ဧပြီ ၅၊ ၂၀၂၅။ဇော်ရမ်း/People’s Spring
မန္တလေးမြို့၊ မဟာအောင်မြေမြို့နယ်၌ ယနေ့(ဧပြီ ၅ရက်)ည ၈နာရီကျော်က မိုးသက်လေပြင်းကျနေစဉ် လူတစ်စုက နေအိမ်တစ်အိမ်အား ဓားပြတိုက်ရန်ကြိုးပမ်းခဲ့ကြောင်း ဒေသခံများက ပြောသည်။
မဟာအောင်မြေမြို့နယ်၊ စိန်ပန်းရပ်၊ ၄၁၊၄၉လမ်းတွင် အဆိုပါ ဖြစ်စဉ်ဖြစ်ပွားခဲ့ခြင်းဟု ဒေသခံတစ်ဦးက ပြောသည်။
” မိုးသံလေသံတွေဆူညံနေချိန်မှာ အိမ်ထဲကိုဝင်ပြီး ဓားပြတိုက်ဖို့လုပ်တာ။ အိမ်ရှင်ကအော်တော့ထွက်ပြေးတာ။ လိုက်ကြပေမယ့် မမိဘူး။ ဒီရက်လူစိမ်းတွေအများကြီးဆိုတော့ ရောကုန်တာဖြစ်မယ်”ဟု အဆိုပါ ဒေသခံက ပြောသည်။
Public Service Announcement
မန္တလေးမြို့တွင် ယနေ့ည မိုးသက်လေပြင်းကျခဲ့ပြီး လမ်းပလပ်ဖောင်းများ၌ ညဘက်အိပ်စက်ကြမည့် ငလျင်ဒဏ်သင့်ပြည်သူများမှာ ဝရုန်းသုန်းကားဖြစ်ခဲ့သည်။ ထိုအချိန်တွင် လူစိမ်းတချို့က ဓားပြတိုက်ရန်ကြိုးစားခြင်းဟု သတင်းရရှိသည်။
” ၅ယောက်လောက်ပါမယ်။ ဝိုင်းလိုက်တော့ ကိုယ်ယောင်ဖျောက် ပြေးကြတာ။ သဘာဝဘေးကြောက်ရ၊ ဓားပြဘေးကြောက်ရနဲ့ အခြေအနေဆိုးတယ်”ဟု မဟာအောင်မြေမြို့ခံတစ်ဦးက ပြောသည်။
ပြီးခဲ့သည့် မတ်လ ၂၈ရက်က အင်အားပြင်းငလျင်လှုပ်ခတ်မှုကြောင့် မန္တလေးမြို့တွင် နေအိမ်အဆောက်အအုံများ အပျက်အစီးများခဲ့ပြီး ဒေသခံအများအပြားမှာ လမ်းဘေးနေရာများတွင် နေထိုင်နေကြရဆဲဖြစ်သည်။
ယနေ့ည ၈နာရီခန့်တွင် မိုးသက်လေပြင်းကျခဲ့၍ ငလျင်ဘေးသင့်သူများ အခက်အခဲကြုံတွေ့ခဲ့သည်။ သို့သော် ည ၈နာရီ ၄၀မိနစ်ခန့်တွင် မိုးတိတ်သွားခဲ့သည်။
ငလျင်ဒဏ်ကြောင့် ပျက်စီးသွားပြီး ဖြိုမချရသေးသည့် နေအိမ်များမှ တန်ဖိုးကြီးပစ္စည်းများ၊ အိမ်သုံးပစ္စည်းများ ခိုးယူခံရမှုများရှိနေသလို အုပ်စုဖွဲ့လုယက်မည့် အန္တရာယ်ကိုလည်း စိုးရိမ်နေရကြောင်း မြို့ခံများကပြောသည်။
