မန္တ​လေးမှာ ​မေ ၁၇ ညမှာလှုပ်ခဲ့တဲ့ငလျင်မြင်ကွင်း

မေ-၁၇၊၂၀၂၅/People’s Spring

မန္တ​လေးမြို့မှာ မေလ ၁၇ ရက်ည ၁၀ နာရီ ၂၅ မိနစ်မှာ လှုပ်ခတ်ခဲ့တဲ့ အင်အား အသင့်အတင့်ရှိ ​မြေငလျင်လှုပ်ခတ်ချိန် မြင်ကွင်း​တွေပဲဖြစ်ပါတယ်။

အမေရိကန် ငလျင်တိုင်းတာရေးဌာန (USGS) ရဲ့ ထုတ်ပြန်ချက်အရ ကျောက်ဆည်မြို့ရဲ့ အနောက်တောင်ဘက် ၁၃ မိုင်ခန့်အကွာ မြေအနက် ၆ မိုင်ခွဲခန့်ကို ဗဟိုပြုပြီး ပြင်းအား ရစ်ချ်တာစ​ကေး ၅.၂ ရှိတဲ့ငလျင်လှုပ်ခတ်ခဲ့တာပါ။

ငလျင်လှုပ်ချိန်မှာ အိမ် နဲ့ တိုက်ခန်း​တွေမှာတပ်ဆင်ထားတဲ့ CCTV ​တွေက ငလျင်လှုပ်​နေချိန် မြင်ကွင်း​တွေကို မှတ်တမ်းတင်ထားတာမှာ ငလျင်လှုပ်တာဟာ စက္ကန့် ၂၀ ​ခန့်ကြာပြီး ​ဘေးတိုက်လှုပ်ခတ်တဲ့အပြင် အထက်​အောက်လှုပ်ရှားတဲ့ ပုံစံကိုလည်း မြင်​တွေ့ရပါတယ် ။

Public Service Announcement

စစ်ကိုင်းငလျင်ကြီးမှာ ဆိုးရွားစွာပျက်စီးခဲ့တဲ့ မန္တလေးမြို့မှာလည်း ဒီငလျင်လှုပ်တာကို သိသိသာသာခံစားခဲ့ရတာမို့ ပြည်သူ​တွေ လမ်းပေါ် ပြေးဆင်းခဲ့ရပါတယ်။

ဒီငလျင်ကြောင့်မန္တလေးမြို့၊ မဟာအောင်မြေမြို့နယ်၊ ရွှေကူဘုန်းကြီးကျောင်းတိုက်အတွင်းမှာဖွင့်ထားတဲ့ ငလျင်ကယ်ဆယ်ရေးစခန်းပေါ် သစ်ပင်လဲကျတဲ့အတွက် ငလျင်သင့် ဒုက္ခသည် ကလေးတဦး နဲ့ လူကြီးတဦး ပိမိပြီး​သေဆုံးခဲ့တယ်လို့ ဒေသခံတွေက ပြောပါတယ်။

လူမှုကူညီရေးအသင်းက ကြိုးစားကယ်ထုတ်ခဲ့ပေမဲ့ ကလေးကော လူကြီးပါ သေဆုံးသွားခဲ့တယ်လို့ “မဏီစလ”လူမှုကူညီရေးအသင်း(မန္တလေး)က ထုတ်ပြန်ပါတယ်။

စက္ကန့် ၂၀ ခန့်ကြာလှုပ်ခတ်ခဲ့တဲ့ ငလျင်ကြောင့် မန္တလေးမြို့ခံတွေ စိုးရိမ်ထိတ်လန့်ပြီးနေအိမ်တွေ ၊ တိုက်ခန်းတွေပေါ်ကနေ လမ်းပေါ် ပြေးထွက်ခဲ့ရတယ်လို့ မြို့ခံအချို့က ပြောပါတယ်။

“အရှိန်ကလည်းပြင်း ကြာလည်းကြာတော့ လူတွေအကုန်လမ်းပေါ်ရောက်ကုန်ကြတာ”လို့ မန္တလေးမြို့ ၊ချမ်းမြသာစည်မြို့နယ်မှာနေထိုင်တဲ့မြို့ခံအမျိုးသမီးက ပြောပါတယ်။

အခု​မြေငလျင်ဟာ စစ်ကိုင်းငလျင်ကြီးရဲ့​နောက်ဆက်တွဲငလျင်ဖြစ်ပါတယ်။ငလျင်ကြီးလှုပ်ပြီးတာတစ်လ​ကျော်ကြာ​တဲ့တိုင် ​နောက်ဆက်တွဲ​မြေငလျင်​တွေ မကြာခဏလှုပ်ခတ်​နေတာဖြစ်ပါတယ်။

​မေ ၁၇ ရက်ည လှုပ်ခတ်ခဲ့တဲ့ ငလျင်ဟာ စစ်ကိုင်း ငလျင်ကြီးအပြီး လှုပ်ခတ်ခဲ့တဲ့ ငလျင်တွေအနက် အသိသာဆုံးခံစားရတဲ့ ငလျင်လည်းဖြစ်တယ်လို့မြို့ခံအချို့က ​ပြောကြပါတယ်။