ဇွန်-၁၃၊ ၂၀၂၅။ People’s Spring
ထိုင်းနိုင်ငံ၊ နွန်ထဘူရီခရိုင်က ဘန်ယိုင်ဈေးကြီးကို ထိုင်းအာဏာပိုင်တွေက ဝင်ရောက်စစ်ဆေးဖမ်းဆီးရာ တရားမဝင်လုပ်ကိုင်နေတဲ့ မြန်မာလုပ်သား ၁၅ဦး ဖမ်းဆီးခံခဲ့ရပါတယ်။
ဒီကနေ့(ဇွန်လ ၁၃ရက်)မနက်စောမှာ ဘန်ယိုင်ဈေးကြီးကို ထိုင်းနိုင်ငံရဲ့ အာဏာပိုင်တွေ အဖွဲ့စုံက ဝင်ရောက်စစ်ဆေးခဲ့တာလို့ သိရပါတယ်။ အဲဒီစျေးကြီးမှာ တရားမဝင်လုပ်ကိုင်နေတဲ့ မြန်မာနိုင်ငံသား ၁၅ဦး၊ လာအိုနိုင်ငံသား ၄ဦးနဲ့ ဗီယက်နမ်နိုင်ငံသား ၁ဦး စုစုပေါင်း ၂၀ဦး ဖမ်းဆီးခံခဲ့ရတာလို့ ထိုင်းသတင်းဌာန Khaosodက ဖော်ပြပါတယ်။
ထိုင်းနိုင်ငံကို မြန်မာနိုင်ငံသားတွေ တရားမဝင်လာရောက်မှုနဲ့ တရားမဝင်အလုပ်လုပ်ကိုင်တာကြောင့် ထိုင်းရဲတပ်ဖွဲ့ရဲ့ဖမ်းဆီးခံရမှု ဖြစ်စဉ်တွေ အခုရက်ပိုင်းအတွင်း ခပ်စိပ်စိပ်ဖြစ်လာတယ်လို့ ထိုင်းရောက်မြန်မာလုပ်သားအရေးကူညီဆောင်ရွက်ပေးနေသူတွေက ပြောပါတယ်။
Public Service Announcement
ဇွန်လ ၁၂ရက် မနက်ပိုင်းကလည်း ကန်ချန်နဘူရီခရိုင်အတွင်းမှာ တရားမဝင်လာရောက်တဲ့ မြန်မာလုပ်သား ၂၉ဦးကို တင်ဆောင်လာတဲ့ ကားတစ်စီးကို ထိုင်းရဲတပ်ဖွဲ့က စစ်ဆေးတွေ့ရှိပြီး ဖမ်းဆီးခဲ့ပါတယ်။
လတ်တလောမှာ ထိုင်းအာဏာပိုင်တွေက စစ်ဆေးမှုတွေ ပြုလုပ်နေလို့ မြန်မာလုပ်သားတွေအနေနဲ့ သတိထားနေထိုင်ဖို့ ကိုရဲမင်း(အေအေစီ)က သတိပေးထားပါတယ်။
