စစ်ကောင်စီက လေကြောင်းနှင့် လက်နက်ကြီး တစ်နေကုန်ပစ်ခတ်နေဟုဆို
တာယာ၊ရဲခေါင်/People’s Spring
စစ်ကိုင်းတိုင်း၊ ကလေးမြို့နယ်တောင်ပိုင်း ကလေး – ဂန့်ဂေါလမ်းပိုင်းတွင် စစ်ကောင်စီတပ်နှင့် တော် လှန်ရေးတပ်များကြား တိုက်ပွဲဖြစ်ပြီး စစ်ကောင်စီက လေကြောင်းနှင့် လက်နက်ကြီးကို တစ်နေကုန်ပစ်ခတ်နေသည်ဟု ဒေသတွင်း စစ်ရေးသတင်းရင်းမြစ်များက ပြောသည်။
ကလေး – ဂန့်ဂေါလမ်းပိုင်းတွင် အရေးပါသည့် ကမ္ဘားနီမြစ်ကူးတံတားတွင် တပ်စွဲထားသည့် စစ်ကောင်စီတပ်အား တော်လှန်ရေးတပ်များက ယမန်နေ့ (ဖေဖော်ဝါရီ ၁၁ ရက်)ညပိုင်းကစ၍ ဝင်ရောက်တိုက်ခိုက်ခြင်းကြောင့်တိုက်ပွဲဖြစ်ပွားခြင်းဖြစ်သည်ဟု သိရသည်။
Public Service Announcement
“လေကြောင်းက ဒီနေ့မနက်ဗုံးကြဲသွားတယ်။ ပျူစောထီးတွေနဲ့ စစ်ကောင်စီတပ်တွေ စုပေါင်းတပ်စွဲထားတဲ့ နေရာကို ဝင်တိုက်တာက တိုက်ပွဲဖြစ်တာပါ။ ဒီနေ့လည်း တနေကုန်ဖြစ်နေတယ်”ဟု ဒေသခံတစ်ဦးက ပြောသည်။
စစ်ကောင်စီ၏ လက်နက်ကြီးပစ်ခတ်နေမှုနှင့်ပတ်သက်၍လည်း စစ်မြေပြင်ရောက်ရှိနေသူ တစ်ဦးကလည်း ” တနေကုန်အလုံး ၁၀၀ ကျော်ပြီ။မပြီးနိုင်သေးဘူး”ဟု ပြောသည်။
ပစ်ခတ်မှုသံများကို ဖေဖော်ဝါရီ ၁၁ ရက် ည ၇ နာရီခန့်က စတင်ကြားရပြီး ယနေ့ နံနက်ပိုင်းက Y-12 လေယာဥ်ကို စစ်ကောင်စီတပ်က အသုံးပြုခဲ့သည်ဟု တော်လှန်ရေးတပ်နှင့်နီးစပ်သူတစ်ဦးက အသိပေးသည်။
“အချိန် ခနေစောင့်ပေးပါ။ ဖြစ်စဉ်အကုန်လုံး အသေးစိတ်ချပြပါမယ်”ဟု ကလေးမြို့အခြေစိုက် တော်လှန်ရေးတပ်ဖွဲ့မှတာဝန်ရှိသူက လူထုနွေဦးသို့ ပြောသည်။
ကမ္ဘားနီတံတားသည် ၁၉၉၇ ခုနှစ်ကစတင်တည် ဆောက်ခဲ့ပြီးနောက် ၂၀၁၉ ခုနှစ်တွင် တံတားအသစ် ပြန်လည်တည် ဆောက်ခဲ့သည်။ကလေးမြို့နယ်တောင်ပိုင်း ဆည်တောကျေးရွာအနီးတွင်တည်ရှိပြီး ကလေး-ဂန့်ဂေါလမ်းမ၏ မိုင်တိုင် (၅၁)တွင် တည်ရှိသည်။
၂၀၂၃တွင် အရှည်ပေ ၆၀၀ခန့်ရှိ ထိုတံတားနှင့် ဆည်တော်ရွာပတ်ဝန်းကျင်၌ အင်အား ၅၀ထက်မနည်းသော အင်အားဖြင့် စစ်ကောင်စီက တပ်စွဲခဲ့သည်။
ကလေးမြို့နယ်တောင်ပိုင်းကို စစ်ကောင်စီက ယခင်လပိုင်းကစ၍ လေကြောင်းတိုက်ခိုက်မှုများပြုလုပ်ခဲ့ပြီး ဇန်နဝါရီ ၃၁ ရက်ညပိုင်းက လေကြောင်းတိုက်ခိုက်မှုတွင် တင်သားကျေးရွာနှင့် ကုက္ကိုလ်ကျေးရွာမှ ကလေးငယ်နှင့်အမျိုးသမီး ၉ ဦးသေဆုံးကာ ၃၀ ဝန်းကျင် ထိခိုက်ဒဏ်ရာရရှိခဲ့သည်။
ထို့အပြင် ရေရှင်၊အင်းကျွန်း၊ ကျောက်ဆည်၊ ကုက္ကိုလ် ၊ရှားတော၊ နွားရွာ ၊တင်သား ၊ကျောက်ဖူး၊ ဒိုးနွယ် ၊အရှေ့စည်း၊ မင်းလှ ၊ ရှားဖို ၊မှန်တော၊ အောင်မဂ်လာနှင့် ဆည်တောကျေးရွာများမှ ဒေသခံတစ်သောင်းဝန်းကျင်မှာ စစ်ရှောင်နေကြရသည်။
(တိုက်ပွဲဖြစ်ပွားသည့် ကလေး – ဂန့်ဂေါလမ်းပိုင်းရှိ ကမ္ဘားနီမြစ်ကူးတံတား။ ဓာတ်ပုံ – စကစ)
