ဇူလိုင်-၅၊၂၀၂၅။ဇော်ရမ်း/People’s Spring
ဖားကန့်တွင်လက်ရှိ ဖြစ်ပွားနေသောတိုက်ပွဲများအတွင်း အရပ်သားထိခိုက်သေဆုံးမှု ထပ်ရှိနေပြီး ဇူလိုင်လ ၄ရက်တိုက်ပွဲ၌ အရပ်သားနှစ်ဦးသေဆုံးခဲ့ကာ ရုပ်အလောင်း မကောက်နိုင်သေးဘဲ စစ်ရေးဆက်လက်တင်းမာနေသည်။
ဇူလိုင် ၄ ရက်နေ့ညက အေးမြသာယာရပ်ကွက်တွင် ဖြစ်ပွားသည့်တိုက်ပွဲ၌ အရပ်သားအချို့ထိခိုက်သေဆုံးမှုရှိခဲ့ခြင်းဖြစ်သည်။
“ဒေသခံတွေကမရှိတော့ဘူး။ညကစစ်ကြောင်းဝင်လာပြီး ပြေးကြလွှားကြနဲ့ ရှုပ်ယှက်ခတ်နေတာ။အခုမနက်သတင်းအရတော့သေဆုံးတာ အရပ်သားနှစ်ဦး။ဘယ်သူမှဝင်မရဘူးလေ။ဘယ်လိုမှကောက်မရဘူး”ဟုဖားကန့်မှ လူမှုကူညီရေးလုပ်နေသူတဦးကပြောသည်။
Public Service Announcement
စစ်တပ်စစ်ကြောင်းသည် ဖားကန့်ဗျူဟာကုန်းကို သွားမည့်လမ်းပိုင်းနေရာများအား စစ်ကြောင်းထိုးနေပြီး လက်ရှိတွင် မော်မောင်းဘွမ်၊ လမောင်ကုန်းနေရာတို့၌ KIA ၊KPDFတို့နှင့် တိုက်ပွဲပြင်းထန်နေကြောင်းသတင်းရရှိသည်။
စစ်ကောင်စီစစ်ကြောင်း ၄ ကြောင်းသည် ဖားကန့်မြို့၊ မြို့မရပ်ကွက်၊ အေးမြသာယာရပ်ကွက်၊ အမှိုက်ပုံ၊ မှော်မောင်းလယာန်၊ မော်ဝမ်းကလေး၊ မှော်ဝမ်းကြီး၊ အင်မားယာန်၊ ရှရော်ခ၊ တောင်ပြို၊ ဗလခမှော်တို့တွင်လည်း ရှိနေပြီး တိုက်ပွဲများဆက်လက်ပြင်းထန်နိုင်ကြောင်း ဒေသခံများကပြောသည်။
ဒေသခံစစ်ဘေးရှောင်လူဦးရေ ၁၀၀၀ ကျော်နေပြီး ဒေသခံများအချင်းချင်း အကူအညီပေးနေကြသည်။
ဖားကန့်ဒေသသို့ စစ်တပ်စစ်ကြောင်းဝင်ရောက်လာသည့် မေလကုန်၊ ဇွန်လဆန်းမှစ၌ တိုက်ပွဲများမကြာခဏဖြစ်ပွားခဲ့ပြီး ဇူလိုင်လဆန်းပိုင်းတွင်တိုက်ပွဲများသည် ဖားကန့်မြို့ပေါ်အထိရောက်ရှိလာခြင်းဖြစ်သည်။
တိုက်ပွဲဖြစ်ပွားနေစဉ် နှင့် တိုက်ပွဲမဖြစ်သည့်အချိန်များ၌မှာ စစ်တပ်ကလက်နက်ကြီးများပစ်ခတ်မှုများရှိခဲ့ပြီး အရပ်သား သေဆုံးသူဦးရေ ၂ဝဦးထက်မနည်းရှိနေပြီဖြစ်သည်။ဇူလိုင်လ ၂ရက်ည၌ တိုက်ပွဲတွင်ဆွတ်ဘွမ်ရွာအတွင်း နေအိမ်တစ်လုံးပေါ်သို့ လက်နက်ကြီး ကျရောက်ပေါက်ကွဲပြီး အရပ်သားနှစ်ဦး သေဆုံးကာ ၁၁ဦး ဒဏ်ရာရရှိခဲ့သည်။ ဇူလိုင် ၅ ရက် ညနေပိုင်းတွင် လက်နက်ကြီးပစ်ခတ်သံများထွက်ပေါ်နေဆဲဖြစ်ပြီး လေကြောင်းအန္တရာယ်သတိပြုကြရန် KIA၊ KPDF ကသတိပေးထားသည်။
“မြစ်ကြီးနားလေတပ်ကနေ ဖားကန့်ဘက်ကို ဂျက်ဖိုက်တာပျံလာတာရှိတယ်။လေကြောင်းအန္တရာယ်ကြီးမားဆုံးကာလဟုတ်တယ်”ဟုKPDF နှင့်နီးစပ်သူတစ်ဦးကပြောသည်။
ဖားကန့်တွင်တိုက်ပွဲဆက်လက်ဖြစ်ပွားနိုင်ပြီး ဒေသခံပြည်သူများအနေဖြင့် လုံခြုံရေးသတိပြုနေထိုင်ကြရန် ကချင်လွတ်လပ်ရေးတပ်မတော်(KIA) ပြောရေးဆိုခွင့်ရှိသူ ဗိုလ်မှူးကြီး နော်ဘူက သတိပေးထားသည်။
