ဒီးမော့ဆိုမြို့နယ်ရှိ စာသင်ကျောင်းကို စစ်ကောင်စီ လေကြောင်းတိုက်ခိုက်

ရဲခေါင်/People’s Spring

ကရင်နီပြည်နယ်၊ ဒီးမော့ဆိုမြို့နယ်ရှိ စာသင်ကျောင်းကို စစ်ကောင်စီက ယနေ့(ဖေဖော်ဝါရီ ၁၃ ရက်)နေ့လည် ၂ နာရီခွဲခန့်တွင် လေ​ကြောင်းမှ ဗုံးကြဲတိုက်ခိုက်ခဲ့ကြောင်း သတင်းရရှိသည်။

မြို့၏ အနောက်ဘက်ခြမ်း၊ ဒေါရောက်ခူကျေးရွာအနီးရှိ စာသင်ကျောင်းနှင့် အဆောက်အဦးသုံးလုံမှာ အလုံးစုံနီးပါးပျက်စီးခဲ့ရသည်ဟု ဆိုသည်။

ပစ်မှတ်ထားဗုံးကြဲခံရသည့် စာသင်ကျောင်း၌ တက်ရောက်နေသည့် ကလေးများမှာ ယနေ့တွင် ကျောင်းပိတ်ထား၍ လွတ်မြောက်ခဲ့သည်ဟု စစ်ရှောင်ကူညီနေသူတစ်ဦးက အသိပေးသည်။

Public Service Announcement

“ဒီနေ့ ကလေးတွေကို ကျောင်းပိတ်ထားလို့ တော်သေးတာပေါ့ဗျာ။မဟုတ်ရင် မတွေးရဲစရာပဲ။စကစအကြမ်းဖက်တော့ ရွေးပြီးတော့ကို ပြည်သူတွေ ကလေးတွေကို ရက်စက်ယုတ်မာနေကြတာပဲ”ဟု ၎င်းက ပြောသည်။

နိုင်ငံတစ်ဝန်း စစ်ကောင်စီ၏ လေကြောင်းတိုက်ခိုက်မှု ပိုမိုလာနေခြင်းကြောင့်လည်း စစ်ဘေးရှောင်ပြည်သူများအနေဖြင့် ပိုမိုဂရုစိုက်ကြရန်နှင့် လေယာဥ်သံကြားပါက ကြိုတင်တိမ်ရှောင်ကြရန် ကရင်နီအရပ်ဘက်အဖွဲ့အစည်းအချို့က တိုက်တွန်းထားသည်။

စစ်ကောင်စီသည် ယမန်နေ့(ဖေဖော်ဝါရီ ၁၂ရက်)နှင့် ယနေ့(ဖေဖော်ဝါရီ ၁၃ရက်) နှစ်ရက်အတွင်း စလင်း၊ဂွ၊မုံရွာ၊ချောင်းဦး၊ဆားလင်းကြီး ၊မတ္တရာ၊ရေစကြို၊နွာထိုးကြီး၊ ညောင်ဦးနှင့် ကနီမြို့နယ်တို့တွင် လေကြောင်းမှ ဗုံးကြဲတိုက်ခိုက်ခဲ့ပြီး ပြည်သူ ၂၀ ဦးထက်မနည်း သေဆုံးခဲ့ရသည်။

ကရင်နီလူ့အခွင့်အရေးအဖွဲ့၏အချက်အလက်အရ ယခုနှစ် ဇန်နဝါရီတွင် စစ်ကောင်စီ၏ လေကြောင်း နှင့်လက်နက်ကြီးတိုက်ခိုက်မှုကြောင့် ကရင်နီပြည်နယ်၌ အရပ်သား ၉ဦးသေဆုံးပြီး ၁၇ဦးထက်မနည်း ထိခိုက်ဒဏ်ရာရခဲ့သည်။