ဧပြီ ၂၂၊၂၀၂၅။ရဲခေါင်/People’s Spring
စစ်ကိုင်းငလျင်ကြီးကြောင့် ပြိုကျခဲ့ရသော မန္တလေးမြို့၊အောင်မြေသာစံမြို့နယ်ရှိ Sky Villa ကွန်ဒိုအဆောက်အအုံအတွင်းမှ သေဆုံးသူ ရုပ်အလောင်း ၁၀၀ကျော်ထုတ်ယူထားကြောင်း မန္တလေးတိုင်း မီးသတ်ဦးစီးဌာန၏ စာရင်းများအရ သိရသည်။
စစ်ကိုင်းငလျင်ကြီးကြောင့် မတ်လ ၂၈ ရက်တွင် ပြိုကျပျက်စီးခဲ့ရသော Sky Villa ကွန်ဒို အတွင်းမှ ၂၆ ရက်အကြာ ယနေ့(ဧပြီ ၂၂ ရက်) မွန်းလွဲပိုင်းအထိ အသက်ရှင်သူ ၅၂ဦးနှင့် သေဆုံးရုပ်အလောင်း ၁၀၃လောင်းကို ထုတ်ယူခဲ့ကြောင်း ဖော်ပြသည်။
ထို့အပြင် ရုပ်အလောင်းကျန်ရှိသည့် နေရာများကို ပယ်ဖျက်ရှင်းလင်းရေးနှင့် ရုပ်အလောင်း ထုတ်ယူနိုင်ရေး လုပ်ငန်းများကို လုပ်ဆောင်နေသည်ဟုလည်း ဆိုသည်။
Public Service Announcement
ငလျင်ကြီးမဖြစ်မီ မတ်လ ၂၇ ရက်အထိ စစ်ကောင်စီ၏ မန္တလေးတိုင်း ထွေအုပ်စာရင်း အချက်အလက်အရ Sky Villa ကွန်ဒိုတွင် နေထိုင်သူ ၃၄၈ ဦးရှိကြောင်း လူထုနွေဦးထံသို့ ကယ်ဆယ်ရေးအဖွဲ့ဝင်များက အသိပေးထားသည်။
ထို့ကြောင့် ကွန်ဒိုအတွင်း သေဆုံးရုပ်အလောင်းတွေ့ရှိမှု ထပ်မံမြင့်တက်လာနိုင်သည်ဟုလည်း ဆိုသည်။
အောင်မြေသာဇံမြို့နယ်၊လမ်း ၆၀၊ ၂၃×၂၄ လမ်း ကြားရှိ မြေဧက တစ်ဧက အကျယ်ပေါ်တွင်တည်ဆောက်ထားသော Sky Villa ကွန်ဒိုတွင် ၁၁ ထပ်ရှိအဆောက်အအုံ လေးလုံးတွဲပါရှိကာ ငလျင်လှုပ်ခတ်မှုအပြီး အဆောက်အအုံ သုံးလုံးမှာအလုံးစုံပြိုကျပြီး ကျန်တစ် လုံးသည် ၄ထပ်ခန့် မြေကြီးအတွင်း နစ်ဝင်သွားခဲ့သည်။
Sky Villa ကွန်ဒို အိမ်ရာစီမံကိန်းကို စစ်တပ်နှင့်ဆက်နွယ်နေသော အောင်မြင်သူကုမ္ပဏီက တည်ဆောက်ခဲ့ခြင်းဖြစ်ပြီး ပြင်အား ရစ်ချ်တာစကေး ၈အဆင့်ရှိငလျင်ဒဏ်ခံနိုင်သည်ဟုပြောဆို ကြေညာရောင်းချခဲ့ဟု သတင်းများထွက်ပေါ်ခဲ့သည်။
ထို့အပြင် ကျန်ရစ်သူမိသားစုများသည် ကွန်ဒိုအတွင်းပိတ်မိနေသော မိသားစုဝင်များအား ကိုယ်ပိုင်အစီအစဥ်ဖြင့် အခကြေးငွေပေးကာ ထုတ်ယူခဲ့ရပြီး ငွေကြေး၊လက်ဝတ်ရတနာပစ္စည်းများ ပြန်မရသေးသည့် ဖြစ်စဥ်များရှိကြောင်း သိရသည်။
