ဇွန်-၃၊၂၀၂၅။ထားမြတ်/People’s Spring
ကချင်ပြည်နယ်၊ဖားကန့်မြို့နယ်၊လုံးခင်းဒေသ ကျောက်စိမ်းလုပ်ကွက်ရှိ ကုမ္ပဏီ တခုအတွင်းရှိ ကား ၂ စီးနှင့် ဘတ်ဟိုး ၁စီးတို့အား စစ်ကောင်စီတပ်က မီးရှို့ဖျက်ဆီးခဲ့ဟု ကချင်သတင်းရင်းမြစ်တဦးက ပြောပြသည်။
ဇွန်လ ၃ရက်မနက်ပိုင်းတွင်လုံးခင်း မှော်စာ လုပ်ကွက် တနေရာအား စစ်ကောင်စီ က စစ်ကြောင်းထိုး ဝင်ရောက်ပြီး ယခုကဲ့သို့ မီးရှို့နေခြင်းဖြစ်ကြောင်း ပြောသည်။မီးရှိုဖျက်ဆီးရသည့်အကြောင်းအရင်းနှင့် အခြေအနေအသေးစိပ်ကို ဆက်လက်မေးမြန်းစုံစမ်းနေဆဲဖြစ်သည်။
“လုံးခင်းအောင်ရာဘက်ထပ်ရှို့နေတယ်၊ ၁၁ ခွဲကျော်။အောင်ရာမှော်ပေါ့ “ဟု ကချင်သတင်းရင်းမြစ်က ပြောသည်။
Public Service Announcement
စစ်ကောင်စီနှင့်ပြည်သူ့စစ်များသည်မေလ၃၁ရက်ကလည်း ဖားကန့် မှော်စီစာရှိ တစ်သုံးလုံး ကုမ္ပဏီ ဝန်းအတွင်း ဝင်ရောက်ပြီး အဆောက်အဦးများကို မီးရှို့ဖျက်ဆီးခဲ့သည်။
“အဓိက ငွေညစ်ချင်ကြတာပေါ့။ကုမ္ပဏီတွေမှာလည်း ကားလိုင်စင်မဲ့တွေ့ အများကြီးသုံးနေကြတာလေ ။မှော်တိုင်းနီးပါးပါပဲ။ကုမ္ပဏီပေါင်း ရာချီရှိတယ်”ဟု သတင်းရင်းမြစ်က ပြောသည်။
ဖားကန့်ဒေသကိုပြန်လည်ထိန်းချုပ်နိုင်ရေးကြိုးပမ်းနေသည့် စစ်ကောင်စီနှင့် ပြည်သူ့စစ် ပူးပေါင်း စစ်ကြောင်းသည် မေလ ၂၇ရက်ညပိုင်းတွင် လုံးခင်းဒေသ သို့ ဝင်ရောက်ခဲ့ရာ မေလ ၂၈ရက်တွင် ကချင်လွတ်လပ်ရေးတပ်မတော်(KIA) ပူးပေါင်းတပ်နှင့် တိုက်ပွဲဖြစ်ပွားခဲ့သည်။
စစ်ကောင်စီတပ်က ပြည်သူလူထုကို လူသားဒိုင်းအဖြစ် ဖမ်းဆီးခြင်း ပစ်ခတ်ခြင်းများ ပြုလုပ်ခဲ့ရာ ဒေသခံ ပြည်သူ ၅ဦးထက်မနည်း သေဆုံးခဲ့သည်ဟု စစ်ရေး သတင်းရင်းမြစ်တို့က အသိပေးထားသည်။
