Sky Villa ကွန်ဒို အပျက်အစီးတွေကြား ရုပ်အလောင်း ၄လောင်းထပ်တွေ့

ဧပြီ – ၂၄ ၊၂၀၂၅၊ ဆိုင်းမင်း/People’s Spring

ငလျင်ဒဏ်ကြောင့် ပြိုကျပျက်စီးသွားတဲ့ မန္တလေးမြို့ ရှိ Sky Villa ကွန်ဒို အဆောက်အဦး ကနေ ဒီနေ့ ဧပြီလ ၂၄ ရက်မနက်ပိုင်းမှာ ရုပ်အလောင်း ၄ လောင်း ထပ်မံတွေ့ရှိရတယ်လို့ မီးသတ်တပ်ဖွဲ့က ထုတ်ပြန်ပါတယ်။

ဒီမနက်ပိုင်း ၁၁ နာရီဝန်းကျင်မှာ ကွန်ဒို C နဲ့ D အဆောက်အဦး ကို ရှင်းလင်းရာမှာ ကလေးရုပ်အလောင်း ၁ လောင်း၊ အမျိုးသား ရုပ်အလောင်း ၃ လောင်းစုစုပေါင်း ရုပ်အလောင်း ၄ လောင်းထပ်မံတွေ့ရတာလို့ မီးသတ်က ဆိုပါတယ်။

မီးသတ်ရဲ့စာရင်းတွေအရ Sky Villa ကွန်ဒို ပြိုကျမှုမှာဒီနေ့အထိ ရှာဖွေတွေ့ရှိ သယ်ထုတ်နိုင်တဲ့ ရုပ်အလောင်း ၁၂၇ လောင်းထိရှိလာပြီဖြစ်ပြီး အသက်ရှင်လျက်တော့ ၅၂ ဦး ကယ်ဆယ်နိုင်ခဲ့တယ်လို့သိရပါတယ်။

Public Service Announcement

သေဆုံးသူ ၁၂၇ ဦးမှာ အမျိုးသား ၄၁ ဦး ၊ အမျိုးသမီး ၆၅ဦး ၊ ကလေး ၁၂ ဦး ၊ ကျားမ မခွဲခြားနိုင်တော့ သူ ၉ ဦး ဖြစ်တယ်လို့သိရပါတယ်။

ငလျင်မလှုပ်ခတ်ခင် မတ်လ ၂၇ ရက်အထိ Sky Villa ကွန်ဒိုမှာနေထိုင်သူဦးရေ ၃၄၈ ဦးရှိတယ်ဆိုတာကို မန္တလေးတိုင်းထွေအုပ်ရဲ့ စာရင်းတွေအရ သိရတယ်လို့ ကယ်ဆယ်ရေးအဖွဲ့ဝင်အချို့ ထံက သိရပါတယ်။

မန္တလေး လမ်း ၆၀ ၊ ၂၃ လမ်း နဲ့ ၂၄ လမ်းကြားမှာရှိတဲ့ Sky Villa ကွန်ဒိုကို ၁၁ ထပ်စီ ရှိတဲ့ အဆောက်အဦး၄ လုံး နဲ့ဖွဲ့စည်းထားပြီး ငလျင်ဒဏ်ခံရပြီးနောက် အဆောက်အဦး ၃ လုံးပြိုကျ သွားခဲ့တာပါ။

ပြိုကျသွားတဲ့အဆောက်အဦးတစ်ခုဟာဆိုရင် အောက်ခြေ ၄ထပ်ခန့် မြေကြီးထဲ ကျွံဝင်သွားပြီး လူအများအပြားပိတ်မိခဲ့တာပဲဖြစ်ပါတယ်။

အပျက်အစီးတွေအောက်မှာ ရုပ်အလောင်းအများအပြား ရှိနေဦးမယ်လို့ ရှာဖွေကယ်ဆယ်ရေးအဖွဲ့ဝင်အချို့ကလည်း ခန့်မှန်းထားကြပါတယ်။

“ အနံတွေက ထွက်နေတာတော့ အတော်ကြာပါပြီ ၊အခုနေကလည်းပိုပူလာတော့ ပိုဆိုးလာတဲ့ သဘောတော့ရှိတယ် “ လို့ ကူညီရေးလုပ်နေသူတစ်ဦးကပြောပါတယ်။

ပြိုကျသွားတဲ့ ကွန်ဒို အဆောက်အဦးတွေကို ဖယ်ရှားရှင်းလင်းရေးနဲ့ ရုပ်အလောင်းရှာဖွေသယ်ထုတ်တာတွေကို လူအင်အား ၊စက်ယန္တယားအင်အားသုံးပြီး ဒီနေ့အထိ လုပ်ဆောင်နေတယ်လို့မီးသတ်က ဆိုထားပါတယ်။