ရဲခေါင်/People’s Spring
ထိုင်းနိုင်ငံက လျှပ်စစ်ပစ္စည်းများအပါအဝင် ထုတ်ကုန် ၁၁မျိုးကို မြန်မာဘက်သို့တင်ပို့ခွင့် ပိတ်လိုက်ကြောင်း ထိုင်း-မြန်မာနယ်စပ်ရှိ လုပ်ငန်းရှင်အချို့က ပြောသည်။
အွန်လိုင်းလောင်းကစား(ကျားဖြန့်)နှိမ်နင်းရေးရည်ရွယ်ချက်ဖြင့် တင်ပို့ခွင့်ပိတ်ပင်သည့် ကုန်ပစ္စည်း ၁၁မျိုးတွင် မိုဘိုင်းဖုန်းအသစ်၊ ဘက်ထရီ၊ အင်ဗာတာ၊ မီးစက်၊ဆိုလာပြားနှင့် မိုဘိုင်းကိရိယာများ ပါဝင်သည်ဟု ဆိုသည်။
ထို့အပြင် ကေဘယ( Cable)ကြိုးများ၊ကွန်ပျူတာဟာ့ဒ်ဝဲ ၊ကွန်ပျူတာဆော့ဖ်ဝဲ၊အင်ဂျင်ဝိုင်နှင့် စက်သုံးဆီ တို့ကိုလည်း မြန်မာပြည်သို့ တင်ပို့ခွင့်ပိတ်လိုက်သည်။
Public Service Announcement
“အခက်အခဲကတော့ စက်သုံးဆီပြတ်လပ်မှုပဲ ။ကျန်တဲ့ ကုန်စည်တွေက အဲဒီလောက် ဒေသခံလူထုအတွက် မရှိမဖြစ်အရေးမကြီဘူး။အခုက ထိုင်းဘက်က စက်သုံးဆီတရားဝင်ပိတ်လိုက်ပြီလို့ပြောရတယ်”ဟု မြဝတီမြို့မှလုပ်ငန်းရှင်တစ်ဦးက လူထုနွေဦးသို့ ပြောသည်။
ထိုင်း-မြန်မာနယ်စပ်တလျှောက်ရှိ တရုတ်ကျားဖြန့် အွန်လိုင်းဂိုဏ်းများ နှိမ်နင်းရန်ဆိုကာ ထိုင်းအစိုးရက မြဝတီ၊ တာချီလိတ်မြို့အပါအဝင် နေရာငါးခုကို လျှပ်စစ်မီး၊ ဆက်သွယ်ရေးကွန်ရက်နှင့် လောင်စာဆီတင်ပို့မှုများကို ဖေဖော်ဝါရီ ၅ ရက်ကစတင်၍ ဖြတ်တောက်ခဲ့သည်။
“မြို့ထဲက ဆီဆိုင်တွေက ပိတ်သွားပြီ။အောက် လမ်းကနေတော့ ဝယ်ရတယ်။စျေးက အများကြီးတက်ပြီလေ။တစ်လီတာ ကျပ် ၂၀,၀၀၀လောက်ကို ဖြစ်နေတာ။ရေရှည်ဆိုရင်တော့မလွယ်ဘူး။ကြားတာတော့ ခြောက်လလောက်ထိပိတ်မှာတဲ့”ဟု စက်သုံးဆီ ပြတ်လပ်မှုနှင့်ပတ်သက်၍ မြဝတီမြို့ခံတစ်ဦးက လူထုနွေဦးသို့ ရှင်းပြသည်။
တရုတ်အစိုးရ၏ ဖိအားပေးမှုအပါအဝင် ထိုင်း -မြန် မာနယ်စပ် မြန်မာဘက်အခြမ်းရှိ ကျားဖြန့် အွန်လိုင်းငွေလိမ်ဂိုဏ်းများကို နှိမ်နင်းရန်အတွက် ထိုင်းအစိုးရက အရေးယူမှုများကို တစ်ဆင့်ချင်း ဆောင်ရွက်လာသည်။
ထိုအပြင် ယမန်နေ့(ဖေဖော်ဝါရီ ၁၁ရက်)တွင် မြဝတီဒေသရှိ ကျားဖြန့်လူကုန်ကူးဂိုဏ်းများနှင့်ပတ်သက်ပြီး ထိုင်းနိုင်ငံ အထူးစုံစမ်းရေးဌာန(DSI)က ကရင်နယ်ခြားစောင့်တပ်(BGF)ခေါင်းဆောင် ဗိုလ်မှူးကြီး စောချစ်သူ၊ ဒုတိယဗိုလ်မှူးကြီးစောမုတ်သုန်နှင့် ဗိုလ်မှူးစောတင်ဝင်းတို့ကို လူကုန်ကူးမှုဖြင့်ဖမ်းဝရမ်းထုတ်နိုင်ရန် စတင်ကြိုးပမ်းနေသည်။
ထို့အပြင် ထိုင်း – မြန်မာနယ်စပ်ဒေသရှိ ကျားဖြန့်လုပ်ငန်းများကို အမြစ်ပြတ်ချေမှုန်းသွားမည်ဟု တရုတ်နိုင်ငံခြားရေးဌာနကလည်း ကြေညာထားသည်။
