အခုနှစ် ၂ လတာကာလအတွင်း အကျဉ်းထောင်တွေမှာ သေဆုံးရတဲ့ နိုင်ငံရေးအကျဉ်း သား ၄ ဦးထိ ရှိလာပြီလို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်ထားတဲ့ အချက်အလက်တွေအရသိရပါတယ်။
ထောင်တွင်းဆုံးပါးခဲ့ရသူနိုင်ကျဉ်းတွေ မှာ အမျိုးသမီး ၁ ဦး ၊အမျိုးသား ၃ ဦးတို့ဖြစ်ပြီး မန္တလေးအိုးဘိုထောင်က ၂ ဦး ၊ ပဲခူးတိုင်း သာယာဝတီထောင်က ၁ ဦး ၊ ဒိုက်ဦးထောင်က ၁ ဦးတို့ ဖြစ်ကြပါတယ်။
၂၀၂၅ ခုနှစ် ၊ဇန်နဝါရီလ ၊ ဖေဖော်ဝါရီ ၂ လတာကာလအတွင်းနိုင်ကျဉ်း တွေ သေဆုံးခဲ့ရတဲ့ အိုးဘိုထောင် ၊ သာယာဝတီထောင်နဲ့ ဒိုက်ဦးထောင်တို့ကို Google Earth က တွေ့ရပုံ ၂၀၂၅ ခုနှစ် ၊ဇန်နဝါရီလ ၊ ဖေဖော်ဝါရီ ၂ လတာကာလအတွင်းနိုင်ကျဉ်း တွေ သေဆုံးခဲ့ရတဲ့ အိုးဘိုထောင် ၊ သာယာဝတီထောင်နဲ့ ဒိုက်ဦးထောင်တို့ကို Google Earth က တွေ့ရပုံ
ဇန်နဝါရီလ ၅ ရက်က သာယာဝတီထောင်မှာ လက်နက် မှု နဲ့ ထောင် ၃ နှစ်ကျခံနေရတဲ့ ကိုသူရအောင် ရုတ်ရက်အမောဖောက်ပြီး ဆုံးပါးရသလို ရက်ပိုင်းအကြာ ဇန်နဝါရီ ၁၀ ရက်မှာတော့ ဒိုက်ဦးထောင်မှာ အကြမ်းဖက်ပုဒ်မတွေနဲ့ ထောင် ၁၁ နှစ် ချခံထားရသူ ကိုမျိုးမင်းဦး လည်း ဆီးကျောက် ဝေဒနာ နဲ့ အသက်ဆုံးရှုံးခဲ့ရတယ်လို့ PPNM က ဖော်ပြပါတယ်။
Public Service Announcement
ကျန်တဲ့ နိုင်ကျဉ်း အမျိုးသားနဲ့ အမျိုးသမီး ၂ ဦးတို့ကတော့ အိုးဘိုထောင်က ဖြစ်ပြီး ဖေဖော်ဝါရီလမှာပဲ သေဆုံးခဲ့ရတာပါ။
အမျိုးသမီး က အသက် ၆၅ နှစ်အရွယ် ဒေါ်စန်းရီ ဖြစ်ပြီး သူ့ကို စစ်တပ်အာဏာသိမ်းစ ဧပြီလ တတိယပတ်အတွင်း မန္တလေး ၊ချမ်းမြသာစည် မြို့နယ် ၊ အမှတ် (၁၀) ရဲစခန်း ဗုံးခွဲသူ လူငယ် တွေကို လက်ခံထားတယ်ဆိုတဲ့စွပ်စွဲချက်နဲ့ ထောင် ၂၂ နှစ်ချထားတာပါ။
ဒေါ်စန်းရီ ဟာ ဖေဖော်ဝါရီ ၁၀ ရက်မှာ သွေးတိုး၊ ဆီးချို၊ နှလုံး၊အသည်းရောဂါ ဝေဒနာတွေနဲ့ ဆုံးပါးခဲ့တယ်လို့ PPNM က ဆိုပါတယ်။
ရှစ်ရက်အကြာ ဖေဖော်ဝါရီ ၁၈ ရက်က အိုးဘိုထောင်မှာပဲ ပုဒ်မ ၅၀၅ (က) နဲ့ထောင် ၃ နှစ် ချခံရသူ ကိုအောင်ထွန်း ထပ်မံသေဆုံးခဲ့ရတယ်လို့သိရပါတယ်။
ကိုအောင်ထွန်းဟာ ကျန်းမာရေးကောင်းမွန်သူဖြစ်ပြီး အိုးဘိုထောင်မှ ခန္ဓာကိုယ်မှာ အနာတွေ ပေါက်လာပြီး အနာပိုးဝင်ကာ ထောင်ဆေးရုံမှာ တက် ရောက်ကုသမှု ခံယူခဲ့ပေမယ့် တစ်ပတ်ခန့်အကြာမှာ သေဆုံးခဲ့ရတယ်လို့ PPNM က ဖော်ပြပါတယ်။
ကိုအောင်ထွန်းသေဆုံးရတဲ့အကြောင်းရင်းကို စိစစ်ဖို့ လိုအပ်တယ်လို့လည်း PPNM က အသိပေးပါတယ်။
၂၀၂၁ ခုနှစ် မှာ စစ်တပ်ရဲ့ တကျော့ပြန်အာဏာသိမ်းမှုအပြီး အာဏာသိမ်းမှုကိုဆန့်ကျင်မှုတွေနဲ့ ပတ်သက်ပြီး စစ်ကောင်စီက ၂၈,၆၇၇ ဦးကို ဖမ်းဆီးခဲ့တယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP ) က ဖော်ပြပါတယ်။
ဖမ်းဆီးခံရတဲ့ နိုင်ငံရေးအကျဉ်းတွေဟာ ဆိုးရွားလှတဲ့ထောင်တွင်း ဖိနှိပ်မှုတွေ ၊ လူ့အခွင့်အရေးချိုးဖောက်မှုတွေ ကြုံတွေ့ရတဲ့အပြင် ကျန်းမာရေးစောင့်ရှောက်မှု လုံလုံလောက်လောက်မပေးတဲ့အတွက် ဒါဇင်နဲ့ချီပြီး အသက်ဆုံးရှုံးခဲ့ရသူတွေ ရှိခဲ့ပါတယ်။
