ဖားကန့်တွင်စစ်​တပ်ကလက်နက်ကြီးဖြင့်ပစ်ခတ်​နေ

ဧပြီ-၂၆၊၂၀၂၅။မိထက်/People’s Spring

ဖားကန့်​ဒေသသို့အင်အားဖြည့်ရန်စစ်ကောင်စီတပ်က ကြိုးစားလာ၍ KIA က ဖြတ်တောက်တိုက်ခိုက်​နေစဥ် ဖားကန့်ရှိ စစ်တပ်က ဧပြီလ ၂၆ရက်ည၌လက်နက်ကြီးပစ်ခတ်နေပြီး လေကြောင်းမှလည်း ကင်းထောက်နေသည်။

ဖားကန့်စစ်တပ်ကုန်းမှနေ၍ လက်နက်ကြီးများပစ်ခတ်နေခြင်းဖြစ်ပြီး လေယာဉ်ပျံသန်းသံများလည်း ထွက်ပေါ်နေသည်ဟု ဒေသခံတစ်ဦးကပြောသည်။

စစ်ကောင်စီတပ်သည် မြစ်ကြီးနား-မိုးကောင်း-ဖားကန့်လမ်း၊ အင်းတော်ကြီး -ကာမိုင်း -ဖားကန့်လမ်းပိုင်းတို့မှတဆင့်အင်အား ၇၀၀ နီးပါးဖြင့် ဖားကန့်ကို ဝင်ရောက်ရန် ကြိုးစား‌နေသည်။ထို့​ကြောင့် KIA ၊ KPDF နှင့် ပူး​ပေါင်းတပ်များက ဖြတ်​တောက်ပိတ်ဆို့ တိုက်ခိုက်သဖြင့် စစ်တပ်​ရှေ့မတိုးနိုင်ဘဲ​ဖြစ်​နေသည်။

Public Service Announcement

​ဧပြီ ၂၆ ရက်တွင်လည်းဖားကန့်အဝင်မအူပင်ရွာ၌ တိုက်ပွဲပြင်းထန်ခဲ့ပြီး စစ်ကောင်စီတပ်သားများ သေဆုံးထိခိုက်မှုများပြားကြောင်း ကချင်စစ်ရေးသတင်းရင်းမြစ်ကပြောသည်။

တိုက်ပွဲများဆက်လက်ပြင်းထန်နိုင်ပြီး ဖားကန့်ဒေသခံများ စစ်ရေးသတိပြုနေထိုင်ကြရန် ‌ဖားကန့်PDF ထောက်ပို့ရဲဘော်တဦးက ပြောသည်။

KIA ဦးဆောင်သည့် ပူးပေါင်းတပ်များက ဧပြီ ၂၅ ရက်​နေ့တွင် ဗန်းမော်မြို့သိမ်းတိုက်ပွဲ ကိုလက်ကျန်တပ်ရင်းနှင့် စခန်းများ သိမ်းပိုက်၍ အပြီးသတ်ရန် ထိုးစစ်ဆင်တိုက်ခိုက်နေသည်။ ဗန်း​မော်ရှိ လက်ကျန်စစ်တပ်စခန်းများတိုက်ခိုက်ခံ​နေရစဥ် စစ်ကောင်စီတပ်က မြစ်ကြီးနားမြို့၊ မြောက်ပိုင်းတိုင်းစစ်ဌာနချုပ်(မပခ)မှနေ၍ ဝိုင်းမော်မြို့ဘက်သို့လည်း ဧပြီ ၂၅ ရက်ညတွင် လက်နက်ကြီးများဖြင့် ပစ်ခတ်နေသည်။

ဧပြီ ၂၅ ရက်ညက ပစ်ခတ်မှုတွင်မြစ်ကြီးနားမြို့၊ မလိခဝန်ထမ်းအိမ်ရာအတွင်းကျရောက်ပေါက်ကွဲပြီး အမျိုးသားတစ်ဦးသေဆုံးခဲ့သည်။ ယနေ့(ဧပြီ ၂၆) ညလည်း မပခ ကလက်နက်ကြီးဖြင့် ထပ်မံပစ်ခတ်နေသည်။