ဇွန်-၂၀၊၂၀၂၅။ဇေအောင်/People’s Spring
စစ်ကိုင်းတိုင်း၊ရွှေဘို-မန္တလေးလမ်းမကြီးမှာ တိုက်ပွဲတွေဖြစ်ပွားနေလို့ ကားအစီးရေ ရာချီပိတ်မိနေကြောင်း ဒေသခံတွေက ပြောပါတယ်။
ပြီးခဲ့တဲ့ဇွန်လ (၁၇)ရက်နေ့ကစပြီး ရွှေဘို-မန္တလေးလမ်းမကြီး၊ စစ်ကိုင်းနဲ့ ဝက်လက်မြို့နယ်ကြားထဲမှာ တိုက်ပွဲတွေဖြစ်ပွားနေတာကြောင့် ဒီကနေ့အထိ ကားအစီးရေ ရာချီပိတ်မိနေတာဖြစ်ကြောင်း ဒေသခံတွေက ပြောပါတယ်။
“ဒီနေ့မနက်လည်းကားတွေပိတ်နေလို့ ကွင်းလမ်းတွေကနေ ပတ်သွားနေရတယ်။”လို့ မန္တလေးကနေ ရွှေဘိုသွားတဲ့ ကားသမားတဦးကဒီကနေ့ ဇွန်(၂၀)ရက် နေ့လယ်ပိုင်းက ပြောပါတယ်။
Public Service Announcement
ရွှေဘိုမှ မန္တလေးသွားမယ့် ခရီးသွားကားတွေကို ဆားတောင်မြို့အဝင်လမ်းကနေ ရက်အကန့်သတ်မရှိပိတ်ဆို့ထားကြောင်း၊ မန္တလေးမှ – ရွှေဘိုသွားမယ့်ကားတွေကိုတော့ ရုံးပင်ကန်ကျေးရွာကနေ စပြီး ပိတ်ဆို့ထားကြောင်း Phoenix Denfence Force အဖွဲ့က အသိပေးပါတယ်။
“ရွှေဘိုလမ်းကိုစစ်ကြောင်းထိုးလာတဲ့စကစနဲ့ တော်လှန်ရေးအဖွဲ့များ ထိတွေ့တိုက်ပွဲဖြစ်နေလို့ နက်ဖြန်လည်းဆက်ပိတ်နေဦးမှာပါပဲ။”လို့စစ်ကိုင်တိုင်းက စစ်ရှောင်တွေကို ကူညီနေသူတဦးကလည်းဇွန်လ (၁၉)ရက်က လူမှုကွန်ရက်ကနေ အသိပေးထားပါတယ်။
ကွင်းလမ်းအနေနဲ့အရာတော်-ထီးဆောင်းလမ်းပိုင်းနဲ့ ဝက်လက်အရှေ့ချမ်း ခရိုင်ချင်းဆက် အမှတ် (၃)လမ်းပိုင်းမှလည်း သွားလာလို့ရကြောင်း သိရပါတယ်။
အလားတူမုံရွာ-မန္တလေးလမ်းပိုင်းမှာလည်းစစ်ကောင်စီယာဥ်တွေဖြတ်သန်းသွားတိုင်း ကာကွယ်ရေးအဖွဲ့တွေက တိုက်ခိုက်လေ့ရှိတာကြောင့် ကားတွေမကြာခဏ ပိတ်မိလေ့ရှိပါတယ်။
