မတ်-၂၈၊၂၀၂၅။ရဲခေါင်/People’s Spring
ရှမ်းပြည်တောင်ပိုင်း၊အောင်ပန်းမြို့တွင် ဟိုတယ်အောင်ပန်း ပြိုကျမှုအတွင်း ပိတ်မိနေသူများအနက်မှ အမျိုးသမီးနှစ်ဦး ရုပ်အလောင်း တွေ့ရှိထားဟု နာရေးကူညီမှုအသင်းအောင်ပန်းက ယနေ့(မတ်လ ၂၈ ရက်) ညနေ ၅နာရီခန့်တွင် အသိပေးသည်။
ယနေ့ နေ့လည်ပိုင်းတွင် အင်အားပြင်း ငလျင်ဒဏ်ကြောင့် အောင်ပန်းမြို့၌ ဟိုတယ်အောင်ပန်း အဆောက်အဦး ပြိုကျပျက်စီးခဲ့သည်။
“သေဆုံးသူ အမျိုးသမီး နှစ်ဦးရှိလာ။ကယ်ဆယ်ရေး ပူးပေါင်းအဖွဲ့များ ဆက်လက်ကယ်ဆယ်ရှာဖွေနေ”ဟု နာရေးကူညီမှုအသင်းအောင်ပန်းတာဝန်ရှိသူက ပြောသည်။
Public Service Announcement
အောင်ပန်းမြို့တွင် နေအိမ်များ၏ အုတ်တံတိုင်းပြိုကျမှုကြောင့် ဒဏ်ရာရရှိသူများလည်းရှိသည်ဟု သိရသည်။
အောင်ပန်းမြို့၏ လမ်းမကြီးဘေးရှိ ခြောက်ထပ်အမြင့်ရှိသော ဟိုတယ်အောင်ပန်းသည် အလုံးစုံ ပြိုကျခဲ့ခြင်းဖြစ်ပြီး ဝန်ထမ်းများနှင့် တည်းခိုသူ ၂၀ထက်မနည်း ပိတ်မိနေကြောင်း ဒေသခံတို့၏ ပြောဆိုချက်အရ ကနဦးယူဆထားရသည်။
အင်အားပြင်းငလျင်လှုပ်ခတ်မှုကြောင့် တောင်ငူမြို့ရှိ ဝေဠုဝန်ကျောင်းသိမ်ပြိုကျမှုတွင် ကိုရင်တစ်ပါးအပါအဝင် စစ်ရှောင်ကလေးငယ် ၅ဦး သေဆုံးခဲ့ရကြောင်း အဆိုပါမြို့ရှိ လူမှုကူညီရေးအသင်းမှ တာဝန်ရှိသူက ပြောသည်။
ငလျင်သည် စစ်ကိုင်းမြို့အနီးကို ဗဟိုပြုပြီးလှုပ်ခတ်သွားပြီး စစ်ကိုင်း ၊မန္တလေး ၊နေပြည်တော် ၊ တောင်ကြီးနှင့် ပဲခူးတို့တွင် လူသေဆုံးမှုနှင့် ထိခိုက်ပျက်စီးမှုများရှိကြောင်း အမျိုးသားညီညွှတ်ရေးအစိုးရ(NUG)က ထုတ်ပြန်ထားသည်။
