

ဆားလင်းကြီးမြို့နယ် လက်ပံတောင်းတောင်ဒေသမှာလည်း အာဏာရှင်ဆန့်ကျင်ရေးသပိတ်အင်အားစုက “အထွေထွေဖိနှိပ်မှုကို အံတုကြ ဘုံရန်သူကို ထွက်ပေါက်မပေးနဲ့” ခေါင်းစဥ်နဲ့ စစ်အာဏာရှင်ဆန့်ကျင်ရေးသပိတ် ပြုလုပ်ခဲ့ကြပါတယ်။

ကလေးမြို့နယ်မှာလည်း သပိတ်ဦးဆောင်ကော်မတီက ပြည်သူ့ပညာရေးသပိတ်စစ်ကြောင်းနဲ့အတူ “အထွေထွေဖိနှိပ်မှုကို တွန်းလှန်ကြ လွတ်မြောက်ရေးဆီ ချီတက်ကြ” ကြွေးကြော်သံတွေနဲ့ ချီတက်ဆန္ဒပြခဲ့ပါတယ်။

တနင်္သါရီတိုင်း ထားဝယ်ခရိုင် လောင်းလုံးမြို့နယ်မှာလည်း ဒီမိုကရေစီအရေးလှုပ်ရှားမှု သပိတ်ကော်မတီ(DDMSC)မှ ဦးဆောင်ပြီး စစ်အာဏာရှင်ဆန်ကျင်ရေး လူထုသပိတ်လှုပ်ရှားမှု ပြုလုပ်ခဲ့ပါတယ်။

အဲဒီလှုပ်ရှားမှုကို “ကြောက်စိတ်တွေကိုဖယ်ရှား အမှောင်ခေတ်ကို ရဲရဲကျော်လွှား” ခေါင်းစဥ်နဲ့ ပြုလုပ်ခဲ့ကြတာဖြစ်ပြီး အမျိုးသမီး၊ လူငယ်နဲ့ ဒေသခံပြည်သူများ ပူးပေါင်းပါဝင်ခဲ့ကြပါတယ်။