မတ်၂၇၊၂၀၂၅။ ရဲခေါင်/People’s Spring
ရှေ့တန်းရောက် စစ်ကောင်စီတပ်သား လေးဦး အလင်းဝင်ခိုလှုံလာကြောင်း ကရင်နီအမျိုးသားများကာကွယ်ရေးတပ်(KNDF) အမှတ်(၅)တပ်ရင်းက ယနေ့(မတ်လ ၂၇ရက်) ထုတ်ပြန်သည်။
မတ်လ ၂၆ရက်တွင် စစ်ကောင်စီတပ်သား လေးဦးသည် MA1တစ်လက်နှင့်အတူထွက်ပြေးကာ အလင်းဝင်ခိုလှုံလာခြင်းဖြစ်ပြီး သုံးဦးမှာ အဓမ္မစစ်မှုထမ်းတပ်သားသစ်ဖြစ်ပြီးနှင့် တစ်ဦးမှာ စစ်ဘက်တာဝန်ထမ်းဆောင်ခဲ့သူဟု အသိပေးသည်။
အဆိုပါတပ်သားများသည် စစ်ကောင်စီတပ်အတွင်း ၎င်းတို့စိတ်ဆန္ဒအရ ဝင်ရောက်ခဲ့ခြင်းမဟုတ်ဘဲ အတင်းအဓမ္မ စုဆောင်းခံရပြီး တပ်တွင်းရောက်လာရသူများဟု ဆိုသည်။
Public Service Announcement
အလင်းဝင်လာသော စစ်ကောင်စီတပ်သား လေးဦးအား ကရင်နီအမျိုးသားများကာကွယ်ရေးတပ်(KNDF) အမှတ်(၅)တပ်ရင်း ရဲဘော်များက ခေါ်ဆောင်လာစဉ်။ ဓာတ်ပုံ – Karenni Nationalities Defense Force B – 05 အလင်းဝင်လာသော စစ်ကောင်စီတပ်သား လေးဦးအား ကရင်နီအမျိုးသားများကာကွယ်ရေးတပ်(KNDF) အမှတ်(၅)တပ်ရင်း ရဲဘော်များက ခေါ်ဆောင်လာစဉ်။ ဓာတ်ပုံ – Karenni Nationalities Defense Force B – 05 ဓာတ်ပုံ – Karenni Nationalities Defense Force B – 05
စစ်ကောင်စီက သင်တန်းပို့ချနေသည့် ကာလများတွင်လည်း ထွက်ပြေးရန် အကြိမ်ကြိမ်ကြိုးစားခဲ့သော်လည်း လွတ်မြောက်ခြင်းမရှိခဲ့ပဲ ရှေ့တန်းစစ်မြေပြင်သို့ အဓမ္မပို့ဆောင်ခံခဲ့ရကြောင်း ၎င်းတို့က ဆိုသည်။
အလင်းဝင်လာသည့် စစ်ကောင်စီတပ်သားများ၏ အချက်အလက်များကိုမူ KNDF တပ်ရင်း(၅)က ဖော်ပြမထားပေ။
“KNDF ဗျူဟာ ၆ ရဲ့နယ်မြေထဲကနေ ဝင်လာတာဆိုတော့ ဗျူဟာ ၆က ဒီးမော့ဆိုနဲ့ ဖရူဆို အခြေပြုထားတာ။အဲဒီဘက်ကနေ ခိုလှုံတာလို့ပဲ အကြမ်းဖျင်းပြောလို့ရမယ်”ဟု ကရင်နီစစ်ဘက်သတင်းရင်းမြစ်က လူထုနွေဦးသို့ ပြောသည်။
တော်လှန်ရေးကြာမြင့်လာသည်နှင့်အမျှ စစ်ကောင်စီဘက်တွင် စစ်ဆင်ရေးများအထိနာ၍ တပ်သားပျောက်ဆုံးမှုများ တိုးလာခြင်း၊ လူ့စွမ်းအား ပြတ်လပ်လာခြင်းစသည့် ပြဿနာများကြောင့် မတရားဖမ်းစီး၍ လူသစ်စုဆောင်းမှုများ တိုးမြှင့်လုပ်ဆောင်လာသည်ကို တွေ့ရှိရကြောင်း ထုတ်ပြန်ချက်၌ ဖော်ပြ သည်။
ထိုသို့ အတင်းအဓမ္မဖမ်းစီးမှုများကြောင့် ထွက်ပြေးဘတ်ပြောင်းသူများ ပိုမိုများပြားလာခြင်းဟုလည်း KNDF တပ်ရင်း (၅)က ဆိုသည်။ဘတ်ပြောင်းခိုလှုံလာသော စစ်ကောင်စီတပ်ဖွဲ့ဝင်များကို သက်ဆိုင်ရာဌာနသို့ လွဲပြောင်း၍ လုံခြုံဘေးကင်းစွာ စောင့်ရှောက်ထားပြီးဖြစ်ကြောင်းအသိပေးသည်။
ထို့အပြင် ကျန်ရှိနေသော စစ်ကောင်စီအောက်တွင် တာဝန်ထမ်းဆောင်နေသည့် တပ်ဖွဲ့ဝင်များအနေဖြင့် အာဏာရှင်စစ်ကောင်စီအား ကျောခိုင်း၍ ပြည်သူလူထုအား မျက်နှာမှုကာ လာရောက်ပူးပေါင်းရန် KNDF က ဖိတ်ခေါ်ထားသည်။
