မတ် -၃၀ ၊၂၀၂၅။လင်းသစ်/People’s Spring
ငလျင်ဒဏ်ခံရသော ပြည်သူများအတွက် ပေးအပ်သည့် နိုင်ငံတကာအကူအညီများအပေါ် စစ်တပ်က အခွင်ကောင်းယူ၍ နိုင်ငံရေးအမြတ်မထုတ်နိုင်ရန် အနီးကပ်စောင့်ကြည့်သည့် လုပ်ငန်းစဥ်ထည့်သွင်းပေးရန် ကရင်အမျိုးသားအစည်းအရုံး(KNU)ဗဟိုက ယနေ့ (မတ် ၃၀ရက်)တွင် ထုတ်ပြန်တိုက်တွန်းသည်။
၂၀၀၈ နာဂစ်မုန်တိုင်းကြောင့် ပြည်သူများလက်ခံရရှိသည့် နိုင်ငံတကာအကူအညီများကို စစ်အုပ်စုက ၎င်းတို့၏ အကျိုးစီးပွားအတွက် အသုံးချသွားခဲ့သည့် သမိုင်းကြောင်းရှိခဲ့ကြောင်းလည်း KNUက ကြေညာချက်၌ သတိပေး ထောက်ပြထားသည်။
ငလျင်ဘေးသင့် ပြည်သူများမှာ စစ်ကောင်စီထိန်းချုပ်နယ်မြေအတွင်းနှင့် တော်လှန်ရေးအဖွဲ့များ၏ ထိန်းချုပ်နယ်မြေများအတွင်းရှိနေသည်ကို သတိမူသင့်ကြောင်း KNUက ဆိုသည်။
Public Service Announcement
ထို့အတွက် အကူအညီများပေးအပ်ရာတွင် အပြိုင်အကူအညီပေးအပ်သည့် လုပ်ငန်းစဥ်များကို အခြေခံ၍ အမှန်တကယ်လိုအပ်နေသူများထံ ရောက်ရှိနိုင်ရေး လုပ်ဆောင်ပေးရန် KNU က နိုင်ငံတကာ ကို တိုက်တွန်းသည်။
သာမန်အခြေအနေတွင် နိုင်ငံတစ်နိုင်၏ သဘာဘေးအန္တရာယ် တုံံ့ပြန်သည့်အနေဖြင့် စစ်တပ်က ဦးစွာ ပါဝင်ရသော်လည်း စစ်ကောင်စီထိန်းချုပ်မှုအောက်ရှိ စစ်တပ်သည် တိုင်းပြည်၏ ကြွယ်ဝမှုနှင့် အခွင့်ထူး များရယူ အလွဲသုံးစားပြု၍ ပြည်သူကို ဦးတည်တိုက်ခိုက်ရန်သာ တပ်စွဲဖြန့်ကျက်ထားကြောင်း KNUက ဆိုသည်။
ထို့အပြင် ပြည်သူများ ငလျင်ဒဏ်ပြင်းထန်စွာ ခံစားနေရချိန် စစ်ကောင်စီအနေဖြင့် အရပ်သားနေရာများ ကိုပစ်မှတ်ထား၍ လေကြောင်းတိုက်ခိုက်မှုများ ဆက်တိုက်ကျူးလွန်နေသည်ကို ဝမ်းနည်းစွာတွေ့ရှိရကြောင်း ထုတ်ပြန်ချက်၌ ဖော်ပြထားသည်။
လက်ရှိ ငလျင်ဒဏ်သင့်ပြည်သူများအတွက် အချိန်တိုအတွင်း စိုးရိမ်ပေးကြပြီး ကူညီရန်ရောက်ရှိလာ ကြသော နိုင်ငံတကာ အစိုးရများ၊ အဖွဲ့အစည်းများအပြင် ဒေသခံပရဟိတအဖွဲ့များနှင့် ပြည်သူများ၏ ကူညီမှုများ ကိုကြိုဆိုပြီး အထူးကျေးဇူးတင်ရှိကြောင်း ဖော်ပြထားသည်။
ထို့အတူ KNUအနေဖြင့် အင်အားကြီးမြေငလျင်ဒဏ်ကြောင့် အသက်အိုးအိမ်စည်းစိမ် မြောက်များစွာ ပျက်စီးဆုံးရှုံးခဲ့ရသော အများပြည်သူတို့နှင့်အတူ ထပ်တူထပ်မျှ ကြေကွဲဝမ်းနည်းရပါကြောင်းနှင့် အရေးပေါ်လိုအပ်မှုများကို တုံ့ပြန်ကူညီဆောင်ရွက်ရန် ကိုယ်စွမ်း၊ ဥာဏ်စွမ်းရှိ သ၍ တတ်နိုင်သည့် နည်းလမ်းဖြင့် ပါဝင်မည်ဟု KNU က အသိပေးထားသည်။
