မေ – ၁၉ ၊၂၀၂၅ ၊ ဆိုင်းမင်း/People’s Spring
မန္တလေးတိုင်း ၊ မြင်းခြံခရိုင် ၊ နွားထိုးကြီးမြို့နယ်အတွင်း တိုက်ပွဲတွေ ပြင်းထန်နေပြီး အရပ်သား ပြည်သူ ၇,၀၀၀ ကျော် ထွက်ပြေးတိမ်းရှောင်နေရတယ်လို့ ဒေသခံတွေနဲ့ ဒေသတွင်းတော်လှန်ရေးသတင်းရင်းမြစ်အချို့ဆီကသိရပါတယ်။
နွားထိုးကြီးမြို့နယ်ထဲ က ဝက်လူးကျေးရွာ ရဲစခန်း မှာ မေလ ၁၅ ရက်ကစတင်ပြီး တိုက်ပွဲတွေ ဖြစ်ပွားနေတာကြောင့် ဝက်လူးရွာအပါအဝင် အနီးတဝိုက်ရွာတွေက ဒေသခံတွေ ထွက်ပြေးနေရတာပါ။
ဝက်လူး ၊ ပဲချက် ၊ ဂွေးပင်တော ၊ ထန်းခွ ၊ ထန်းစင်စတဲ့ ရွာတွေက ဒေသခံ ပြည်သူ ၇,၀၀၀ ကျော် ဘေးလွတ်ရာကိုထွက်ပြေးနေကြတယ်လို့ သိရပါတယ်။
Public Service Announcement
နှစ်ဖက်ပစ်ခတ်တိုက်ခိုက်မှုအပြင် စစ်ကောင်စီတပ်က လေကြောင်းတိုက်ခိုက်မှုတွေကိုပါ ပြုလုပ်တာကြောင့် ရွာတွေမှာ ဆက်မနေရဲတော့ဘဲ ဘေးလွတ်ရာဆီ တိမ်းရှောင်ရတာလို့ ဒေသခံအချို့က ပြောပြပါတယ်။
မြင်းခြံခရိုင်ထဲက မြင်းခြံ ၊တောင်သာ နဲ့ နွားထိုးကြီးမြို့နယ်တွေအတွင်း တပ်စွဲထားတဲ့ စစ်ကောင်စီ တပ်စခန်းတွေကို တော်လှန်ရေးအင်အားစုတွေက ၉/အညာမြေစစ်ဆင်ရေးအမည်နဲ့ မေလ ၁၅ ရက်ကစတင်တိုက်ခိုက်ခဲ့တာပါ။
မြန်မာနိုင်ငံအလယ်ပိုင်းမှာတည်ရှိပြီး ဧရာဝတီမြစ်အရှေ့ဘက်ကမ်းမှာ ဖိုခနောင့်သဖွယ် ရှိနေတဲ့ တောင်သာ ၊ နွားထိုးကြီးနဲ့ မြင်းခြံမြို့နယ်တို့ဟာ အာဏာသိမ်းစစ်ကောင်စီတပ်ကို လက်နက်စွဲကိုင်တော်လှန််မှု အားကောင်းရာဒေသဖြစ်ပါတယ်။
ပြီးခဲ့တဲ့ ၂၀၂၄ ခုနှစ် ၊သြဂုတ်လ ၁၀ ရက်ကလည်း တောင်သာ ၊နွားထိုးကြီးနဲ့မြင်းခြံနယ်က စစ်ကောင်စီတပ်စွဲရာနေရာတွေကို တော်လှန်ရေးအင်အားစုတွေက ဝင်ရောက်စီးနင်းတိုက်ခိုက်ရာမှာ မြို့မကျဖို့ စစ်ကောင်စီတပ်က လေကြောင်းကိုအလွန်အကျွံသုံးပြီး တိုက်ခိုက်ခဲ့တာရှိပါတယ်။
အခုတစ်ခေါက်မှာလည်း လေကြောင်းအားပြုပြီး စစ်ကောင်စီတပ်က တန်ပြန်တိုက်ခိုက်နေတယ််လို့ ဒေသတွင်းတော်လှန်ရေးသတင်းရင်းမြစ်ကပြောပါတယ်။
မြင်းခြံခရိုင် ( တောင်သာ ၊နွားထိုးကြီး ၊မြင်းခြံ ) ထဲက တိုက်ပွဲတွေနဲ့ပတ်သက်ပြီး စစ်ကောင်စီကတရားဝင်သတင်းမထုတ်ပြန်ပေမယ့် စစ်တပ်ဝါဒဖြန့်တယ်လီဂရမ်တွေမှာတော့ နွားထိုးကြီးမြို့နယ် ၊ ဝက်လူးရွာ ရဲစခန်းတိုက်ပွဲမှာ အပေါ့စားထောက်ပို့လေယာဉ် (Y -12) နဲ့ ဗုံးကြဲပြီး လေကြောင်းပစ်ကူပေးနေတာကြောင့် စခန်းမကျသေးဘူးလို့ ရေးသားဖြန့်ဝေနေကြပါတယ်။
တိုက်ပွဲဖြစ်နေတဲ့ ရဲစခန်းဟာ ဝက်လူးရွာ(အနောက်)မှာရှိတာဖြစ်ပြီး ၂၀၁၈ ခုနှစ် ၊ထွေအုပ်ရဲ့ စာရင်းတွေအရ ဝက်လူအနောက်တစ်ရွာတည်းမှာတင် လူဦးရေ ၁,၇၀၀ ကျော်ရှိပါတယ်။
