ဓာတ်ပုံ – KO SI
ဖျက်အားပြင်း ငလျင်ကြောင့် ပျက်စီးဆုံးရှုံးမှုကြီးမားတဲ့ မန္တလေးမြို့မှာ ပြိုကျနေတဲ့ အဆောက်အဦးတွေကြားပိတ်မိနေသူတွေကို ထိရောက်တဲ့ ရှာဖွေကယ်ဆယ်ရေး အပူတပြင်း လုပ်ဆောင်နိုင်တာမရှိတာကို မြို့ခံတွေဆီကသိရပါတယ်။
မနေ့ မတ်လ ၂၈ ရက် မွန်းလွဲပိုင်း ၁၂ နာရီ ၅၀ မိနစ်ဝန်းကျင်က ငလျင်လှုပ်ပြီးနောက် ဒီနေ့ မွန်းလွဲပိုင်းအထိ ၂၄ နာရီ ကြာမြင့်လာပေမယ့် အပျက်အစီးတွေကြားပိတ်မိနေသူတွေအများစုဟာ ကူညီကယ်ဆယ်ရေးမရသေးကြပါဘူး။
ငလျင်လှုပ်ပြီးနောက် ဒီနေ့မှာဆိုရင် မန္တလေးမြောက်ပြင်ရပ်မှာ နေအိမ်တွေထဲ နေထိုင်ဖို့ စိုးရွံ့တာကြောင့် ကျုံးမြောက်ဘက််နဲ့ ကျုံးအနောက်ခြမ်းလမ်းဘေးနေရာတွေမှာ မိုးကာတဲထိုးပြီးနေထိုင်နေကြတဲ့ မြို့ခံတွေ လည်းရှိလာပါတယ်။
Public Service Announcement
မန္တလေးမြို့ရဲ့ အနောက်ခြမ်းနဲ့ မြောက်ခြမ်းတွေရှိ အဆောက်အအုံတွေ အများဆုံးထိခိုက်ပြိုကျပျက်ဆီးသွားတာဖြစ်ပါတယ်။ ငလျင်ကြောင့် မန္တလေးမြို့ဟာဆိုရင် မြို့ပျက်ကြီးသဖွယ်ဖြစ်နေတယ်လို့မြို့ခံတွေက ဆိုကြပါတယ်။
စစ်ကောင်စီရဲ့စာရင်းအရတော့ ငလျင်ကြောင့် မန္တလေးတိုင်းမှာ သေဆုံးသူ ၆၉၄ ဦး ၊ ဒဏ်ရာရသူ ၁,၆၇၀ဦးနဲ့ ပျောက်ဆုံးနေသူ ၆၈ဦး ရှိတယ်လို့ ဆိုပါတယ်။
မန္တလေးမြို့ခံတွေကတော့ မြေပြင်က အခြေအနေဟာ စစ်ကောင်စီစာရင်းထက် ကွာဟချက်ကြီးမားတယ်လို့ ပြောပါတယ်။
