သေဆုံးသူများတွင် ကလေးငယ် ၂၀ကျော် ပါဝင်
ဟန်နွေ/People’s Spring
အာဏာသိမ်းစစ်ကောင်စီ၏ လေကြောင်းတိုက်ခိုက်မှုများကြောင့် ပြီးခဲ့သည့် ဖေဖော်ဝါရီအတွင်း အသက် ၁၈နှစ်အောက် ကလေးငယ် ၂၂ဦးအပါအဝင် ပြည်သူ ၁၄၂ဦး သေဆုံးခဲ့ရကြောင်း အမျိုးသားညီညွတ်ရေးအစိုးရ(NUG) လူ့အခွင့်အရေးဆိုင်ရာ ဝန်ကြီးဌာနက ထုတ်ပြန်သည်။
စစ်ကောင်စီ၏ လူ့အခွင့်အရေးချိုးဖောက်မှု အခြေအနေကို ဖော်ပြရာ စစ်အုပ်စု၏ လူ့အခွင့်အရေးချိုးဖောက် ကျူးလွန်မှုမှာ ဖေဖော်ဝါရီအတွင်း ၆၀၄မှုရှိကြောင်း၊ ကောက်ယူရရှိသည့် အချက်အလက်များကို သာထုတ်ပြန်ခဲ့ခြင်းဖြစ်၍ မြေပြင်၌ ယခုထက် အရေအတွက်ပိုများနိုင်ကြောင်း အသိပေးသည်။
Public Service Announcement
လူ့အခွင့်အရေးချိုးဖောက်မှုများကို ဇယားဖြင့် ဖော်ပြခဲ့ရာ လေကြောင်းတိုက်ခိုက်မှုကြောင့် ပြည်သူသေဆုံးထိခိုက်မှု၊ နေအိမ်အဆောက်အဦး ပျက်စီးမှုများအား အသိပေးထားသည်။
ဖေဖော်ဝါရီအတွင်း လေကြောင်း တိုက်ခိုက်မှုများကြောင့် ပြည်သူ ၁၄၂ဦး သေဆုံးခဲ့ရာ စစ်ကိုင်းတိုင်း မှ ၄၈ဦးဖြင့် အများဆုံးဖြစ်ပြီး မကွေး၊ ကချင်၊ ရက္ခိုင်၊ ရှမ်း၊ မန္တလေး၊ မွန်၊ ပဲခူး၊ ကရင်၊ ကရင်နီနှင့် တနင်္သာရီ ဒေသများရှိ ပြည်သူများလည်း အသက်ဆုံးရှုံးခဲ့ရသည်။
လေကြောင်းတိုက်ခိုက်မှုများကြောင့် ပြည်သူ ၃၆၈ ဦး ဒဏ်ရာရရှိခဲ့ရာ အသက် ၁၈နှစ်အောက် ကလေးငယ် ၃၁ဦး ပါဝင်သည်ဟု အသိပေးသည်။
လေကြောင်း တိုက်ခိုက်မှုအပြင် စစ်ကောင်စီက အစုလိုက်၊အပြုံလိုက် သတ်ဖြတ်မှုများ ကျူးလွန်ခဲ့ရာ မကွေး၊ စစ်ကိုင်း၊ မန္တလေးနှင့် ကချင်ပြည်နယ်များ၌ အစုလိုက်အပြုံလိုက် သတ်ဖြတ်ခံရသည့် ဖြစ်စဉ် ၁၀ခုရှိခဲ့ပြီး ပြည်သူ ၇၀ဦးသေဆုံးခဲ့ရဟု ထုတ်ပြန်သည်။
စစ်ကောင်စီ၏ လေကြောင်းတိုက်ခိုက်မှုများကြောင့် ဖေဖော်ဝါရီလအတွင်း ဘာသာရေးဆိုင်ရာ အဆောက်အဦး ၂၇လုံး၊ ကျန်းမာရေးဆိုင်ရာ အဆောက်အဦး ၁၅လုံး၊ စာသင်ကျောင်း ၁၂ကျောင်း၊ ပြည်သူလူထုနေအိမ် ၂၁၉လုံး ပျက်စီးခဲ့ရကြောင်း NUGက အသိပေးသည်။
