'/%3E%3C/svg%3E){kind=small}
စစ်တပ်အာဏာသိမ်းထားတဲ့ ၄ နှစ်တာကာလအတွင်း ချင်းပြည်နယ်မှာ လေကြောင်းတိုက်ခိုက်မှု အကြိမ်ရေ ၁၈၀ ကျော် ကြုံခဲ့ရပြီး သေဆုံးသူ ၁၆၀ နီးပါး ရှိခဲ့တယ်လို့ ချင်းရေးရာအဖွဲ့ချုပ်က မတ်လ ၄ ရက်မှာစာရင်းဖော်ပြပါတယ်။
အာဏာသိမ်း ၄ နှစ်တာကာလအတွင်း ချင်းပြည်နယ်ကို စစ်ကောင်စီလေတပ်က ဗုံးအလုံးရေ ၉၀၀ ကျော်ကြဲ ချတိုက်ခိုက်ခဲ့တာလို့ ချင်းရေးရာအဖွဲ့ချုပ်က ဆိုပါတယ်။
ချင်းပြည်နယ်အတွင်းလေကြောင်းတိုက်ခိုက်မှုတွေကြောင့် သေဆုံးရသူ ၁၆၀ နီးပါးထဲမှာ အရပ်သား ပြည်သူ ၁၀၀ ကျော်ပါဝင်ပြီး ချင်းတော်လှန်ရေးတပ်ဖွဲ့ဝင်ကတော့ ၅၆ ဦးထက်မနည်းပါတယ်လို့ သိရပါတယ်။
Public Service Announcement
ဒါအပြင် ထိခိုက်ဒဏ်ရာရသူ ချင်းတိုင်းရင်းသား ၂၅၀ ကျော် ရှိခဲ့တယ်လို့ ချင်းရေးရာအဖွဲ့ချုပ်က ဖော်ပြပါတယ်။ ချင်းပြည်နယ်အတွင်း လေကြောင်းတိုက်ခိုက်ခံရမှုအများဆုံးမြို့နယ်ကတော့ မင်းတပ်မြို့နယ်ဖြစ်ပါတယ်။
မင်းတပ်ပြီးရင် ဖလမ်း ၊ ဟားခါး ၊ ထန်တလန် ၊တီးတိန်မြို့နယ်တွေကလည်း လေကြောင်းတိုက်ခိုက်မှုကို အကြုံရဆုံး မြို့တွေထဲပါဝင်တယ်လို့သိရပါတယ်။
ချင်းပြည်နယ်ပြင်ပမှာဆိုရင်လည်း ချင်းတိုင်းရင်းသားတွေ နေထိုင်ရာဒေသတွေ လေကြောင်းတိုက်ခိုက်ခံရလို့ အရပ်သား ချင်းတိုင်းရင်းသား ၁၀၀ကျော် အသက်ဆုံးပါးခဲ့ရပြီး ချင်းတော်လှန်ရေးတပ်ဖွဲ့ဝင် ၂၀ ထက်မနည်းသေဆုံးရတယ်လို့ ချင်းရေးရာအဖွဲ့ချုပ်ရဲ့စာရင်းမှာ ပါရှိပါတယ်။
ချင်းပြည်နယ်ပြင်ပမှာ လေကြောင်းတိုက်ခိုက်မှုကြောင့် ဒဏ်ရာရသူကလည်း ၂၄၀ ကျော်ရှိတယ်လို့အသိပေးထားပါတယ်။
လေကြောင်းတိုက်ခိုက်မှုတွေကြောင့် လူနေအိမ် အဆောက်အဦး ၁, ၃၈၄ ကျော် ၊ ဘာသာရေးအဆောက်အဦး ၃၉လုံး ၊ ဌာနဆိုင်ရာ အဆောက်အဦး ၄၀ ကျော်လည်းပျက်စီးဆုံးရှုံးခဲ့ရတယ်လို့ သိရပါတယ်။
