မေ ၂၃၊၂၀၂၅။ထားမြတ်/People’s Spring
ကရင်အမျိုးသားအစည်းအရုံး(KNU)၊ ဒူးပလာယာခရိုင်၊ တပ်မဟာ(၆)နယ်မြေရှိ စစ်ကောင်စီတပ်စခန်းတစ်ခု သိမ်းပိုက်ရရှိခဲ့ကြောင်း KNU ဗဟိုက သတင်းထုတ်ပြန်သည်။
ဒူးပလာယာခရိုင်၊ ကော့ကရိတ်မြို့နယ် ဘလယ်ဒိုကျေးရွာအနီး ကျူးကျော်တပ်စွဲထားသည့် စစ်ကောင်စီတပ်စခန်းကို မေလ ၂၃ရက် ညနေပိုင်းတွင် သိမ်းပိုက်ရရှိခဲ့ဟု အသိပေးသည်။
အဆိုပါ စခန်းသိမ်းတိုက်ပွဲကို ကရင်အမျိုးသားလွတ်မြောက်ရေးတပ်မတော်(KNLA)၊ ကရင်အမျိုးသားကာကွယ်ရေးတပ်(KNDO)နှင့် ပြည်သူ့ကာကွယ်ရေးတပ်မတော်(PDF)တို့ ပူးပေါင်းဆင်နွှဲခဲ့ဟု ထုတ်ပြန်သည်။
Public Service Announcement
တိုက်ပွဲအတွင်း စစ်ကောင်စီတပ်ဖွဲ့ဝင်များ သေဆုံးထိခိုက်မှုရှိ၊မရှိ စစ်သုံ့ပန်းများ ရ၊မရ အခြေအနေ ဖော်ပြမထားသော်လည်း ဘလယ်ဒိုတပ်စခန်းမှ သိမ်းရခဲ့သည့် လက်နက်ခဲယမ်းများ မှတ်တမ်းဓာတ်ပုံကို ဖော်ပြသည်။
ဖော်ပြထားသည့် လက်နက်များကို ရေတွက်ကြည့်ရာ လက်နက်ကြီး လက်နက်ငယ်မျိုးစုံ အလက် ၅၀ ခန့် ရှိသည်ကို တွေ့ရသည်။
KNUတပ်မဟာ(၃) ၊ တပ်မဟာ(၄)၊ တပ်မဟာ(၇)နှင့် တပ်မဟာ(၆)နယ်မြေများရှိ စစ်ကောင်စီတပ်စခန်းများ တစ်ခုပြီးတစ်ခု တော်လှန်ရေးတပ်များက တိုက်ခိုက်သိမ်းပိုက်လျက်ရှိသည်။
တပ်မဟာ(၅)နယ်မြေတွင်လည်း စစ်ကောင်စီတပ်စခန်းသိမ်း တိုက်ပွဲကို ဆင်နွှဲလျက်ရှိသည်။
KNUအနေဖြင့် ၂၀၂၅အတွင်း စစ်ရှိန်မြှင့်မည်ဟု ဗဟိုအဆင့်တာဝန်ရှိသူများက အသိပေးခဲ့ပြီးနောက် တပ်မဟာ နယ်မြေများ၌ စခန်းသိမ်းတိုက်ပွဲများ အရှိန်မြှင့်လုပ်ဆောင်နေခြင်းဖြစ်သည်။
တပ်မဟာ(၇)နယ်မြေတွင် ၂၀၂၄နှစ်ကုန်ပိုင်းမှ ၂၀၂၅မေလအတွင်း တပ်မဟာ(၇)နယ်မြေ မာနယ်ပလောဒေသအပါအဝင် သောင်ရင်းမြစ်ဘေး အခြေချ စစ်ကောင်စီတပ်စခန်း ၈ခုကို သိမ်းပိုက်နိုင်ခဲ့သည်။
ထို့ပြင် တပ်မဟာ(၄)နယ်မြေတွင်လည်း နယ်စပ်ရှိ ထီးခီးတပ်စခန်း၊ ထီးထဗျူဟာတို့ကို ဧပြီနှင့် မေလတွင် တိုက်ခိုက်သိမ်းပိုက်ခဲ့သည်။
