ရွှေဘိုမှာမီးပြတ်နေလို့မြို့ခံတွေအခက်​တွေ့

ဇူလိုင်-၁၈၊၂၀၂၅။ဇေအောင်/People’s Spring

စစ်ကိုင်းတိုင်း၊ရွှေဘိုမြို့မှာလျှပ်စစ်ဓါတ်အားပြတ်တောက်​နေတာတစ်ပါတ်ကျော်ကြာလာလို့ အခက်အခဲဖြစ်နေတယ်လို့မြို့ခံတွေကပြောပါတယ်။

ဇူလိုင် ၉ ရက်ဝန်းကျင်ကစပြီးရွှေဘိုမြို့ပေါ်တမြို့လုံးလျှပ်စစ်ဓာတ်အားစတင်ပြတ်တောက်ခဲ့တာပါ။လျှပ်စစ်မီးပြတ်တောက်နေလို့ သောက်သုံးရေမှာအစ အခက်အခဲဖြစ်နေကြောင်း မြို့ခံတွေက ပြောပါတယ်။

“ရွှေဘိုမြို့မီးပျက်နေတာတောင် ၉ ရက်ရှိပြီ။ ရေအခက်အခဲဖြစ်နေတာ။”လို့မြို့ခံတဦးကပြောပါတယ်။

Public Service Announcement

လျှပ်စစ်ဓာတ်အားပြတ်တောက်နေလို့ ဂတ်စ်နဲ့ ထမင်းဟင်းချက်ပြုတ်နေရပြီးဂတ်စ်တွေပါဝယ်ရခက်နေတယ်လို့ ဒေသခံအမျိုးသမီးတဦးက ပြောပါတယ်။

လျှပ်စစ်ဓာတ်အား ပြတ်တောက်နေမှုကြောင့် ဖုန်းလိုင်းတွေနဲ့ ဖိုင်ဘာအင်တာနက်လိုင်းတွေပါ လိုင်းအဆင်မပြေမှုများရှိလာပြီး အဆက်အသွယ်တွေပြတ်တောက်နေတယ်လို့ မြို့ခံတွေက ဆိုပါတယ်။

ဓာတ်အားပြတ်တောက်ရခြင်းအကြောင်းရင်းကိုတော့ မသိရသေးပါဘူး။ ဓာတ်အားလိုင်းပြင်ရမယ့်နေရာတွေကို စစ်ကောင်စီရဲ့ လျှပ်စစ် ဝန်ထမ်းတွေက သူတို့လုံခြုံရေးကြောင့် သွားမပြင်ရဲလို့ ကြန့်ကြာနေတာဖြစ်ကြောင်း မြို့ခံတချို့က ဆိုပါတယ်။

ဒါ့အပြင် လျှပ်စစ်ဓာတ်အားပြတ်တောက်နေချိန် ရွှေဘိုမြို့တောင်ဘက်အဝင်ဂိတ်က စစ်တပ်ကလည်း ညပိုင်းတွေမှာ လက်နက်ကြီးလက်နက်ငယ်တွေနဲ့ မြို့ထဲကို ရမ်းသမ်းပစ်ခတ်နေလို့ မြို့ခံတွေ စိုးရိမ်နေရတယ်လို့ သိရပါတယ်။

စစ်တပ်အာဏာသိမ်းပြီးနောက်ပိုင်းမြန်မာနိုင်ငံဒေသအသီးသီးမှာ လျှပ်စစ်ဓာတ်အား ပြတ်တောက်မှု ပိုမိုဆိုးရွားလာနေပြီး အသေးစား၊ အလတ်စား စီးပွားရေးလုပ်ငန်းများ (SMEs) နဲ့ တပိုင်တနိုင် စီးပွားရေး လုပ်ငန်းများ အခက်တွေ့နေရပါတယ်။