ရှမ်းပြည်တောင်ပိုင်း၊ညောင်ရွှေမြို့နယ်တိုက်ပွဲ၌ စစ်အုပ်စုဘက်မှ လေးဦးအရှင်ဖမ်းမိပြီး သေနတ်နှင့်ကျည်များသိမ်းဆည်းရမိကြောင်း အင်းလေးပြည်သူ့ကာကွယ်ရေးတပ် IPDF တာဝန်ရှိသူ ကိုအင်းသွေနီ က လူထုနွေဦးသို့ပြောသည်။
ယမန်နေ့(ဖေဖော်ဝါရီ ၁၆ ရက်) မွန်းလွဲ ၂ နာရီခွဲခန့်က PNO တပ်ရင်း (၁) နှင့် တပ်ရင်း (၇)တို့ပူးပေါင်း၍ အင်အား(၁၀၀)ကျော်ဖြင့် ညောင်ရွှေမြို့နယ်၊ အင်းလေးဒေသ ရေပူကျေးရွာအနီးသို့ ထိုးစစ်ဆင်လာခဲ့ခြင်းဖြစ်သည်။
“အခုတော့ PNO စစ်ကြောင်းက ထီရီးနဲ့နမ့်ပွန်ဘက်မှာရှိတယ်။ သူတို့ပြန်ဆုတ်သွားကြတာ။ကျနော်တို့ ပြည်သူတွေအတွက် စစ်မှန်သောလွပ်လပ်မှု့ရဖို့ အသက်ပေးပြီးအားသွနခွန်စိုက်ကြိုးစားနေတယ်ဆိုတာကို အသိပေးလိုပါတယ်”ဟု ကိုအင်းသွေနီက ပြောသည်။
Public Service Announcement
စစ်ကောင်စီသည် တော်လှန်ရေးအင်အားစုများ ထိန်းချုပ်ထားသည့် ဘုရားတောင်၊ရေပူ၊ညောင်လေးပင် နှင့် နန်းတုတ် ဒေသ တစ်လျှောက်ကို ပြန်လည်ထိန်းချုပ်ရန် ကြိုးပမ်းနေခြင်းဟု လည်း ၎င်းက ပြောသည်။
PNO ၏ ထိုးစစ်နှင့်အင်းလေးပြည်သူ့ကာကွယ်ရေးတပ် IPDF အမှတ် ၁၀၀၉တပ်ရင်း၊ ပျားစစ်ကြောင်း ၊ ဖယ်ခုံမြို့နယ်ပြည်သူ့ကာကွယ်ရေးတပ်ရင်း-၂ PK- PDF-2 အမှတ် ၁၀၀၆ တပ်ရင်းနှင့်အလယ်ပိုင်းတိုင်းအထူးစစ်ဆင်ရေးတပ်ဖွဲ့များပူးပေါင်း၍ သုံးနာရီခွဲ ကြာ တိုက်ပွဲဖြစ်ပွားခဲ့သည်။
တိုက်ပွဲအတွင်းစစ်ကောင်စီကလေယာဉ်ဖြင့်သုံးကြိမ်ကြိမ်၊လက်နက်ကြီးဖြင့်အကြိမ်ရေ (၅၀)ခန့် ပစ်ကူပေးခဲ့သော်လည်း တပ်ပေါင်းစု၏ ရဲဘော်များအထိအခိုက်မရှိဘဲ အောင်မြင်စွာ ခုခံတိုက်ခိုက်နိုင်ခဲ့ကြောင်းအသိပေးသည်။
တိုက်ပွဲအတွင်း PNO ဘက်မှငါးဦးထက်မနည်း သေ ဆုံးပြီး လေးဦးအရှင်ဖမ်းဆီးရမိကာ သေနတ် ၅ လက် ၊ကျည်ဘောက်ကိုးခုနှင့်ကျည်အချို့ကို သိမ်းဆည်းရရှိခဲ့ကြောင်းဖော်ပြသည်။
ယခုနှစ်ဇန်နဝါရီ ၃၀ ရက်ကလည်း ညောင်ရွှေမြို့နယ် ရန် စစ်တပ်နှင့်ပအိုဝ်းပြည်သူ့စစ် PNA ကပူး ပေါင်း၍ ရေပူရွာအရှေ့ဘက်ရေချောင်း ထိုးစစ်ဆင်မှုကို IPDF နှင့်ပူးပေါင်းတပ်က တိုက်ခိုက်ခဲ့ရာ စစ်အုပ်စုမှ လေးဦးထက်မနည်းသေဆုံးကြောင်းထုတ်ပြန်ထားသည်။
