မေ ၁၉၊၂၀၂၅။ သုည/People’s Spring
ကချင်ပြည်နယ်နဲ့ စစ်ကိုင်းတိုင်းမှာ သပိတ်အဖွဲ့တွေ၊ ဒေသခံပြည်သူတွေက ဒီကနေ့ (မေလ ၁၉)မှာ စစ်ကောင်စီကို ILOရဲ့ ပုဒ်မ(၃၃)အရ အရေးယူနိုင်ရေးနဲ့ စစ်အာဏာရှင်ဆန့်ကျင်ရေး ဆန္ဒပြသပိတ်လှုပ်ရှားမှုတွေ အသီးသီး ပြုလုပ်ခဲ့ကြပါတယ်။
ကချင်ပြည်နယ်၊ ဖားကန့်မြို့နယ်မှာ ဖားကန့်မှော်လှည့်သပိတ်က ဦးဆောင်ပြီး “Vote ILO Article 33 to Save Lives” စာတန်းကိုင်ဆောင်ကာ စစ်ကောင်စီတပ်ကို ILOရဲ့ပုဒ်မ(၃၃)အရ အရေးယူနိုင်ရေး နိုင်ငံတကာက ထောက်ခံမဲပေးကြဖို့ တောင်းဆိုဆန္ဒပြခဲ့ပါတယ်။
ILO ညီလာခံ ILCကို လာမယ့် ဇွန်လ (၂)ရက်မှ (၁၃)ရက်အထိ ဆွစ်ဇလန်နိုင်ငံ၊ ဂျနီဗာမြို့ရှိ ILO ရုံးချုပ်မှာ ကျင်းပမှာပဲ ဖြစ်ပါတယ်။
Public Service Announcement
စစ်ကိုင်းတိုင်း အရာတော်မြို့နယ်မှာလည်း ၅/အရတ အရာတော်လူထုသပိတ်က ဦးဆောင်ပြီး လေကြောင်းအန္တရာယ်ကြိုတင်ကာကွယ်နိုင်ဖို့ အသိပညာပေးဟောပြောပွဲ ပြုလုပ်ခဲ့ပါတယ်။
ဟောပြောပွဲမှာ လက်နက်ကြီး၊ လေကြောင်းအန္တရာယ်ကြိုတင်ကာကွယ်နိုင်ဖို့ ဗုံးခိုကျင်းတူးနည်းတွေ၊ အရေးပေါ် နေထိုင်နည်းတွေကို သရုပ်ဖော် မျှဝေခဲ့ပြီး ဗုံခိုးကျင်းတူးနည်း၊လေကြောင်း/လက်နက်ကြီး အန္တရာယ်ကြိုတင်ကာကွယ်နည်း၊ padamotor(စက်တပ်လေထီး) နဲ့ ပတ်သက်တဲ့ သိမှတ်ဖွယ်ရာတွေ ပါဝင်တဲ့ လက်ကမ်းစာစောင်လည်း ဖြန့်ဝေပေးခဲ့ပါတယ်။
မြောင်မြို့နယ်မှာလည်း လူထုသပိတ်တိုက်ပွဲ ဦးဆောင်ကော်မတီနဲ့ ဝက်လက်မြို့နယ်လူထုသပိတ်တိုက်ပွဲ ဦးဆောင်ကော်မတီတို့ ပူးပေါင်းကာ ဝက်လက်မြို့နယ် အတွင်းက လူငယ်တွေကို ကျားမအခြေပြုအကြမ်းဖက်မှုနဲ့ ပတ်သက်တဲ့ အကြောင်းအရာတွေကို မျှဝေဆွေးနွေးခဲ့ပါတယ်။
