မြန်မာနိုင်ငံမှာ မိုင်းရှင်းလင်းရေး နိုင်ငံတကာစံမီလုပ်ဆောင်ချက် လုံးဝမရှိ
လီလီယန်/People’s Spring
မြန်မာနိုင်ငံဟာ ၂၀၂၃ ခုနှစ်အတွင်း ကမ္ဘာပေါ်မှာ မြေမြှုပ်မိုင်းနဲ့ ပေါက်ကွဲစေတတ်သော စစ်လက်နက်တွေကြောင့် ထိခိုက်သေဆုံးမှု အများဆုံးနိုင်ငံအဖြစ် မှတ်တမ်းဝင်ခဲ့ပြီး အရပ်သားကာကွယ်စောင့်ရှောက်ပေးရေးအတွက် အရေးအကြီးဆုံးအချိန်ဖြစ်တယ်လို့ ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးရုံး(OCHA)က ဒီနေ့ (ဖေဖော်ဝါရီ ၂၆ရက်) ထုတ်ပြန်ပါတယ်။
စစ်အာဏာသိမ်းထားတဲ့ မြန်မာနိုင်ငံဟာ ဆီရီးယားနဲ့ အာဖဂန်နစ္စတန်နိုင်ငံတို့ကို ကျော်ဖြတ်ပြီး ၂၀၂၃ ခုနှစ် ကမ္ဘာပေါ်မှာ မြေမြှုပ်မိုင်းနဲ့ ပေါက်ကွဲစေတတ်သော စစ်လက်နက်တွေကြောင့် ထိခိုက်သေဆုံးမှုအများဆုံး နိုင်ငံအဖြစ် စာရင်းဝင်ခဲ့ပါတယ်။
Public Service Announcement
မြန်မာဟာ ၂၀၂၃ ခုနှစ်အတွင်း မြေမြှုပ်မိုင်းနဲ့ ပေါက်ကွဲစေတတ်သော စစ်လက်နက်တွေကြောင့် ထိခိုက်သေဆုံးမှုအရေအတွက် ၁၀၀၃ ခုဖြစ်ပွားခဲ့ပြီး ဒုတိယနေရာက ဆီးရီးယားဟာ ၉၃၃ခုနဲ့ တတိယနေရာက အာဖဂန်နစ္စတန်က ၆၅၁ ခု ဖြစ်ပွားခဲ့တယ်လို့ OCHA က ဆိုပါတယ်။
မိုင်းအန္တရာယ်ကင်းရှင်းရေးလှုပ်ရှားမှုဟာ မိုင်းအန္တရာယ်အသိပညာပေးခြင်းနဲ့မြေမြှုပ်မိုင်းဒဏ်ခံရသူတွေကိုအကူအညီပေးရာမှာ အရေးပါတဲ့ကဏ္ဍတစ်ခုဖြစ်ကြောင်းနဲ့ အဲဒီအတွက် ရန်ပုံငွေလည်း အရေးတကြီး လိုအပ်လျက်ရှိတယ်လို့ OCHA က ထုတ်ပြန်ပါတယ်။
မြန်မာနိုင်ငံမှာ လူသားချင်းစာနာထောက်ထားမှုဆိုင်ရာ မိုင်းရှင်းလင်းရေးအစီအစဥ် ဒါမှမဟုတ် အပြည်ပြည်ဆိုင်ရာ စံချိန်စံညွှန်းများအရ မိုင်းရှင်းလင်းခြင်း လုပ်ဆောင်ချက်မှာ ၀ ရာခိုင်နှုန်း(လုံးဝမရှိဘူး) ဖြစ်တယ်လို့ မြေမြှုပ်မိုင်းလေ့လာစောင့်ကြည့်ရေးအဖွဲ့(Landmine & Cluster Munition Monitor)က ဆိုပါတယ်။
စစ်အာဏာသိမ်းပြီးနောက် မြန်မာနိုင်ငံ မြို့ပေါင်း ၁၉၀ကို တိုးပွားလာနေတဲ့ သံသယဖြစ်ဖွယ်မြေမြှုပ်မိုင်းအန္တရာယ်ရှိတဲ့ နေရာများအဖြစ် သတ်မှတ်ထားပြီး ၂၀၂၃ ခုနှစ် တနှစ်တည်း အဲဒီမြို့နယ်တွေမှာ အရပ်သားသေဆုံးမှု ၁၃၄မှု ရှိခဲ့တယ်လို့ သိရပါတယ်။
ပြီးခဲ့တဲ့ ၂၀၂၃ ခုနှစ်အတွင်း ပေါက်ကွဲစေတတ်သော စစ်အကြွင်းအကျန်များကြောင့် သေဆုံးသူအများစုထဲ ကလေးငယ်များပါဝင်ပြီး အမျိုးသမီးနဲ့ ကလေးငယ်များ ထိခိုက်သေဆုံးမှုမှာ ပဋိပက္ခဖြစ်ပွားပြီးချိိန်မှာ ပိုမိုများပြားလာတယ်လို့ မြေမြှုပ်မိုင်းစောင့်ကြည့်ရေးအဖွဲ့က ထုတ်ပြန်ပါတယ်။
၂၀၀၇ ခုနှစ်မှ ၂၀၂၃ ခုနှစ်အတွင်း မြေမြှုပ်မိုင်းစောင့်ကြည့်ရေးအဖွဲ့ရဲ့ မှတ်တမ်းများအရ အရပ်သားများ မြေမြှုပ်မိုင်းကြောင်း ထိခိုက်သေဆုံးမှု ဖြစ်ပွားရတဲ့အကြောင်းအရင်းများမှာ မိုင်းရှိရာ ဒေသများသို့ ရွှေ့ပြောင်းသွားလာခြင်၊ သစ်တောထွက်ကုန်ပစ္စည်းများ စုဆောင်းခြင်း၊ အမဲလိုက်ခြင်းနဲ့ ငါးဖမ်းခြင်းများ၊ မိုင်းရှိရာ ဒေသများမှာ လယ်ယာလုပ်ကိုင်ခြင်း၊ ပေါက်ကွဲစေတတ်သော ပစ္စည်းများအား ကိုင်တွယ်ခြင်းနဲ့ လက်နက်ကိုင် ပဋိပက္ခဇုန်မှ ထွက်ပြေးခြင်း၊ ပဋိပက္ခအပြီး ပြန်လာခြင်းနဲ့ အခြားအကြောင်းများကြောင့် ဖြစ်တယ်လို့ သိရပါတယ်။
