ဧပြီ၉၊ ၂၀၂၅။ဧရာ/People’s Spring
စစ်ကိုင်းတိုင်း၊ အင်းတော်မြို့သိမ်းတိုက်ပွဲမှထွက်ပြေးသွားသည့် စစ်ကောင်စီ၏ အမှတ်(၇၇)ခြေမြန်တပ်မဌာနချုပ် တပ်မမှူးနှင့် အဖွဲ့ကို တော်လှန်ရေးတပ်ဖွဲ့များက ကသာမြို့နယ်အတွင်း ပြန်ဖမ်းမိထားသည်။
” ၇၇တပ်မမှူးနဲ့ သူ့လုံခြုံရေးအဖွဲ့တစ်ဖွဲ့လုံး ဖမ်းမိထားပါပြီ။ တိုက်ပွဲထဲမှာ ဒဏ်ရာတွေနဲ့ မိထားတာပါ”ဟု ကသာမြို့မှ သတင်းရင်းမြစ်တစ်ဦးကပြောသည်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊အမှတ် (၁) စစ်ဒေသ၏ အစီအစဥ်ဖြင့် အင်းတော်မြို့သိမ်းတိုက်ပွဲကို ၂၀၂၄ ဩဂုတ် ၁၆ရက်ကစတင်ခဲ့ပြီး ခုခံစစ်ကို အမှတ်(၇၇) ခြေမြန်တပ်မဌာနချုပ်တပ်မမှူးက ဦးဆောင်ခဲ့ခြင်းဖြစ်သည်။
Public Service Announcement
အမှတ်(၇၇)ခြေမြန်တပ်မဌာနချုပ်သည် ပဲခူးတိုင်းတွင် အခြေစိုက်သော်လည်း အင်းတော်မြို့ခုခံစစ်အတွက် စစ်ကောင်စီက ပြီးခဲ့သည့် ၂၀၂၄ ဩဂုတ်တွင် ပို့ဆောင်ခဲ့ခြင်းဟု သတင်းရရှိသည်။
အင်းတော်မြို့သိမ်းစစ်ဆင်ရေးသည် ရက်ရှည် တိုက်ပွဲတစ်ခုဖြစ်ပြီး စစ်ကောင်စီတပ်များ အနေဖြင့် စစ်ကူမရရှိခြင်း၊မြေပြင်မှ လက်နက်ရိက္ခာထောက်ပို့ ဆောင်ရွက်နိုင်မှုမရှိခြင်း၊ ထိခိုက်သေဆုံးများပြားခြင်းတို့ကြောင့် တော်လှန်ရေးတပ်ဖွဲ့များ၏ ဖိအားကို ရေရှည် တောင့်ခံနိုင်ခြင်းမရှိတော့ဘဲ ၎င်းတို့ နောက်ဆုံးအခြေပြုရာ ဂျပန်လှိုဏ်ဂူမှတပ်မမှူးဦးဆောင် သောအဖွဲ့သည် ဧပြီ ၇ရက် ည ၉နာရီခန့်တွင် စခန်းစွန့်လွှတ်ဆုတ်ခွာသွားခြင်း ဖြစ်ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ဧပြီ ၈ရက်ညပိုင်း၌ သတင်းထုတ်ပြန်ထားသည်။
