မြန်မာ-ထိုင်းနယ်စပ်သေ့​ဘောဘိုးစခန်းကို ​တော်လှန်​ရေးတပ်​တွေဆက်လက်တိုက်ခိုက်

ဇွန်-၃၊၂၀၂၅။/People’s Spring

မြန်မာ-ထိုင်းနယ်စပ်ရှိ စစ်​ကောင်စီရဲ့သေ့ဘောဘိုးစခန်းကို KNLA ဦး​ဆောင်တဲ့ ပူး​ပေါင်းတပ်​တွေက ဇွန် ၂ ရက်​နေ့မှာဆက်လက်တိုက်ခိုက်​နေပြီး ​ဒေသခံ ၅၀၀ ​ကျော်ဟာထိုင်းနိုင်ငံဘက်ခြမ်းကို စစ်​ရှောင်လာတယ်လို့ ထိုင်း​ဒေသတွင်းသတင်းဌာနအချို့က​ဖော်ပြပါတယ် ။

မြန်မာ-ထိုင်းနယ်စပ်က စစ်တပ်စခန်း​တွေကို ဆက်တိုက်သိမ်းပိုက်​နေတဲ့ ​တော်လှန်​ရေးတပ်​တွေက ဇွန် ၂ ရက်​နေ့မှာသေ့​ဘောဘိုးစခန်းကိုဒရုန်း​​တွေနဲ့ တိုက်ခိုက်ခဲ့ပြီး ​ပေါက်ကွဲသံ​တွေကို ထိုင်းနိုင်ငံဘက်ခြမ်းကကြား​နေရပါတယ် ။

တိုက်ပွဲ​တွေ​ကြောင့် ​ဒေသခံပြည်သူ ၅၀၇ ဦးဟာထိုင်းနိုင်ငံဘက်ခြမ်းက ​နေရာသုံး​နေရာမှာ ယာယီစစ်​ဘေးတိမ်း​ရှောင်​နေတယ်လို့ သိရပါတယ် ။

Public Service Announcement

မြ၀တီမြို့ တောင်ဘက် မြန်မာ-ထိုင်းနယ်စပ် တလျှောက် နယ်စပ်စခန်း​တွေကို KNU ပူးပေါင်းတပ်က တခုပြီးတခု တိုက်ခိုက်သိမ်းပိုက်လျက်ရှိရာသေ့​ဘောဘိုးစခန်း၊ ဥကရစ်ထစခန်း၊ ဝေါ်လေဗျူဟာကုန်း ၊ တီသဲလယ်စခန်း၊ ထီးကပလယ်စခန်းတို့သာ ကျန်ရှိပါ​တော့တယ်။

KNU ဟာ တပ်မဟာ (၇) စစ်ရေးလှုပ်ရှားရာနယ်မြေ က စစ်ကောင်စီတပ်ရဲ့ နယ်စပ်စခန်းအားလုံးနီးပါးကို တိုက်ယူပြီးနောက်မှာ တပ်မဟာ (၆) ဂွင်ထဲက တပ်စခန်းတွေကို ဆက်လက်တိုက်ခိုက်လာတာတွေ့ရပါတယ်။

KNU တပ်မဟာ (၇)ဒေါနတောင်တန်းအရှေ့ခြမ်း ထိုင်းနယ်စပ်တလျောက်က စစ်ကောင်စီတပ်စခန်းတွေထဲ ပူလူတူ၊ ခလယ့်ဒေး၊ တခေါဘီခွီး၊ မော်ဖားသူးစခန်း ၊ တာလယ်ဗျူဟာ နဲ့ မယ်လစခန်းကို ဧပြီလနဲ့ ​မေလမှာ ဆက်တိုက်သိမ်းယူထားပါတယ်။ဒါ​ကြောင့် တပ်မဟာ (၇) ဆက်လက်တိုက်ခိုက်သိမ်းယူဖို့ နော်တရာ(​နောင်ခလာ)စခန်းတစ်ခုပဲ ကျန်ပါတော့တယ်။

KNU ရဲ့ စစ်ရေးဆိုင်ရာ ရည်မှန်းချက်မှာ ဒေသတွင်းကနေ စစ်ကောင်စီတပ်စခန်းတွေအားလုံးကို တိုက်ထုတ်ဖို့ ဖြစ်တယ်လို့ KNU ပြောရေးဆိုခွင့်ရှိသူ ပဒိုစောကလယ်စေးက ပြောထားပါတယ်။

စစ်ကောင်စီတပ်ဘက်ကတော့ ကရင်ပြည်နယ်အတွင်း နယ်စပ်တပ်စခန်းတွေဆက်တိုက် လက်လွှတ်ဆုံးရှုံးနေတာ၊ စစ်သား​တွေထိုင်းဘက်ထွက်​ပြေးတာ​တွေနဲ့ပတ်သက်ပြီး သတင်းထုတ်ပြန်တာလုံးဝ မရှိပဲ နှုတ်ဆိတ်​နေပါတယ်။