ကချင်ပြည်နယ်၊ ဖားကန့် မြို့နယ်တွင် အာဏာရှင်ဆန့်ကျင်ရေး သပိတ်အင်အားစုများ စုပေါင်းကာ အပြည်ပြည်ဆိုင်ရာ အလုပ်သမားရေးရာအဖွဲ့အစည်း (ILO)က ဖွဲ့စည်းပုံ ဒအခြေခံဥပဒေ ပုဒ်မ (၃၃)အရ စစ်ကောင်စီအား ချက်ချင်းအရေးယူနိုင်ရေး ဆန္ဒပြလှုပ်ရှားမှုကို ယနေ့ (မတ်လ ၁၅) ပြုလုပ်ခဲ့သည်။
ဆန္ဒပြသူများက “ILO implement Article33 On Myanmar Now 2025” ၊ “ပြည်သူသာ အဓိက” ၊ “ဖိနှိပ်သူတွေ စည်းလုံးရင် အဖိနှိပ်ခံတွေ တော်လှန်ကြ” ၊ “ILO – we need Article 33 to – Stop Forced Labor.- Stop Child Soldiers.- Stop Forced Military Conscription.- Stop bombing villages” စသည့်စာသားများ ကိုင်ဆောင်ပြီး ဆန္ဒထုတ်ဖော်ခဲ့သည်။
ထို့အပြင် “၂ဝ၂၅ ILOပုဒ်မ(၃၃) အရချက်ချင်းအရေးယူပေး” ၊ “ဖက်ဆစ်စစ်အာဏာရှင် မုချကျရှုံးရမည်” ၊”What do we want – ILO Action” ၊ “When do we want it – Now” ၊ “ILO ILO – Take Action” ၊ “Free Free – Myanmar” ၊ “အရေးတော်ပုံ_အောင်ရမည်” စသည့် ကြွေးကြော်သံများ ဟစ်ကြွေး၍ ချီတက်ခဲ့ကြသည်။
Public Service Announcement
ယင်းဆန္ဒပြလှုပ်ရှားမှုတွင် စစ်အာဏာရှင်ဆန့်ကျင်ရေးလူထုကွန်ရက်(ဖားကန့်မြို့နယ်)၏ အဖွဲ့ဝင်များ၊ နွေဦးသစ္စာအဖွဲ့၊ နွေဦးရောင်နီ(တာမခံအဖွဲ့)နှင့် ဖားကန့်မှော်လှည့်သပိတ်အင်အားစု စသည့် ဖားကန့်မြို့နယ်မှ အရပ်ဖက်တော်လှန်ရေးအင်အားစုများ ပူးပေါင်းပါဝင်ခဲ့ကြသည်။
“အကြမ်းဖက်စစ်တပ်က ILO စုံစမ်းစစ်ဆေးရေး ကော်မရှင်ရဲ့ တိုက်တွန်းချက်တွေကို လေးစားလိုက်နာ အကောင်အထည်ဖော်မှု လုံးဝ မရှိသည့်အတွက် ဘယ်လို အရေးယူဆောင်ရွက်ရမလဲဆိုတာကို မတ်လ ၁၀ ရက်နေ့ကနေ ၂၁ ရက်နေ့အထိ ကျင်းပပြုလုပ်နေတဲ့ ILO Governing Body -ILO အမှုဆောင်အစည်းအဝေးမှာ ဆွေးနွေးလျှက်ရှိပါတယ်။ ဒီအစည်းအဝေးမှာ အကြမ်းဖက်စစ်ကောင်စီကို ပြင်းပြင်းထန်ထန် ထိထိရောက်ရောက် အရေးယူနိုင်ရေး ကချင်ပြည်နယ်ဖားကန့်လူထုက အလိုရှိပါတယ်။ ဒါကြောင့် ILOရဲ့အဖွဲ့ဝင်နိုင်ငံတွေ ပြည်သူ့အသံကို သိရှိစေဖို့အတွက် အခုလိုဆန္ဒပြရခြင်းဖြစ်တယ်”ဟု သပိတ်ဦးဆောင်သူများက ဆိုသည်။
