အိမ်သွင်/People’s Spring
အာရက္ခတပ်တော်(AA) က ဓညဝတီရေတပ်စခန်းကို စတင်တိုက်ခိုက်ခဲ့ပြီးနောက် စစ်ကောင်စီကကျောက်ဖြူမြို့နယ်အတွင်း ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ အရပ်သားထိခိုက်သေဆုံးမှုများရှိကြောင်း ဒေသခံများကပြောသည်။
“လေကြောင်းတိုက်တာ မနေ့က။ ဒီမနက် တိုက်ပွဲငြိမ်နေပေမယ့်စကစကရမ်းပစ်နေတာ ရှိနေတယ်။ လေကြောင်းတိုက်ခိုက်မှုမှာ ရှောက်ချောင်းရွာက ဒေသခံတွေထိခိုက်သေဆုံးတာရှိတယ်” ဟု ကျောက်ဖြူမြို့ခံတဦးကပြောသည်။
AA က ကျောက်ဖြူမြို့နယ် ၊သစ်ပုတ်တောင်ကျေးရွာအနီးရှိ ဓညဝတီရေတပ်စခန်းဌာနချုပ်ကို ဖေဖော်ဝါရီလ၂၁ရက်နေ့ ညတွင်လက်နက်ကြီးဖြင့် စတင်ပစ်ခတ်တိုက်ခိုက်ခဲ့သည်။ထို့အပြင် ဓညဝတီရေတပ်စခန်းနှင့် မိုင်အနည်းငယ်အကွာရှိ ရွာတစ်ရွာတွင် စစ်ကောင်စီ၏မြေပြင်စစ်ကြောင်းနှင့် AA တိုက်ပွဲခဲ့သေးကြောင်းလည်း ဒေသခံတဦးကပြောသည်။
Public Service Announcement
ရေတပ်စခန်းတိုက်ခိုက်ခံရပြီးနောက်စစ်ကောင်စီက ကျောက်ဖြူမြို့နယ် ရှောက်ချောင်းနှင့် စိုင်ခြုံကျေးရွာကို ဖေဖော်ဝါရီလ၂၃ရက် ည ၇နာရီခန့်တွင် ဗုံးကြဲခဲ့ကြောင်း ဒေသခံအချို့က ပြောသည်။ ရှောက်ချောင်းရွာမှ ဒေသခံအချို့ ထိခိုက်သေဆုံးမှုရှိသော်လည်း ဖုန်းလိုင်းဆက်သွယ်ရေးအခက်အခဲကြောင့် အသေးစိပ်မသိရသေးကြောင်း ကျောက်ဖြူမြို့ခံတစ်ဦးက People’s Spring သို့ပြောသည်။
ကျောက်ဖြူတွင် ဓညဝတီရေတပ်စခန်းအပြင် တောင်မော်ကြီးရေတပ်စခန်းနှင့် အုန်းကျွိန်ရေတပ် စခန်းတို့ရှိသည်။ကျောက်ဖြူတိုက်ပွဲသတင်းကို AAက ယနေ့အထိ မထုတ်ပြန်သေးပေ။
ဖေဖော်ဝါရီလဆန်းမှစ၍ ရေတပ်စခန်းသုံးခု၏ဘေးပတ်ဝန်းကျင်ရွာများကို စစ်ကောင်စီကလက်နက်ကြီးများဖြင့်ပစ်ခတ်နေသောကြောင့် ကာပီချောင်း၊ ပေါင်းနက်ချေ၊ ကြက်တောပြင်ရွာအပါအဝင် ဆယ်ရွာထက်မနည်းမှဒေသခံများ နေရပ်စွန့်ခွာတိမ်းရှောင်နေကြရသည်ဟု ဒေသခံအချို့ကပြောသည်။
AA က ရခိုင်ပြည်နယ်တွင် စစ်တွေ ၊ကျောက်ဖြူ ၊မာန်အောင်မြို့နယ်မှအပ ကျန် ၁၄ မြို့နယ်ကိုသိမ်းပိုက်ထားသည်။ ထို့အပြင် ချင်းပြည်နယ် ပလက်ဝ မြို့နယ်ကိုလည်း သိမ်းပိုက်ထိန်းချုပ်ထားသည်။
ယခါအခါ စစ်တွေမြို့နယ်တွင်လည်း တိုက်ပွဲများဆက်လက်ဖြစ်ပွာယနေပြီး စစ်ကောင်စီသည် လက်နက်ကြီးများဖြင့်ပစ်ခတ်နေသည်။စစ်တွေမြို့တွင်တိုက်ပွဲပြင်းထန်နေစဉ် စစ်ကောင်စီက ပေါက်တောမြို့ကို လေကြောင်းမှ ဗုံးကြဲတိုက်ခိုက်ရာဒေသခံပြည်သူများ သေဆုံး ထိခိုက်မှုများရှိခဲ့သည်။
စစ်ကောင်စီက ပေါက်တောမြို့နယ် တွင်ဖေဖော်ဝါရီ ၂၀ ရက် နေ့လယ်တွင် Y-12လေယာဉ်ဖြင့် ဗုံးအလုံး ၄၀ ခန့်ကြဲချခဲ့သောကြောင့် သဲခုံရွာ၊မညှင်းကိုင်း၊ ပြင်မ၊ကျောက်တောင်၊ ဆင်တက်မော်တောတန်းရွာ၊ဆင်တက်မော်ဘောဒလီရွာ၊ဆင်တက်မော် (မွတ်ဆလင်ရွာ)၊ အနောက်ရဲ(မွတ်ဆလင်ရွာ) တို့မှ ကလေးငယ်နှစ်ဦး အပါအဝင် ၄ဦး သေဆုံးပြီး ၁၇ ဦး ဒဏ်ရာခဲသည်။
ကျောက်ဖြူမြို့တွင် တရုတ်အစိုးရရင်းနှီးမြှုပ်နှံထားသည့် ကျောက်ဖြူရေနက်ဆိပ်ကမ်း၊ စီမံကိန်း၊ မြန်မာ-တရုတ်သဘာဝဓာတ်ငွေ့ပိုက်လိုင်းစီမံကိန်းစသောရင်းနှီးမြုပ်နံမှု စီမံကိန်းများ ရှိနေသည်။ တရုတ်အစိုးရ၏ စီမံကိန်းနေရာများတွင် တရုတ်လုံခြုံရေးတပ်ဖွဲ့ဝင်များ ရောက်ရှိနေကြောင်း သတင်းများထွက်ပေါ်နေသော်လည်း အသေးစိတ် မသိရသေးပေ။ စစ်တွေနှင့် ကျောက်ဖြူမြို့နယ်တိုက်ပွဲတွင် နိုင်ငံတကာရင်းနှီးမြုပ်နှံမှုများ မထိခိုက်အောင် AAက သတိထား၍ စစ်ရေးဖော်ဆောင်နေရသည်ဟု AAနှင့် နီးစပ်သည့် သတင်းရင်းမြစ်အချို့ကပြောသည်။
AA က မည်သည့်နိုင်ငံခြားရင်နှီးမြှုပ်နှံမှုမျိုးကိုမဆို အသိအမှတ်ပြု ကြိုဆိုပြီး ရင်းနှီးမြှုပ်နှံမှုစီမံကိန်းများ၊ လာရောက်ရင်းနှီးမြှုပ်နှံသူများ၏လုံခြုံရေး၊အသက်အန္တရာယ်တို့ကို အထူးဂရုစိုက် ကာကွယ်စောင့်ရှောက်သွားမည်ဟုပြီးခဲ့သည့် ၂၀၂၄ ဒီဇင်ဘာလ၂၉ရက်နေ့တွင် တရားဝင်ထုတ်ပြန်ခဲ့သည်။
