အိုးဘိုထောင်မှာ ဖျားနာပြီး ဝမ်းပျက်သူတွေများနေ၊ ဆေးဝါးကုသခွင့်ရဖို့ နိုင်ကျဉ်းတွေ တောင်းဆို

ဇူလိုင်-၉၊ ၂၀၂၅။ ရှိန်း/People’s Spring

မန္တလေး၊ အိုးဘိုအကျဉ်းထောင်မှာ ဖျားနာပြီး ဝမ်းလျောသူတွေ အလွန်များပြားနေပြီး ဆေးကုသခွင့်မရသလို ဆေးပေးခန်း‌မှာလည်း ဆေးမရှိဘူးလို့ နိုင်ငံရေးအကျဉ်းသားမိသားစုဝင်တွေက ပြောပါတယ်။

အိုးဘိုအကျဉ်းထောင်က အမျိုးသမီးယာယီဆောင် ပတ်ဝန်းကျင်မှာ အမှိုက်တွေ စုပုံနေကာ မိုးရွာပြီး အနံ့အသက်မကောင်းတာ ‌‌‌‌‌‌တွေနဲ့ ခြင်တွေ ပေါများနေတယ်လို့ သိရပါတယ်။

ဒါ့အပြင် အမျိုးသမီးအဆောင် ၄မှာ လူဦးရေ ၆၀၀ကျော် နေထိုင်ရတာဖြစ်ပြီး ရေတခါချိုးလျှင် လူ ၆၀၀ကို တစ်နာရီခွဲခန့် ရေချိုးခွင့်ပေးကာ ရေကို အနည်းငယ်သာ လွှတ်ပေးတာမို့ ယားနာပေါက်သူတွေလည်း ရှိတယ်လို့ နိုင်ငံရေးအကျဉ်းသားမိသားစုဝင်တွေက ပြောပါတယ်။

Public Service Announcement

“အပြင် ရေကန် ၁၅×၁၂ပေ ရေကန်မှာ လူ ၁၂၀ ရေချိုးရတယ်။ ကြပ်ခဲပြီး ခြေထောက်တဖက်ပဲ ဝင်တိုးချိုးရတယ်။ မတိုးနိုင်တဲ့သူ မချိုးရဘူး။ အခန်း၄ခန်းကို တပြိုင်ထဲရေချိုးရတာ။အဝတ်လျှော်ရတာလည်း အဆင်မပြေဘူး။ ပွေး၊ဝဲယားနာပေါက်သူတအားများလာတယ်”လို့ နိုင်ငံရေးအကျဉ်းသူတစ်ဦးရဲ့ပြောကြားချက်ကို မိသားစုဝင်က ပြန်ပြောပြပါတယ်။

ဒါ့အပြင် ဆေးပေးခန်းမှာလည်း ဆေးဝါးလုံးဝမပေးဘဲ အားလုံးကို အပြင်ကနေသာ မှာခိုင်းတယ်လို့ သိရပါတယ်။

အကျဉ်းထောင်အတွင်း ဆေးဝါးကုသခွင့်ပေးဖို့၊ ဆေးပစ္စည်းလုံလောက်အောင်ထားပေးဖို့၊ အကျဉ်းသားအခွင့်အရေးရရှိဖို့၊ အပြင်မှာရှိနေသူတွေက တောင်းဆိုပေးကြဖို့ကိုလည်း နိုင်ငံရေးအကျဉ်းသူက တောင်းဆိုထားပါတယ်။

အကျဉ်းသားတွေရဲ့ အခွင့်အရေးအရ ထောင်တွင်းဆေးဝါးကုသမှုနဲ့ ဆေးဝါးလုံလောက်စွာထားရှိဖို့၊ ကျန်းမာရေးအရ စိုးရိမ်ရသူတွေကို ပြင်ပဆေးရုံသို့အချိန်နဲ့တပြေးညီ ပို့ဆောင်ပေးဖို့ PPNMအနေနဲ့ တောင်းဆိုနေပေမဲ့ အကျဉ်းဦးစီးဌာနက လုပ်ဆောင်မှု မရှိတဲ့အတွက် နိုင်ငံရေးအကျဉ်းသား၊အကျဉ်းသူ နှစ်စဉ်ပျမ်းမျှ(၂၅)ဦးဝန်းကျင် အသက်ဆုံးရှုံးနေတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က ထုတ်ပြန်ထားပါတယ်။

မန္တလေးအိုးဘိုထောင်မှာ ၂၀၂၄ခုနှစ် အောက်တိုဘာနဲ့ နိုဝင်ဘာကလည်း မန္တလေးတိုင်းဝန်ကြီးချုပ် ဒေါက်တာဇော်မြင့်မောင်၊ လျှပ်စစ်နဲ့ စွမ်းအင်ဝန်ကြီးဌာန ပြည်ထောင်စုဝန်ကြီး ဦးဝင်းခိုင်၊ နိုင်ငံရေးအကျဉ်းသား ကိုစိန်လင်း(ခ)အငယ်လေးတို့ (၃)ဦးဆက်တိုက် ကွယ်လွန်ခဲ့ပါတယ်။

ပြီးခဲ့တဲ့ ဇွန်လ ၂၇ ရက်ကလည်း မန္တလေး အိုးဘိုထောင်အတွင်းမှာ မတရားဖမ်းဆီးခံထားရတဲ့ မန္တလေးတိုင်း လွှတ်တော် ဥက္ကဋ္ဌ ဦးအောင်ကျော်ဦး ကွယ်လွန်ခဲ့ပါတယ်။

ဒါ့အပြင် မန္တလေး အိုးဘိုထောင်တခုတည်းမှာတင် မတ်လ ၂၈ ရက်တုန်းက လှုပ်ခတ်ခဲ့တဲ့ စစ်ကိုင်းငလျင်ကြီးကြောင့် မန္တလေးအိုးဘိုထောင်ထဲက နိုင်ငံရေးအကျဉ်းသား (၅၀)ဦးကျော် သေဆုံးခဲ့ရပါသေးတယ်။