ဇွန်-၁၅၊၂၀၂၅။ သုည/People’s Spring
အမေရိကန်၊ ဂျပန်နှင့် တောင်ကိုရီးယားနိုင်ငံတို့တွင် ပြည်ပရောက် မြန်မာနိုင်ငံသားများ စုပေါင်း၍ လူထုခေါင်းဆောင် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများ လွတ်မြောက်ရေး ဆုတောင်းပွဲများကို ယနေ့ (ဇွန်လ ၁၅) ပြုလုပ်ခဲ့သည်။
အမေရိကန်ပြည်ထောင်စု ဘတ်ဖလိုမြို့တွင် လူထုခေါင်းဆောင် ဒေါ်အောင်ဆန်းစုကြည်၏ (၈၀) နှစ်ပြည့်မွေးနေ့ အကြိုဆုတောင်းပွဲ ကျင်းပခဲ့သည်။
အဆိုပါပွဲကို ဘတ်ဖလိုမြို့ခံများ၊ နိုင်ငံရေးစိတ်အားထက်သန်သူများ၊ တိုင်းရင်းသားညီအကိုမောင်နှမများနှင့် ၂၁ရာစု နွေဦးတော်လှန်ရေးအတွင်း ရောက်ရှိလာသည့် မြန်မာမိသားစုများက စုပေါင်းကျင်းပခဲ့ကြခြင်း ဖြစ်သည်။
Public Service Announcement
ဂျပန်နိုင်ငံ Shizuoka ခရိုင်၊ Gotenba မြို့ရှိ ငြိမ်းချမ်းရေးစေတီတွင် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများလွတ်မြောက်ရေး ဆုတောင်းပွဲ ကျင်းပခဲ့သည်။
ယင်းဆုတောင်းပွဲကို LDB(Japan) က ဦးဆောင်ပြုလုပ်တာဖြစ်ပြီး NUG Japan ကိုယ်စားလှယ် ဦးစောဘလှသိန်းနှင့် အဖွဲ့အသီးသီး၏ တာဝန်ခံများကလည်း အမှတ်တရ ဆုတောင်းစကား ပြောကြားပေးခဲ့သည်။
အလားတူ တောင်ကိုရီးယားနိုင်ငံ ဆိုးလ်မြို့တွင်လည်း စစ်အာဏာသိမ်းမှုဆန့်ကျင်ရေးကော်မတီ(ကိုရီးယား)က ဦးစီးကာဒေါ်အောင်ဆန်းစုကြည်၏ အသက် ၈၀ ပြည့်မွေးနေ့ အထိမ်းအမှတ် စစ်အာဏာသိမ်းမှုဆန့်ကျင်ရေးနှင့် နိုင်ငံရေးအကျဉ်းသားများ လွတ်မြောက်ရေး ဆန္ဒပြချီတက်ခဲ့ကြသည်။
ယင်းဆန္ဒပြပွဲကို အမျိုးသားညီညွတ်ရေးအစိုးရ ကိုရီးယားသမ္မတနိုင်ငံဆိုင်ရာ မြန်မာကိုယ်စားလှယ် ဦးရန်နိုင်ထွန်း တက်ရောက်ပြီး တော်လှန်ရေးစကားနှင့်ဒေါ်အောင်ဆန်းစုကြည် ၈၀ ပြည့် မွေးနေ့အတွက် ဆုတောင်းစကား ပြောကြားခဲ့သလို အမျိုးသားဒီမိုကရေစီအဖွဲ့ချုပ်ကထုတ်ပြန်တဲ့ နိုင်ငံသားများသို့ မေတ္တာရပ်ခံစာကိုလည်း NLD-OC ကိုရီးယားဌာနခွဲက ဖတ်ကြားခဲ့သည်။
ဆန္ဒပြချီတက်ပွဲတလျှောက်တွင် ဒေါ်အောင်ဆန်းစုကြည်၏သားငယ်ကိုထိန်လင်း၏မွေးနေ့ဆုတောင်းစကားအပါအဝင် ဒေါ်အောင်ဆန်းစုကြည်၏ရုပ်သံမှတ်တမ်းများ၊ဂုဏ်ပြု တေးသီချင်းများကို ကိုရီးယား၊ အင်္ဂလိပ်၊ မြန်မာ သုံးဘာသာဖြင့် ထုတ်လွှင့်ပြသခဲ့သည်။
ဆန္ဒပြပွဲပါဝင်သူများက ဒေါ်အောင်ဆန်းစုကြည်မွေးနေ့ ပြည်တွင်းလှုံဆော်မှုကို အားပေးသည့် အနေဖြင့် အပြာရောင်ဝတ်ဆင်ပြီး နှင်းဆီပန်းတွေလည်း ကိုင်ဆောင်ခဲ့ကြသလို ချီတက်ပွဲအတွင်း မြန်မာ့နွေဦးတော်လှန်ရေး ကိုရီးယားဘာသာ လက်ကမ်းစာစောင်များကိုလည်း ဖြန့်ဝေခဲ့သည်။
ဓာတ်ပုံ – Phay Sist Naing၊ CJ
